Est-Kĩk 10
10
Ũnene wa Mũsumbĩ Aasuelo na Molitekai
1Mũsumbĩ Aasuelo nĩwaumĩthasya andũ onthe koti ala maĩ ũsumbĩnĩ wake, o na kũvika ala matwĩe vakuvĩ na ũkanga. 2Maũndũ onthe manene na ma kũseng'ya ala mũsumbĩ ũsu weekie, vamwe na ngewa yonthe ĩũlũ wa ũndũ wamũnenevisye Molitekai na kũmũnenga ndaĩa nene, nĩmaandĩkĩtwe Mavukunĩ ma Ũlilikany'o wa Maũndũ ma Mavinda ma Asumbĩ ma Metia na Velisia. 3Molitekai ũla Mũyuti nĩwe waĩ wa kelĩ kwa ũnene ũsumbĩnĩ wa Aasuelo. Nĩwendetwe mũno na kũnengwa ndaĩa nĩ Ayuti ala angĩ, nũndũ nĩwathĩnĩkĩaa andũ ma mbaĩ yake na kwenda nzyawa syoo syonthe syĩkalae syĩ ũsũvĩonĩ.
Kwĩanĩw'a kwa Ndoto ya Molitekai
3a Nĩvo ĩndĩ Molitekai waisye atĩĩ, “Ngai nĩwe wĩkĩte maũndũ aa. 3bNĩngũlilikana ndoto ĩla naotie ĩũlũ wa maũndũ aa, na vai ũmwe wamo ũleete kwĩanĩw'a. 3cVaĩ nthongo nini ya kĩw'ũ ĩla yatw'ĩkie ũsĩ, na vaĩ kyeni na syũa na kĩw'ũ kingĩ. Esita ũla watwaiwe nĩ mũsumbĩ atw'ĩka mũka wake nĩwe ũsĩ ũsu. 3dNayo ĩla mĩkũnga ĩlĩ nĩ Amani nakwa. 3eIla mbaĩ nĩ andũ ala moombanĩte mamine Ayuti. 3fNayo mbaĩ yakwa nĩ andũ ma Ĩsilaeli ala mamwĩkaĩlile Ngai na matangĩĩwa. Mwĩai nũtangĩĩte andũ make; Mwĩai nũtũvonoketye kuma mothũkunĩ aa onthe. Ngai nĩwĩkĩte syama nene na moseng'yo mataaĩkĩka o na ĩndĩĩ katĩ wa mbaĩ ila ingĩ. 3gKwa kĩtumi kĩu nĩwavangie maũndũ elĩ me kĩvathũkany'o, ũmwe wĩthĩwe wa andũ ma Ngai, na ũla ũngĩ wĩthĩwe wa andũ ma mbaĩ ila ingĩ syonthe. 3hMaũndũ asu elĩ nĩmavikĩie ĩvinda, saa, na mũthenya wa kumĩw'a ũtw'ĩo nĩ Ngai kwondũ wa mbaĩ syonthe. 3iNgai nĩwalilikanile andũ make na amanenga kĩla kĩmaĩlĩte. 3kKwondũ wa ũu andũ make makalilikanaa mboka ya mĩthenya ĩsu mweinĩ wa Atali, mũthenyanĩ wa ĩkũmi na inya na wa ĩkũmi na itano wa mwei ũsu. Andũ make Ĩsilaeli makamĩlilikanaa kwa kũmbana vamwe me na ũtanu na mũyo mbee wa Ngai, kuma nzyawa ĩmwe kũthi ĩla ĩngĩ kũvika tene na tene.”
Ndeto Syaandĩkiwe Ĩtina
3l Mwakanĩ wa kana wa kũsumbĩka kwa Vutolemi na Kĩleovatila, Ndositheũ, ũla waasyaa kana aĩ mũthembi na Mũlivai, vamwe na mwana wake Vutolemi, nĩmookie Misili na maete valũa ũũ ũwetetwe vaa ĩũlũ, ũla ũwetete maũndũ ma mboka ya Vulimu. Maisye kana valũa ũsu nĩ wa w'o, na kana waalyũlĩtwe nĩ Lĩsimako mwana wa Vutolemi, ũmwe wa andũ ala mekalaa Yelũsalemu.
Currently Selected:
Est-Kĩk 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011