Nth 6
6
Mokany'o Angĩ
1Mwana wakwa, ethĩwa nĩwĩyumĩtye kũĩvĩa mũtũi waku thiĩ wake alea kũĩva,
ethĩwa nĩwathanĩte kũũngama vandũ va mũndũ ũsu,
2wĩyovete na ndeto syaku we mwene;
ũkwatĩtw'e nĩ ndeto ila we mwene wathanie.
3Kwoou mwana wakwa, nĩkwĩthĩwa yu wĩ ungu wa ũtonyi wa mũtũi waku,
nĩ kana wĩtangĩĩe ĩka ũũ: Enda wĩnyivĩtye, ũkesũve mũtũi waku.
4Ndũkaeke metho maku makwatwe nĩ too,
kana kũleelya ngove wombosye.
5Ĩvonokye ta kĩlong'a kuma kw'okonĩ kwa mũsyĩmi,
na ta nyũnyi kuma kw'okonĩ kwa mũtei wayo.
6Enda vala ve nditikũ we mũndũ mũtulu,
syaĩĩsya ũndũ syĩkaa na ũyũĩva.
7Iyĩthĩawa na mũtongoi,
mũsyaĩĩsya, kana mũsumbĩ;
8syĩyiĩĩaa lĩu wasyo ĩvindanĩ ya syũa,
na kwĩyũmbanĩsya lĩu wasyo ĩvindanĩ ya ngetha.
9We mũndũ mũtulu, wĩkoma vau nginya ĩndĩĩ?
Ũkaamũka ĩndĩĩ kuma toonĩ?
10 #
Nth 24.33-34
Wĩneena ũkasya, “Eka ngomange o vanini,
eka nombosye o vanini,
ekanai nakwa nĩkũnze moko nĩthũmũe o vanini!”
11Nĩvo ĩndĩ ũkya wĩkũkĩa ta kĩng'ei,
na kwaĩwa kũyũka ta mũndũ wĩ na mĩio ya kaũ.
12Mũndũ ũte vata, mũndũ mũthũku,
aendaa aineena ndeto sya ũng'endu.
13Nũveneasya andũ na metho make, na kũneena na maũũ make,
na o ta ũu ayonany'a na syaa syake.
14Kĩlĩko kyake kyusũĩte ũkengani, avangaa kwĩka ũthũku,
na avuĩaa kĩthokoo ĩvinda yonthe.
15Kwondũ wa ũu akakwatwa nĩ wanangĩko mũnene kwa kĩthũlũmũko,
na akaanangwa mĩtũkĩ wĩthĩe ndaiitĩka.
16Ve maũndũ thanthatũ Mwĩai Ngai ũmenete,
ĩĩ, maũndũ mũonza ala nĩ ũthatyo kwake:
17Metho me ngathĩĩo, ũĩmĩ ũla ũneenaa ũvũngũ,
moko ala moaa andũ mate ĩvĩtyo,
18ngoo ĩla ĩvangaa maũndũ mathũku,
maũũ ala mekalaataa kwĩka ũthũku,
19ngũsĩ ya ũvũngũ ĩla ĩneenaa ũvũngũ ũtathelaa,
na mũndũ ũla ũvuĩaa kĩthokoo katĩ wa ana-a-asa.
Ũkany'o Ĩũlũ wa Ũmalwaya
20Mwana wakwa, kwata mĩao ya ĩthe waku,
na ndũkaaũlwe nĩ ũmanyĩsyo wa inyia waku.
21Ia mĩao ĩsu ngoonĩ yaku mavinda onthe,
na ũimyoveea ngingonĩ yaku.
22Yĩla ũendete, ĩkakũtongoeasya,
yĩla wakoma ĩkakũsũvĩaa,
na yĩla waamũka ĩkakũnengae motao.
23Nũndũ mĩao ĩsu nĩ taa, na ũmanyĩsyo nĩ kyeni;
mokany'o na ũmanyĩsyo nĩ nzĩa ya thayũ.
24Ikakũsũvĩa kuma kwa mũndũ mũka mũthũku,
ikakũvonokya kuma ndetonĩ syĩ mũyo sya kĩveti kĩte kyaku.
25Ndũkendeew'e thayũnĩ waku nĩ wanake wa mũndũ mũka ũsu,
na ndũkaeke akũkwatye na ngove syake.
26Ĩlwaya nĩyĩtumaa mũndũ-ũme avika vandũ ũtonya kwaĩwa nĩ kalungu ka mũkate,
na kĩveti kĩlaalai nĩkĩtumaa mũndũ asya thayũ wake w'onthe.
27Nĩkũlya, mũndũ nũtonya kũkua mwaki kĩthũinĩ kyake,
na ngũa syake iilea kũvya?
28Mũndũ nũtonya kũkinyĩla ĩũlũ wa makaa me mwaki,
na maũũ make mailea kũvya?
29Ũu nĩw'o kũilyĩ kwa mũndũ ũla ũmanyanaa kĩ-mwĩĩ na kĩveti kya mũndũ ũngĩ;
ũla ũkĩkiitaa ndalea kũkanw'a.
30Andũ maivũthasya kĩng'ei ethĩwa kĩũya nũndũ kĩna nzaa,
31ĩndĩ kyakwatwa no nginya kĩĩve kũndũ mũonza,
na kĩinengane syĩndũ syonthe ila kĩ nasyo.
32Mũndũ-ũme ũla ũmanyanaa kĩ-mwĩĩ na kĩveti kya mũndũ ũngĩ nde kĩlĩko o na vanini;
ũla wĩkaa ũu eminaa we mwene.
33Aũmĩaw'a na kwanangĩwa ndaĩa,
na kũvũthw'a kwake kũikathela.
34Nĩkwĩthĩwa kĩwĩu kya mũndũ-ũme kĩtumaa athata mũno;
ĩvinda yĩla ũkaĩvanĩsya ndakethĩwa na tei o na vanini.
35Ndaketĩkĩla aĩvwe kĩndũ o na kĩmwe,
na ndakeanĩwa o na wamũnenga mĩthĩnzĩo mingĩ.
Currently Selected:
Nth 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
