Yovu Ũelesyo wa Ĩvuku Yĩĩ
Ũelesyo wa Ĩvuku Yĩĩ
Ĩvuku ya Yovu yĩeleetye ĩũlũ wa mũndũ mũlũngalu ũla wakwatie thĩna mwingĩ mũno. Nĩyĩeleetye ũndũ Yovu watatiwe nĩ Satani: Syana syake syonthe nĩsyakwie, na ũthwii wake w'onthe wathela, na akwatwa nĩ ũwau mũthũku mũno wa kĩkonde. Ĩvuku yĩĩ nĩyĩeleetye kwa ũliku ĩũlũ wa mathĩna ma andũ ĩũlũ wa nthĩ, na ũndũ Ngai wĩthĩawa e vamwe na mũndũ yĩla wĩ mathĩnanĩ ta asu.
Mũandĩki wa Ĩvuku yĩĩ nũyĩaanĩtye ilungu itatũ, ila ikwonany'a ũndũ Yovu na anyanyae make atatũ masũanĩaa ĩũlũ wa mathĩna asu.
Anyanyae ma Yovu meelesya kũthĩna kwake, maitũmĩa ndeto ila syaĩ kĩthĩonĩ kya mũĩkĩĩo woo. Anyanyae asu kĩla ĩvinda maĩkĩĩaa kana Ngai nũtuvaa ũla wĩkaa nesa, na aikany'a ũla wĩkaa naĩ. Kwoou mathĩna ma Yovu meonany'a kana nĩwĩkĩte naĩ. Yovu ndekwona ũu ta w'o na kwoou ndaĩlĩtwe nĩ ũkany'o ũthũkĩte ta ũsu, nũndũ ethĩĩtwe e mũndũ mũseo na mũlũngalu. Yovu ndeũmanya nĩ kyaũ kĩtumi Ngai ũtonya kũeka mũndũ ũilyĩ take, akwatwe nĩ ũthũku wĩana ũu. Kwa kĩtumi kĩu ekũlya Ngai ateũkĩa amwĩkĩte ũu nĩkĩ.
Yovu nĩwaendeeie kwĩthĩwa e na mũĩkĩĩo, ĩndĩ endaa atalwe kwĩthĩwa e mũlũngalu methonĩ ma Ngai, na andũ maimanya kana nĩ mũndũ mũseo. Ngai ndaasũngĩa Yovu makũlyo make, ĩndĩ nũndũ wa mũĩkĩĩo wa Yovu, Ngai nũkũmwony'a kwa ndeto syake ũndũ ũtonyi wake na ũĩ wake wĩana. Nĩvo ĩndĩ Yovu kwa wĩnyivyo ũkũkũsĩĩa kana Ngai nĩ mũĩ, na nĩwe Mwene Ũtonyi W'onthe. Yovu Nũkwĩtĩkĩla ũtumanu wake kana aneenete ate kwĩsilya. Nũkwĩlila nũndũ wa ndeto syake nthũku, na sya ũthatu ila waneenie.
Ndetonĩ sya mũthya sya Ĩvuku yĩĩ nĩtũkwona ũndũ Yovu watũngĩiwe syĩndũ ila waĩ nasyo, ekala ũndũ wailyĩ mbeenĩ o na aendeea nesa mbeange. Ngai nĩwakanisye anyanyae ma Yovu nũndũ wa kũlea kũmanya kĩeleelo kya mathĩna make. Yovu e weka nowe wamanyie kana Ngai nĩ mũnene mbee wa ũndũ mũĩkĩĩo wa kĩthĩo kyoo woonanasya.
Maũndũ ala me Ĩvukunĩ Yĩĩ
Ndeto sya mwambĩlĩĩlyo 1.1—2.13
Yovu na anyanyae make 3.1—31.40
a. Kũnyungunyĩsya kwa Yovu 3.1-26
b. Kũneenany'a kwa mbee 4.1—14.22
c. Kũneenany'a kwa kelĩ 15.1—21.34
d. Kũneenany'a kwa katatũ 22.1—27.23
e. Ũĩ ũikathĩĩwa 28.1-28
f. Ndeto sya mũthya sya Yovu 29.1—31.40
Moneeni ma Eliu 32.1—37.24
Mwĩai Ngai aisũngĩa Yovu 38.1—42.6
Ndeto sya mũthya 42.7-17
Currently Selected:
Yovu Ũelesyo wa Ĩvuku Yĩĩ: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011