Yovu 42
42
Yovu Aisũngĩa Mwĩai Ngai
1Nĩvo ĩndĩ Yovu wasũngĩie Mwĩai Ngai amwĩa atĩĩ,
2“Nĩnĩsĩ kana we Mwĩai Ngai nũtonya kwĩka maũndũ onthe,
na vai mũvango waku ũtonya kũsiĩĩwa nĩ mũndũ.
3 #
Yovu 38.2
Wĩkũlya, ‘Nũũ ũyũ ũkũsiĩĩa ũtao wakwa ate na ũmanyi?’
Kwa w'o nĩneenete maũndũ ndanamanyaa,
maũndũ ma kũseng'ya mũno ndaneesĩ.
4 #
Yovu 38.3
Wambĩie nĩthukĩĩsye ũineena,
na ngĩtata kũsũngĩa makũlyo maku.
5Mbeenĩ nĩneesĩ o ũndũ andũ mandavĩtye ĩũlũ waku,
ĩndĩ yu nĩngwonete na metho makwa.
6Kwoou nĩngwĩw'a nthoni nũndũ wa maũndũ onthe ala nĩneenete,
na nĩngumbũla kwa kwĩyũmba kĩtoo na mũu.”
Ngai Aiweta kana Yovu nĩwe Wĩkĩte ũla W'o
7Mwĩai Ngai amina kũneena na Yovu, nĩwaneenie na Elivasi kuma ndũanĩ ya Temani amwĩa atĩĩ, “Nĩnthatĩtw'e nue wĩ na anyanyae maku elĩ, nũndũ mũneenete maũndũ mate ma w'o ĩũlũ wakwa, ĩndĩ Yovu aneenete ũla w'o. 8Kwoou yu osa nzaũ mũonza, na ndũũme mũonza, na ũithi kũla kwĩ mũthũkũmi wakwa Yovu ũkathembe nthembo ya kũvĩvw'a kwondũ wenyu. Mũthũkũmi wakwa Yovu nũkũmũvoyea, nakwa nĩngwĩtĩkĩla mboya yake na ngĩlea ũmũkany'a inyw'ĩ nũndũ wa ũtumanu wenyu. Mũneenete maũndũ mate maw'o ĩũlũ wakwa, ĩndĩ Yovu aneenete ũla w'o.”
9Kwoou Elivasi kuma Temani, Mbilitati kuma Sui, na Nzovali kuma Naamathi nĩmeekie ũndũ Mwĩai Ngai wameie meke; Mwĩai Ngai nĩwasũngĩie mboya ya Yovu.
10 #
Yovu 1.1-3
Yovu amina kũvoyea anyanyae make atatũ, Mwĩai Ngai nĩwatumie aendeea nesa ĩngĩ, na amũnenga syĩndũ kũndũ kwĩlĩ kwa ila waĩ nasyo mbeenĩ. 11Ana-a-ĩthe, na eĩtu-a-ĩthe onthe ma Yovu vamwe na andũ ala mamwĩsĩ mbeenĩ, nĩmookie maĩsanĩa nake mũsyĩ kwake. Nĩmamũkiakiisye na mamwĩkĩa vinya nũndũ wa mathĩna onthe ala Mwĩai Ngai wamũeteete. Kĩla ũmwe woo nĩwamũnengie mbesa sya silĩva na mbete ya thaavu.
12Mwĩai Ngai nĩwaathimie Yovu mĩthenyanĩ yake ya mũminũkĩlyo mbee wa ũndũ wamũathimĩte mbeenĩ. Yovu aĩ na malondu ngili ĩkũmi na inya, ngamĩle ngili thanthatũ, ng'ombe ngili ilĩ, na mang'oi ngili ĩmwe. 13O ta ũu Yovu aĩ na ana mũonza na eĩtu atatũ. 14Eetie mwĩĩtu ũla wake wa mbee Yemima, wa kelĩ amwĩta Kesia, na wa katatũ amwĩta Keloni-avuki. 15Vayaĩ aka angĩ nthĩ yonthe maanakavĩte ta eĩtu ma Yovu. Ĩthe woo nĩwamanengie ũtiĩwa vamwe na ana-a-ĩthe moo.
16Ĩtina wa maũndũ asu, Yovu nĩwekalile thayũ myaka ĩana na mĩongo ĩna; ekalile thayũ nginya oona esũkũũe make na syana sya nzũkũlũ syake 17Nĩvo ĩndĩ Yovu wakwie e mũkũũ mũno.
Currently Selected:
Yovu 42: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
