Nth 3
3
Moseo Angĩ ma Kwĩthĩwa na Ũĩ
1Mwana wakwa, ndũkolwe nĩ momanyĩsyo makwa,
ĩndĩ ĩkalya mĩao yakwa ngoonĩ yaku.
2Nũndũ mĩao ĩsu ĩkatuma wĩkala thayũ myaka mingĩ,
na ĩkatuma ũendeea nesa mũno.
3Ndũkaaĩtĩkĩle wĩkale ũtekwĩka ũseo na ũte mũĩkĩĩku;
oveea ũseo na ũĩkĩĩku ngingonĩ;
iandĩke ngoonĩ yaku.
4 #
Lk 2.52
Nĩvo ĩndĩ wĩĩtĩkĩlwa,
na kwĩthĩwa na nguma nzeo mbee wa Ngai na andũ.
5Ĩkĩĩa Mwĩai Ngai na ngoo yaku yonthe,
na ndũkekwatye ũmanyi waku mwene.
6Mwĩkwatasye maũndũnĩ maku onthe,
na akakwonasya nzĩa ĩla yaw'o.
7 #
Alo 12.16
Ndũkasũanĩe kana we mwene wĩ mũĩ mũno,
ĩndĩ ĩthĩwa na kĩkĩo kya Mwĩai Ngai na ũitia ũthũku.
8Weeka ũu ũkeethĩwa waiita mwĩĩ waku,
na ũkeekĩa mavĩndĩ maku vinya.
9Mũtaĩe Mwĩai Ngai kwa kũmumĩsya nthembo kuma syĩndũnĩ syaku,
na kwa kũmumĩsya ũsyao wa mbee wa ngetha yaku.
10Nĩvo ĩndĩ makũmbĩ maku meusũw'a ngetha mbingĩ,
na maviva maku mayusũa ndivai nzaũ kũvika yĩtĩkange.
11 #
Yovu 5.17
#Aevl 12.5-6 Mwana wakwa, ndũkose ũkũno wa Mwĩai Ngai ta kĩndũ kya ngũĩ,
na ndũkakw'e ngoo yĩla ũũkanw'a nĩwe.
12 #
Ũvu 3.19
Nĩkwĩthĩwa Mwĩai Ngai nũkanasya ũla wendete,
o tondũ ĩthe wĩkanaa na mwana ũla wendete.
13Mũndũ ũla ũkwataa ũĩ,
na ũkwataa ũmanyi nĩwĩthĩawa e mũtanu.
14Nũndũ kwĩthĩwa na ũĩ nĩ kũseo mbee wa kwĩthĩwa na silĩva,
na ũtandĩthyo waw'o nĩ mũseo mbee wa thaavu.
15Ũĩ wĩ vata mũno mbee wa mavia me thooa mũnene,
na vai kĩndũ mũndũ ũtonya kwenda kĩtonya kũelekanw'a na ũĩ.
16Ũĩ ũkakũnenga na kw'oko kwaw'o kwa aũme thayũ mũasa,
na ũikũnenga na kw'oko kwa aka ũthwii na ndaĩa.
17Mĩendele yaw'o nĩya kwendeesya,
na nzĩa syaw'o syonthe nĩ sya mũuo.
18Ũĩ nĩ mũtĩ wa thayũ kwa andũ onthe ala maũkwataa,
na onthe ala mekalaa naw'o methĩawa na ũtanu.
19Mwĩai Ngai nĩweekĩie myambĩlĩĩlyo ya nthĩ aitũmĩa ũĩ wake,
na alũlũmĩĩlya matu aitũmĩa ũmanyi.
20Syũngũ sya kĩw'ũ nĩsyaanĩkie nũndũ wa ũmanyi wake,
na matu nĩmauasya mbua.
21Mwana wakwa, ĩkala na ũĩ ũla waĩlĩte na ũmanyi;
ndũkaaieke syume vala ũĩ,
22nasyo ikeethĩwa thayũ wa ngoo yaku,
na ĩsoa ya kwanakavya ngingo yaku.
23Nĩvo ĩndĩ wĩendaa nzĩanĩ syaku wĩ ũsũvĩonĩ,
na ndũkaluluutĩka.
24Yĩla wakoma, ndũkakĩa,
ũkakomaa, na too waku ũyĩthĩwa wĩ mũyo.
25Ndũkaakĩe yĩla ũndũ mũthũku weekĩka kwa kĩthũlũmũko,
kana yĩla andũ athũku makwatwa nĩ wanangĩko,
26nũndũ Mwĩai Ngai akeethĩawa wĩkwatyo waku,
na akakũsũvĩa ndũkakwatw'e nĩ kĩtei.
27Ndũkaamaime andũ ũseo ũla ũmaĩlĩte,
ethĩwa wĩ na ũtonyi wa kũmeka ũseo ũsu.
28Ndũkaaĩe mũtũi waku, “Enda na ũyũka ĩngĩ ũnĩ na ngakũnenga,”
ethĩwa ĩvindanĩ yĩu nũtonya kũmũnenga kĩla ũkwenda.
29Ndũkaavangĩe mũtũi waku mũvango mũthũku,
mũtũi ũla wĩkalaa vakuvĩ naku akũĩkĩĩe.
30Ndũkaatetany'e na mũndũ vate kĩtumi,
ethĩwa ndakwĩkĩte ũthũku.
31Ndũkaaĩw'ĩe mũndũ mũng'endu kĩwĩu,
na ndũkaanyuve kwĩka ũmwe wa maũndũ ala wĩkaa.
32Mwĩai Ngai nũthataw'a nĩ andũ ala athũku,
ĩndĩ nũtumaa ndũũ na ala alũngalu.
33Mwĩai Ngai nũumanĩaa mũsyĩ wa andũ ala athũku,
ĩndĩ nũathimaa wĩkalo wa ala alũngalu.
34 #
Yak 4.6; 1Vet 5.5 Nũvũthasya ala me kĩvũthya,
ĩndĩ ala menyivasya nũmanengae mumo.
35Andũ ala oĩ makanengwa ndaĩa,
ĩndĩ ndia ikakwata nthoni.
Currently Selected:
Nth 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
