Yovu 10
10
1“Nĩnĩmenete thayũ wakwa;
nĩngũnyungunyĩsya vate kĩsiĩĩi.
Nĩneena nũndũ wa woo wa thayũ wakwa.
2We Ngai ndũkandalĩle ĩvĩtyo,
ndavye mavĩtyo makwa nĩ maũ.
3Nĩkũlya, nĩwaĩlu kwaku kũnthĩny'a,
kũvũthya wĩa ũla watethisye,
na kũtanĩthw'a nĩ mĩvango ya andũ athũkũ?
4Nĩkũlya, nũndũ metho maku mailyĩ o ta ma andũ,
wonaa o ũndũ andũ monaa?
5Nĩkũlya, nũndũ mĩthenya ya thayũ waku ĩilyĩ mĩthenya ya mũndũ,
na myaka yaku ta ya mũndũ,
6nĩ kana ũmanthe mavĩtyo makwa,
na kũmantha naĩ yakwa?
7Nowĩsĩ kana ndi na ĩvĩtyo,
na vai mũndũ ũtonya kũndangĩĩa kuma ũtonyinĩ waku.
8Moko maku nĩmangwatanisye na mambũmba,
nĩkũlya, yu wĩenda kũmbĩndũkĩa na kũmina?
9Lilikana kana wambũmbie na yũmba;
nĩkũlya, yu nũkũalyũka na kũndw'ĩkĩthya kĩtoo ĩngĩ?
10Ndwambonoisye ta kĩw'ũ ĩvunĩ ya inyia wakwa,
na watuma mwĩĩ wakwa wambĩĩa kwĩanĩa vo?
11Nĩwoombie mwĩĩ wakwa kwa kũkwatany'a mavĩndĩ na malangũ,
na wavw'ĩka mavĩndĩ makwa na nyama na kĩkonde.
12Nũnengete thayũ na ũkambenda,
na ũsũvĩo waku nũtumĩte nĩendeea kwĩthĩwa nĩ thayũ.
13Ĩndĩ yu nĩnamanya kana ĩvinda yonthe,
ũneethĩawa ũvangĩte kũmbĩka naĩ;
nĩnĩsĩ kana asu nĩmo manaĩ mosũanĩo maku.
14Ũnasyaĩĩsye wone kana nĩngwĩka naĩ,
nĩ kana ũlee kũndekea.
15Yĩla neeka naĩ, nĩthĩawa thĩnanĩ,
ĩndĩ neeka ũla waĩlu, vai ũseo nonaa.
Nusũĩtwe nĩ thĩna na nthoni.#10.15 Nusũĩtwe nĩ thĩna na nthoni: Maandĩko Matheu kĩthyomo kya Kĩevelania maĩtye sisya nthoni syakwa.
16Ethĩwa nĩnĩendee nesa,
ũnzyĩmaa ta mũnyambũ;
nĩwĩkaa syama nĩ kana ũnthĩny'e.
17Kĩla ĩvinda nũndeteae ngũsĩ imbũkite,
ũthatu waku kũla nĩĩ nũendeeaa kwingĩva;
kĩla ĩvinda nũndeteae amaitha eũ mambũkite.
18“Wambumisye ĩvunĩ ya inyia wakwa nĩkĩ?
Kava kethĩwa nakwie mũndũ o na wĩva atanambona.
19Kava kethĩwa nasyawa nĩnakwie na ngĩthikwa mĩtũkĩ,
ũsu wĩthĩwa wĩ ũndũ ũseo kwĩ kwĩkala thayũ.
20Nĩkũlya, thayũ wakwa yu ndũkilĩlye kũthela?
Ekana nakwa nĩ kana nĩthĩwe na kavinda ka kũtana vanini.
21Ndanamba kũthi kũndũ ndakasyoka,
nthĩ ya kĩmako na kĩvindu kĩkamu,
22nthĩ yĩ kĩvindu kĩkamu na yĩ kĩthokoo,
kũla kyeni kĩilyĩ kĩvindu.”
Currently Selected:
Yovu 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
