Yovu 37
37
1“Kĩtundumo kĩu kĩtumaa ngoo yakwa ĩkũna mũno,
ĩkathaanyũka yĩ vala yĩkalaa.
2Andũ onthe ĩthukĩĩsyei wasya wa Ngai,
ĩthukĩĩsye kĩtundumo kĩla kyumaa kanyw'anĩ wake.
3Nũtũmaa ũtisi kwĩsĩla yayayanĩ,
kuma ngalĩko ĩmwe ya nthĩ kũthi ĩla ĩngĩ.
4Ĩtina wa ũu kĩlulumo kya wasya wake nĩkĩw'ĩkaa;
nũtundumaa na wasya wake wĩ ũtonyi,
na ĩvindanĩ yĩu yonthe ũtisi wĩthĩawa ũendee kũtisa.
5Wasya wa Ngai nũtundumaa kwa nzĩa sya kũseng'ya,
Ngai nĩwĩkaa maũndũ manene tũtatonya kũmanya.
6Nũneenaa na ĩa akayĩa atĩĩ, ‘Valũka nthĩ,’
nayo mbua na ũnyenyeũ akasyĩa atĩĩ, ‘Uai mbua nene.’
7Nũũngamasya wĩa wa kĩla mũndũ,
nĩ kana andũ onthe mamanye mawĩa make.#37.7 mawĩa make: Maandĩko Matheu kĩthyomonĩ kya Kĩevelania maĩtye nĩwonanasya ũu kwa ala woombie.
8Nyamũ niendaa kwĩvitha,
nĩsyĩkalaa isumonĩ syasyo.
9Iuutani nĩsyũkaa kuma ngalĩko ya ĩtheo,
na mbevo mbingĩ kuma ngalĩko ya ĩũlũ.
10Mĩthũmũ ya Ngai nĩtumaa kĩw'ũ kĩtw'ĩka mbalavu,
na kĩw'ũ kĩnyaĩĩku nĩkĩthithaa mĩtũkĩ kĩkatw'ĩka ĩvia.
11Ngai nĩwusũasya matu na mbua,
na kũnyaĩĩkya ũtisi wake nthĩnĩ wamo.
12Nũtumaa matu methyũũa,
nĩ kana meanĩsye maũndũ onthe ĩũlũ wa nthĩ ala ũmeyĩaĩe.
13Ngai nũetae mbua ĩnyithye nthĩ,
kana akamĩete ĩtũkany'e,
kana onany'e wendo wake.
14Ame Yovu ĩthukĩĩsye,
sũanĩa maũndũ ma kũseng'ya ala Ngai wĩkĩte.
15Nĩũkũlya, nĩwĩsĩ ũndũ Ngai wĩyĩaa,
na kũtuma ũtisi ũtisa kuma matunĩ?
16Nĩwĩsĩ ũndũ matu masũnzũũlaa yayayanĩ,
wĩa wa kũseng'ya ũla Ngai wĩkaa ũmanyinĩ wake mwĩanĩu?
17We wĩĩw'a muutĩa mũno wĩkĩĩte ngũa syaku,
yĩla nthĩ ĩkilĩtye nũndũ wa kĩseve kĩla kyumaa ngalĩko ya ĩtheo.
18Nĩũkũlya, nũtonya kũtambũũkya matu,
na kũtuma methĩwa me momũ ta kyũma kĩkute ũndũ Ngai wĩkaa?
19Tũtavye ũndũ twaĩlĩte kwĩa Ngai,
tũitonya kũmanya nesa nũndũ tũyĩsĩ kĩndũ.
20Nditonya kũkũlya nĩneene na Ngai,
ndonya ata kũmũnenga mwanya amine?
21Yu vai mũndũ ũtonya kũsisya syũa,
yĩkenaa yĩ matunĩ ĩtina wa kĩseve kũvetanga matu.
22Ũtisu wa thaavu nĩwũkaa kuma ngalĩko ya ĩũlũ,
Ngai nĩwũkaa na ũnene wake wa kũtĩsya.
23Tũitonya kũmwona Mwene Ũtonyi W'onthe,
nĩ mũnene na e ũtonyi;
ũlũngalunĩ wake mũnene ndaleaa kũatĩĩa ũsili wa katĩ.
24Kwoou andũ nĩmakĩaa Ngai;
ndanengae ndaĩa mũndũ o na wĩva ũla wonaa ta wĩna ũĩ wake mwene.”
Currently Selected:
Yovu 37: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
