Yovu 9
9
Ũsũngĩo wa Yovu
1Nĩvo ĩndĩ Yovu wasũngĩie asya atĩĩ,
2 #
Yovu 4.17
“Nĩnĩsĩ nesa kana ũu nĩ wa w'o,
ĩndĩ mũndũ atonya ata kwĩthĩwa e mũlũngalu methonĩ ma Ngai?
3Ethĩwa mũndũ nũkwenda kũkananĩa nake,
katĩ wa makũlyo ngili mũndũ ndatonya kũmũsũngĩa o na yĩmwe.
4Ngai nĩ mũĩ mũno na e ũtonyi mwingĩ;
ve mũndũ ũtonya kũkita nake akamũsinda?
5Nũthamasya iĩma itesĩ kana nũkwĩka ũu,
na aisyananga nũndũ wa ũthatu wake.
6Ngai nũthingithasya nthĩ kuma wambĩlĩĩlyonĩ wayo,
na kũtuma ituĩ syayo ithingitha.
7Nĩwĩyĩaĩaa syũa yĩkalea kuma,
nũvw'ĩkĩĩaa ndata iikaumye kyeni.
8We e weka nĩwe watambũũkisye matu,
na esĩla ĩũlũ wa itulumo sya ũkanga.
9 #
Yovu 38.31; Amo 5.8 Nĩwe waseũvisye ndata ila syĩtawa:
Ayisi, Olioni, Kĩkundi kya Ndata Mbingĩ,
na ndata sya ngalĩko ya ĩtheo.
10Nĩwĩkaa syama na maũndũ matamanyĩka,
syama itatalĩka.
11Yĩla Ngai wambĩtũka, ndimwonaa,
yĩla waendeea kũthi, ndimũmanyaa.
12Nĩwosaa kĩla ũkwenda na vai mũndũ ũtonya kũmũsiĩĩa;
vai mũndũ ũmũkũlasya, ‘Wĩĩkany'a ata?’”
13Ngai ndakasiĩĩa ũthatu wake;
o na atetheesya ma Laavi#9.13 Laavi: Ũũ nĩ mũkũnga wa ũkanganĩ wĩ ngewanĩ sya tene ũla woonanasya mavinya ma ithokoo na mothũku nĩmakumanaa mbee wake.
14Yu ĩndĩ ndonya ata kũkananĩa nake?
Ndonya ata kũmantha ndeto sya kũkananĩa nake?
15O na kau ndi na ĩvĩtyo, nditonya kũmũsũngĩa,
no nginya nĩsũvane ngwate tei kuma kwa mũsili wakwa.
16O na ethĩwa nĩnamwĩtie na eetĩka,
ndiũsũanĩa kana nũtonya kũmbĩthukĩĩsya.
17Nũkũmbananga na kĩuutani,
na ayongeleela itau syakwa vate kitumi.
18Ndakandeka nĩveve,
atumĩte nĩthĩwa nĩ mũthatu.
19Ethĩwa nĩ kũweta vinya, we e vinya mwingĩ!
Ethĩwa nĩ kwondũ wa ũsili wa katĩ, nũũ ũtonya kũmwĩta akathi#9.19 ũtonya kũmwĩta akathi: Maandĩko Matheu kĩthyomonĩ kya Kĩevelani maĩtye ũtonya kũndwaa kĩsilĩlonĩ?
20O na kau nĩ mũlũngalu,
ndeto syakwa nĩũnzilĩla;
o na ethĩwa ndiwetwa ũndũ ũthũku,
we nũkũndĩkĩĩthya kana nyie nĩ mũvĩtany'a.
21O na kau nditũlwa mũtĩ,
ndyĩsiasya nyie mwene;
nĩmbũthasya mwĩĩ wakwa.
22Maũndũ onthe no ũndũ ũmwe;
kĩu nĩkyo kĩtumi ngwasya, Nĩwanangaa ala alũngalu na ala avuku.
23Yĩla mathĩna matuma kĩkw'ũ kyũka kwa kĩthũlũmũko,
nũthekeeaa kũsindwa kwa ala alũngalu.
24Yĩla nthĩ yeethĩwa yĩ ũtonyinĩ wa andũ athũku,
nũtumaa asili maeka kwona nthĩ!
Ethĩwa ti we wĩkaa ũu,
nũũ ĩndĩ?
25Mĩthenya yakwa ĩendete mĩtũkĩ mbee wa mũndũ asembete;
nĩvĩtaa mĩtũkĩ na ndĩthĩawa na ũtanu.
26Ĩvĩtĩte mĩtũkĩ ta ĩsiwa yĩla yĩsembaa vyũ;
yĩkalaatĩte ta ndiũ ĩtheete ĩkakwate kĩndũ.
27Ethĩwa nĩnaneena na kwasya, Nĩngũlwa nĩ kũnyungunyĩsya kwakwa,
nĩngũeka kũthata na ngĩtana,
28nĩendeeaa kũkĩa mathĩna makwa onthe,
nũndũ nĩnĩsĩ kana Ngai ndakalea kũndalĩla ĩvĩtyo.
29Nũndũ nĩnĩminĩte kwĩthĩwa nĩ na ĩvĩtyo,
nĩĩthĩny'a mana nĩkĩ?
30O na ngathamba na savunĩ,
na kũthesya moko makwa na ĩati,
31ũu wĩ o vo, ũkandikya ĩimanĩ yĩ mũtondo,
na ngũa syakwa mwene ikandea.
32Nũndũ Ngai ti mũndũ takwa ũkethĩa nĩndonya kũmũsũngĩa,
kana tũkathi kũsila ĩkoani nake.
33Ĩndĩ vai mũndũ wa kũlikĩlĩĩla katĩ waitũ,
vai mũndũ wa kũnzilany'a na Ngai.
34Ngai nĩaeke kũngany'a,
na aieka kũndelemya!
35Nĩvo ĩndĩ nĩneena ndeũmũkĩa,
nĩkwĩthĩwa thayũ wakwa ndũilyĩ ũu.
Currently Selected:
Yovu 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
