Yovu 36
36
Eliu Aikatha Ũnene wa Ngai
1Eliu nĩwaendeeie kũneena ayasya atĩĩ,
2“Ũmĩanĩsya nakwa o kavinda kanini
na nĩngũkwony'a kana ve maũndũ maingĩ naĩlĩte kũneena kwondũ wa Ngai.
3Nĩngũtũmĩa ũĩ wakwa mwingĩ,
nĩ kana ngwony'e kana Ngai Mũmbi wakwa nĩ mũlũngalu.
4Manya kana ndeto syakwa nĩ syaw'o,
mũndũ wĩ na ũĩ wa w'o e vamwe naku.
5“Ĩthukĩĩsye, Ngai e ũtonyi, ĩndĩ ndavũthasya andũ;
vai ũndũ ũtamanyaa!
6Ndaekaa andũ athũku maendee kwĩkala thayũ,
ĩndĩ nũnengae ala mathĩnaw'a kĩla kĩmaĩlĩte.
7Nũsũvĩaa ala alũngalu,
nũmanengae mwanya wa kũsumbĩka ta asumbĩ,
na kũtuma manengwa ndaĩa tene na tene.
8Ĩndĩ ethĩwa nĩove na mbĩngũ,
maithĩna nũndũ wa maũndũ ala mekĩte,
9Ngai nũmonasya meko moo mathũku,
na ngathĩĩo syoo.
10Nũtumaa methukĩĩsya ũkany'o wake,
na kũmeaĩa maumbũle mothũku moo.
11Meew'a Ngai na kũmũthũkũma,
makaendeea nesa mĩthenyanĩ yoo yonthe,
myaka yoo yonthe makekalaa na ũtanu.
12Ĩndĩ malea kũmwĩthukĩĩsya makooawa,
na makakw'a mate na ũĩ.
13“Andũ ala matamũkĩaa Ngai matindaa me athatu,
o na yĩla makanw'a maimwĩtasya ũtethyo.
14Makusaa meo ma mũika,
manoetw'e nĩ thayũ wusĩe nthoni.
15Ĩndĩ Ngai nũmanyĩasya andũ kwĩsĩla mathĩnanĩ,
nũtũmĩaa thĩna woo kũvingũa metho moo.
16Ngai nĩwakumisye thĩnanĩ,
na atuma ũtana wĩ ũsũvĩonĩ,
mesa yaku yailĩĩlĩtwe lĩu ũla mũseo vyũ.
17Ĩndĩ yu ũendee kũkanw'a nũndũ wa ũthũku waku,
nũkwatĩtwe nĩ ũsilĩlo na sila wa katĩ.
18Ĩsũvĩe syĩndũ sya kwendeesya iikaũkenge,
kana mothwii makwasye.
19Ũthwii waku yu ndũtonya ũkũtethya,
ũtonyi waku w'onthe yu nĩ wa mana.
20Ndũkeliĩle ũtukũ wũke,
ĩvindanĩ yĩla andũ maminawa.
21Ĩsũvĩe ndũkese kũlika ũthũkunĩ,
nũndũ ũnengetwe thĩna ndũkakwatwe nĩ ũthũku.
22“Lilikana ũndũ vinya wa Ngai wĩana,
nĩwe mũmanyĩsya ũla mũnene kwĩ onthe.
23Vai mũndũ ũtonya kũtavya Ngai ũndũ waĩlĩte kwĩka.
Nũũ ũla ũtonya kũmũtalĩla kwĩthĩwa avĩtĩtye?
24Nũkumaw'a ĩvinda yonthe nũndũ wa maũndũ ala wĩkaa,
o naku nĩwaĩlĩte kũmũtaĩa.
25Andũ onthe nĩmonete maũndũ ala wĩkĩte,
nĩmonaa maũndũ asu kuma kũasa.
26Tũitonya kũmanya ũnene wa Ngai vyũ,
kana tũkatala myaka yake.
27“Ngai nĩwe wĩkusĩasya kĩw'ũ kuma nthĩ,
na kũkĩvĩndũa kĩkatw'ĩka malovoto ma mbua.
28Nũekaa mbua ĩkaua kuma matunĩ,
ĩkaua kwondũ wa andũ onthe.
29Nũũ ũla ũtonya kũmanya ũndũ ũnyaĩĩkasya matu,
kana ũndũ kĩtundumo kĩtundumaa matunĩ vala Ngai wĩkalaa?
30Nũnyaĩĩkasya ũtisi wake ũkamũthyũlũlũka,
na nũvw'ĩkaa nthĩ yĩ ungu wa ũkanga.
31Ĩsu nĩyo nzĩa ĩla ũĩthasya#36.31 ũĩthasya: Maandĩko Matheu kĩthyomonĩ kya Kĩevelania maĩtye ũsilĩlaa. andũ,
nũmanengae lĩu mwingĩ.
32Nũkwataa ũtisi na kw'oko kwake,
na aituma ũthi kũatha vala ũvangĩte.
33Kĩtundumo nĩkĩmanyĩthanasya ũvoo wake,
o na indo nimanyaa kana nĩwũkĩte.
Currently Selected:
Yovu 36: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
