Yovu 8
8
Ũneeni wa Mbilitati
1Nĩvo ĩndĩ Mbilitati kuma nthĩ ya Sui wasũngĩie asya atĩĩ,
2“Wĩendeea kũneena ndeto sya mũthemba ũsu nginya ĩndĩĩ?
Ndeto syaku nĩ ta kĩseve kĩ na vinya.
3Nĩkũlya, Ngai nĩwelelũkasya ũsili wa katĩ?
Mwene Ũtonyi W'onthe nũalyũlaa ũla wa w'o?
4Yĩla syana syaku syamũvĩtĩisye Ngai,
nĩwaikanisye nũndũ wa naĩ yasyo.
5Ĩndĩ ethĩwa nũũmũmantha Ngai,
na kwĩsũva Mwene Ũtonyi W'onthe,
6ethĩwa wĩ mũtheu na wĩ mũlũngalu,
kwa w'o Ngai akooka ũkũtetheesya,
akakũnenga wĩkalo ũla waĩlĩte.
7Kĩla waĩ nakyo mbeenĩ kyaĩ kĩnini kĩisianĩw'a na ũthwii ũla wĩĩthĩwa naw'o,
ũkaendeea nesa mũno mĩthenyanĩ yaku ĩla yũkĩte.
8“Kũlya nzyawa sya ĩvinda ya tene;
na ũimanya kĩla aaũmae moo meesĩ,
9nĩkwĩthĩwa ithyĩ tũnasyaiwe mĩtũkĩ,
na tũyĩsĩ kĩndũ,
na mĩthenya yaitũ ĩũlũ wa nthĩ ĩthelaa ta kyuu.
10Ĩndĩ eka aaũmau ala oĩ makũmanyĩsye;
ĩthukĩĩsye ũndũ meũkwĩa.
11“Makangaa nĩmatonya kũmea vandũ vate kĩsoo?
Makaangaa nĩmatonya kwĩanĩa nesa vandũ vate kĩw'ũ?
12Maendee kwĩana matanamba kũtemwa,
nĩmomaa mĩtũkĩ o na mbee wa nyeki.
13Mũminũkĩlyo wa ala molawa nĩ Ngai ũilyĩ ũu;
wĩkwatyo wa ala matamwĩsĩ Ngai waa ũu.
14Kĩla maĩkĩĩaa nĩ kĩndũ kĩtonya kũkw'a;
kĩla mekwatasya nĩ ũlũalũĩ.#8.14 ũlũalũĩ: Maandĩko Matheu kĩthyomonĩ kya Kĩevelania maĩtye nyũmba.
15Nĩmeyaĩĩasya ũlũalũĩnĩ ũsu, ĩndĩ ũyanangĩka,
nĩmawĩkwatĩlaa, ĩndĩ ũitilĩkanga.
16“Ala athũku mailyĩ ta mũtĩ wĩ syũanĩ mũnyithye nesa,
nthongoo syaw'o imeete kĩla vandũ mũũndanĩ;
17wovanasya mbumbu ya mavia na mĩi yaw'o,
na ĩkelingĩla kĩla ĩvianĩ.
18Ĩndĩ yĩla nthongoo isu syakũwa,
vala inameete nĩvaleaa kana syaĩ vo na kwasya, ‘Ndyaamwona.’
19Kwa w'o ũsu nĩw'o mũminũkĩlyo wa ũtanu wa mũndũ mũthũku,
andũ angĩ nĩmokaa na kwosa mwanya wake.
20“Kwa w'o Ngai ndaleaa mũndũ mũlũngalu,
kana akekĩa moko ma eki ma naĩ vinya.
21Ũu wĩ o vo akatuma ũtheka mũno,
na ũineena na wasya mũnene wa ũtanu.
22Amaitha maku makakwatwa nĩ nthoni,
na mĩsyĩ ya ala athũku ĩkaomboka vyũ.”
Currently Selected:
Yovu 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
