Yovu 4
4
Yovu na Anyanyae Maineenany'a Ĩvinda ya Mbee
4.1—14.22
Elivasi Aitaa Yovu
1Nĩvo ĩndĩ Elivasi kuma ndũanĩ ya Temani wasũngĩie Yovu amwĩa atĩĩ,
2“Mũndũ ũkũtavya ũndũ nĩwĩw'a woo?
Nditonya kũendeea kũkilya.
3Sũanĩa ũndũ ũmanyĩĩtye andũ maingĩvĩte,
ũndũ wĩkĩĩte vinya moko maleelu.
4Ndeto syaku nitw'ĩĩkaa ũla ũkilĩlye kũvalũka,
nũmwĩkĩĩte vinya ũla wĩna mau monzu.
5Yu nĩ ĩvinda yaku ya thĩna, ndwĩ na wũmĩĩsyo;
ũndũ ũsu nũkũkwatĩte na wĩ na kĩũũyũ.
6Kĩkĩo kya Ngai, ũĩkĩĩku waku,
na kwĩthĩwa ũtatũlwa mũtĩ nĩkw'o wĩkwatyo waku.
7Kwasũanĩa yu, weta ĩvinda o na yĩmwe,
yĩla mũndũ mũlũngalu waathĩna.
8Nĩnonete andũ maiĩmĩa ũthũku na kũvanda thĩna;
yu meketha ũthũku na thĩna.
9Ta kĩuutani kĩnene, Ngai nũmanangaa,
nũndũ wa woo wake.
10Andũ athũku nĩmalulumaa na kũkooma ta mĩnyambũ,
ĩndĩ Ngai nũmavindĩthasya na kũtũla maeo moo.
11Ta mĩnyambũ ĩte na kĩndũ ĩtonya kũaa na kũya,
nĩmakusaa na syana syoo iinyaĩĩka.
12“Ĩvinda yĩmwe nĩnakwatie ũtũmani wa kĩmbithĩ,
neewie ũtũmani ũsu na kĩwe.
13 #
Yovu 33.15
Ũtukũ ũmwe ngomete ngĩota,
yĩla andũ methĩawa makomete makalĩkwa vyũ,
14nĩnakwatiwe nĩ w'ĩa na kĩtetemo,
na syatuma mavĩndĩ makwa mathingitha.
15Nĩneewie kaũseve kavĩtĩla ũthyũ,
na maw'ĩa makwa maũngama nĩ w'ĩa.
16Nĩnoonaa kĩndũ kĩũngamĩte vau,
nĩnasyaisye nesa na ndyaamanya nĩ kyaũ.
Nĩkwakilĩtye na ĩndĩ neew'a wasya:
17‘Ve mũndũ wĩthĩwa e mũlũngalu mbee wa Ngai?
Mũndũ nĩwĩthĩwa e mũtheu mbee wa Mũmbi wake?
18Ethĩwa Ngai ndaĩkĩĩaa athũkũmi make,
na ethĩwa nĩwonaa mavĩtyo alaĩkanĩ make,
19wĩsũanĩa akaĩkĩĩa syũmbe sya yũmba,
ila wumo wasyo nĩ kĩtoo,
ila ikusaa vate vinya, o tondũ mũndũ wũaa kĩmbalutya?
20Mũndũ nũtonya kwĩthĩwa e thayũ kwakya,
na kũtanatuka aithela tene na tene vate mũndũ eĩsĩ ũu.
21Kyonthe kĩla wĩ nakyo nĩkyosawa;
akusaa o na atanamba kwĩthĩwa na ũĩ.’”
Currently Selected:
Yovu 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
