Popular Bible Verses from Nth 3

Share

Ĩkĩĩa Mwĩai Ngai na ngoo yaku yonthe, na ndũkekwatye ũmanyi waku mwene. Mwĩkwatasye maũndũnĩ maku onthe, na akakwonasya nzĩa ĩla yaw'o.

Ndũkasũanĩe kana we mwene wĩ mũĩ mũno, ĩndĩ ĩthĩwa na kĩkĩo kya Mwĩai Ngai na ũitia ũthũku.

Mũtaĩe Mwĩai Ngai kwa kũmumĩsya nthembo kuma syĩndũnĩ syaku, na kwa kũmumĩsya ũsyao wa mbee wa ngetha yaku. Nĩvo ĩndĩ makũmbĩ maku meusũw'a ngetha mbingĩ, na maviva maku mayusũa ndivai nzaũ kũvika yĩtĩkange.

Ndũkaaĩtĩkĩle wĩkale ũtekwĩka ũseo na ũte mũĩkĩĩku; oveea ũseo na ũĩkĩĩku ngingonĩ; iandĩke ngoonĩ yaku.

Mwana wakwa, ndũkose ũkũno wa Mwĩai Ngai ta kĩndũ kya ngũĩ, na ndũkakw'e ngoo yĩla ũũkanw'a nĩwe. Nĩkwĩthĩwa Mwĩai Ngai nũkanasya ũla wendete, o tondũ ĩthe wĩkanaa na mwana ũla wendete.

Mwana wakwa, ndũkolwe nĩ momanyĩsyo makwa, ĩndĩ ĩkalya mĩao yakwa ngoonĩ yaku. Nũndũ mĩao ĩsu ĩkatuma wĩkala thayũ myaka mingĩ, na ĩkatuma ũendeea nesa mũno.

Mũndũ ũla ũkwataa ũĩ, na ũkwataa ũmanyi nĩwĩthĩawa e mũtanu. Nũndũ kwĩthĩwa na ũĩ nĩ kũseo mbee wa kwĩthĩwa na silĩva, na ũtandĩthyo waw'o nĩ mũseo mbee wa thaavu. Ũĩ wĩ vata mũno mbee wa mavia me thooa mũnene, na vai kĩndũ mũndũ ũtonya kwenda kĩtonya kũelekanw'a na ũĩ.

Ndũkaamaime andũ ũseo ũla ũmaĩlĩte, ethĩwa wĩ na ũtonyi wa kũmeka ũseo ũsu.

Mwĩai Ngai nĩweekĩie myambĩlĩĩlyo ya nthĩ aitũmĩa ũĩ wake, na alũlũmĩĩlya matu aitũmĩa ũmanyi.