Yovu 35
35
Ũneeni wa katatũ wa Eliu
1Eliu nĩwaendeeie kũneena ayasya:
2“Atĩĩ Yovu, we wĩona ũndũ ũũ nĩ waĩlĩte,
kũneena ũyasya, ‘Ndi na ĩvĩtyo mbee wa Ngai?’
3Kwoou wĩkũlya, ‘Ve ũseo mwaũ kwakwa,
nalea kwĩka naĩ nĩkwataa ũseo mwaũ?’
4Nĩngũũsũngĩa,
we wĩ na anyanyae maku.
5Sisya matunĩ wone,
sisya wone ũndũ matu me ĩũlũ!
6 #
Yovu 22.2-3
Ethĩwa nĩweeka naĩ, ũu wĩkaa Ngai ata?
Weeka naĩ mavinda maingĩ, ũu nĩwĩthĩawa wamwĩka ũndũ?
7Ethĩwa wĩ mũlũngalu, ũnengae Ngai kyaũ?
Kana nĩ kyaũ Ngai wosaa kuma kw'okonĩ kwaku?
8Ũthũku waku nũtumaa andũ angĩ taku mathĩna,
na ũseo waku nĩwĩkaa andũ angĩ nesa.
9“Andũ nĩmaĩaa nũndũ wa kũthĩnw'a mũno;
nĩmekaĩlaa mũndũ amatethye kuma ũtonyinĩ wa ũla wĩ vinya.
10Ĩndĩ vai mũndũ ũkũlasya, ‘Aĩva Ngai Mũmbi wakwa,
ũla ũtumaa andũ matana ũtukũ,
11ũla ũtũnengae ũĩ mwingĩ kwĩ wa nyamũ sya kĩthekanĩ,
na kũtuma twĩthĩwa na ũmanyi mwingĩ kwĩ wa nyũnyi?’
12Andũ mamwĩkaĩla, ndasũngĩaa,
nũndũ me ngathĩĩo na nĩ athũku.
13Kwa w'o Ngai ndew'aa kĩĩo kya mana,
Mwene Ũtonyi W'onthe ndakĩthukĩĩasya.
14Ngai akakũsũngĩa ata ĩvindanĩ yĩla we ũkwasya kana ndũmwene,
na kana ĩkoani yaku yĩ mbee wake na no nginya ũmweteele?
15Wĩsũanĩa kana Ngai ndakanasya,
na kana ndaatĩanĩaa na naĩ.
16Kwoou Yovu wĩneenaa ndeto sya mana,
wĩneena ndeto mbingĩ ũte na ũmanyi.”
Currently Selected:
Yovu 35: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
