Yovu 38
38
Mwĩai Ngai Aisũngĩa Yovu
1Nĩvo ĩndĩ Mwĩai Ngai e kĩuutaninĩ wasũngĩie Yovu amwĩa atĩĩ,
2“Nũũ ũyũ ũkwĩkĩa ũtao wakwa kĩvindu,
aitũmĩa ndeto ite na ũĩ?
3Yu ĩlũmye,
nĩngũũkũlya makũlyo, naku nũũnzũngĩa.
4“Waĩ vo yĩla neekĩaa myambĩlĩĩlyo ya nthĩ?
Ethĩwa nĩwĩsĩ mũno, ndavye.
5Nũũ ũla wanenganie ithimo syayo?
Kwa w'o nĩwĩsĩ!
Nũũ ũla watambũũkisye ũlii wa kũmĩthima?
6Ituĩ ila itw'ĩĩkĩte nthĩ ĩkwatĩĩwe nĩ kyaũ?
Nũũ ũla waiie ĩvia yĩla yĩ vata mũno mwakonĩ wa nthĩ,
7yĩla ndata sya kwakya syainie syĩ vamwe,
na syũmbe syonthe sya ĩtunĩ syaneena na wasya mũnene wa ũtanu?
8 #
Yel 5.22
“Ũla wasiĩĩie kĩw'ũ kya ũkanga kĩikakĩle nũũ,
yĩla kĩw'ũ kya mbũsĩ kyesĩlile ĩũlũ wa nthĩ?
9Ninyie navw'ĩkie ũkanga na matu,
na naũvw'ĩka na kĩvindu kĩkamu.
10Nĩneekĩie mũvaka wa ũkanga,
na natuma ũkanga ũtakĩla.
11Nĩnaisye, ‘Ũkanga vikaa vau,
na ndũkaavakĩle.
Vau nĩvo itulumo syaku mbingĩ ikathelelaa.’
12“Atĩĩ Yovu, thayũnĩ waku waaĩaa nĩ kana kũkye,
na kũtuma mũthenya wambĩĩa kĩoko?
13Waatuma kyeni kya kwakya kĩkena kĩla vandũ ĩũlũ wa nthĩ,
na kĩkatuma ala athũku mauma kũla mevithĩte?
14Kyeni kya mũthenya nĩkĩtumaa iĩma na myanda syumĩla nesa ta mĩtũlo ya ngũa,
syĩthĩawa iyoneka nesa ta mĩulĩ ĩvinyĩĩwe yũmbanĩ.
15Kyeni nĩkĩvetaa kĩvindu kuma kwa ala athũku,
kwoou maitonya kwĩka andũ ala angĩ naĩ.
16“Waathi kũla nthongo ila syĩ ũkanganĩ syumĩte?
Waaĩsĩla nakũu ũkanganĩ nthĩ?
17Ve mũndũ waakwony'a mĩvĩa ya kũlika vala akw'ũ mekalaa?
Waaona mĩvĩa ya kũndũ kũu kwĩ kĩvindu kingĩ?
18Nĩwĩsĩ ũndũ nthĩ ĩnenevete?
Ethĩwa nĩwĩsĩ ndavye.
19“Nĩwĩsĩ vala kyeni kyumaa,
na vala kĩvindu kĩkalaa,
20nĩ kana ũkĩtwae wĩkalonĩ wakyo,
na ũimanya nzĩa ya kũthi kwakyo?
21Vate nzika we nowĩsĩ, nũndũ wĩ mũkũũ mũno,
na waĩ vo yĩla nthĩ yoombawa!
22Waalika vala niaa ĩa,
kana waaona vala niaa mbua ya mavia?
23Nĩnĩsiaa syeteelete ĩvinda ya ithokoo,
mĩthenya ya kũkita na ya kaũ.
24Nĩũkũlya, nĩwĩsĩ nzĩa ya kũthi vala kyeni kĩnyaĩĩkĩaw'a,
kana vala kĩseve kĩvyũ kĩla kyumaa ngalĩko ya wumĩlonĩ wa syũa kĩnyaĩĩkĩaw'a ĩũlũ wa nthĩ?
25Nũũ ũla waseũvisye nzĩa nĩ kana mbua nene ĩtheelelae vo yuĩte,
na aseũvya nzĩa ya kĩtundumo?
26Nũũ ũla wuasya mbua vala vatatwĩe mũndũ,
weũnĩ ũtatwĩe mũndũ?
27Nũũ ũla ũnyithasya na kũkolya nthĩ nyũmũ na ng'alu,
na kũtuma nyeki ĩmea?
28Ĩthe wa mbua nũũ,
ũla wasyaie malovoto ma ĩmwe nũũ?
29Ĩa yaumie ĩvunĩ yaũ,
ũla wasyaie mũumbĩ kuma ĩtunĩ nũũ?
30Nĩvo kĩw'ũ kyũmaa kĩkekala ĩvia,
kĩw'ũ kya ũkanga ĩũlũ kĩkatw'ĩka ĩvia.
31 #
Yovu 9.9; Amo 5.8 “Nũtonya kwovany'a vamwe ndata ila syĩtawa Masoleti,
kana ũkathasya mĩsivi ĩla ĩkwatanĩtye kĩkundi kya ndata kĩtawa Olioni?
32Nũtonya kũtongoesya ndata ikaumĩlaa ĩvinda yĩla yaĩlĩte?
Nũtonya kũtongoesya ndata ila syĩ ngalĩko ya ĩũlũ syĩtawa Nduva nene na Nduva nini?
33Nĩwĩsĩ myamũlo ya matunĩ,
na nthĩ nĩtonya kũtongoew'a nĩ mĩao ĩsu?
34“Nĩũkũlya, nũtonya kũneena na wasya mũnene ũkeyĩaĩa matu,
na ũituma makuĩĩa ũkakolelwa?
35Nũtonya kũtũma ũtisi ũkathi,
na ũikwĩa, ‘Nĩnĩyũmbanĩtye?’
36Nũũ ũla ũnengete matu ũĩ wa kua,
kana ũnengete mũumbĩ ũmanyi?
37Nũũ ũla wĩ na ũĩ wa kũtala matu,
kana ũtonya kweekya ikuu sya ĩtunĩ nĩ kana kue,
38nĩ kana kĩtoo ĩũlũ wa nthĩ kĩkwatane,
na mũthanga ũikwatana ũtw'ĩke ndaka?
39“Nũtonya kũsyĩmĩa mũnyambũ nyamũ ũye,
kana ũkavũnĩthya mĩnyambũ ya mũika yĩna nzaa,
40yoveesye yĩ isumonĩ syayo,
kana ĩilyĩ wĩvithonĩ yoveesye?
41Nũũ ũla ũnengae ngũngũũ lĩu,
yĩla tũswii twayo twambĩkaĩla nyie Ngai,
na kwanganga nũndũ wa kwaĩwa nĩ lĩu?”
Currently Selected:
Yovu 38: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
