Yovu 34
34
Eliu Aitetea Ngai
1Nĩvo ĩndĩ Eliu waendeeie kũneena ayasya atĩĩ,
2“Inyw'ĩ andũ oĩ, ĩthukĩĩsyei ndeto syakwa,
teai matũ, inyw'ĩ andũ mwĩ na ũmanyi.
3Kũtũ nĩkw'o kũsamaa ndeto,
o tondũ ũĩmĩ ũsamaa lĩu.
4Tũnyuvei ũndũ ũla waĩlĩte;
nĩtwĩmanyĩsyei ũndũ ũla mũseo.
5Yovu aĩtye, ‘Nyie nĩ mũlũngalu,
ĩndĩ Ngai nũmbatĩte ũsili wa katĩ.
6O na kau nĩ mũlũngalu, ndalawa ta mũkengani;
kĩtau kyakwa kĩivoaa, o na kau ndi na ĩvĩtyo.’
7“Ũla ũilyĩ Yovu nũũ,
mũndũ wĩ kĩvũthya kingĩ,
8wĩkalanasya na andũ ala mekaa naĩ,
na kũtindany'a na andũ athũku?
9Nĩkwĩthĩwa aneenete akasya,
‘Vai ũunĩko mũndũ ũkwataa yĩla wamwendeesya Ngai.’
10“Kwoou mbĩthukĩĩsyei, inyw'ĩ andũ mwĩ na ũĩ;
Ngai ndatonya kwĩka naĩ,
Ngai Mwene Ũtonyi W'onthe ndavĩtasya.
11 #
Sav 62.12
Nũĩvaa mũndũ kwĩanana na wĩa wake;
nũmũtuvaa kwĩanana na mwĩkalo wake.
12Nĩw'o ki kana Ngai ndekaa naĩ,
Mwene Ũtonyi W'onthe ndelelũkasya sila wa katĩ.
13Nũũ ũla wanyuvie Ngai ethĩwe na ũtonyi nthĩ yonthe?
Nũũ ũla wamũnengie ũtonyi wa kũũngamĩa nthĩ yonthe nũũ?
14Ta kethĩwa nĩ mũvango wa Ngai,
na aivetanga veva na thayũ wake ĩũlũ wa nthĩ,
15syũmbe syonthe no ithele vyũ ĩmwe,
nake mũndũ aisyoka kĩtoonĩ.
16“Ethĩwa wĩ na ũmanyi, ĩw'a ndeto ii,
ĩthukĩĩsye ũndũ ngwasya.
17Nĩkũlya, Ngai nũtonya kũsumbĩka ethĩwa nũmenaa sila wa katĩ?
Naku nũtonya kũtw'ĩkĩthya ũla mũlũngalu na wĩ ũtonyi kwĩthĩwa e mũvĩtany'a?
18Ngai nũtavasya asumbĩ akamea atĩĩ, ‘Inyw'ĩ mũi vata,’
na o ta ũu ayĩa anene me ndaĩa atĩĩ, ‘Inyw'ĩ mwĩ athũku.’
19Ngai ndendeeasya anene,
na ndendeeasya athwii mbee wa ngya,
nũndũ nĩwe mũmbi wa onthe.
20Ũtukũ katĩ nĩmakusaa matataĩĩe;
Ngai nũkũnaa andũ makathela,
nũvetangaa andũ me ũtonyi ateũtũmĩa vinya wa andũ.
21“Nĩkwĩthĩwa metho make masyaĩĩasya nzĩa sya andũ,
na nĩwonaa maũndũ onthe ala mekaa.
22Vai vandũ ve wiki kana kĩvindu kĩkamu,
vala andũ ala athũkũ matonya kũmwĩvitha Ngai.
23Ngai nde na vata wa kũvanga ĩvinda,
yĩla andũ matonya kũthi akamasilĩle.
24Nũminaa andũ me ũtonyi atakũlĩtye ĩũlũ woo,
na ayĩkĩa andũ angĩ vandũ voo.
25Kwoou nũndũ Ngai nĩwĩsĩ maũndũ ala mekaa,
nũmavetangaa na kũmamina ũtukũ.
26Nũmakanasya nũndũ wa mothũku moo,
andũ onthe masyaĩĩsye,
27nũndũ nĩmaekie kũmũatĩĩa,
na mayĩtĩkĩla kũatĩĩa o na ĩmwe ya nzĩa syake.
28Nĩmatumie kĩĩo kya ngya kĩmũvikĩa,
na kwoou eew'a kĩĩo kya ala mathĩnaw'a.
29“Ethĩwa Ngai nĩwavindya,
nũũ ũtonya kũmũtw'a mũvĩtany'a?
Ethĩwa nĩwavitha ũthyũ wake,
nũũ ũtonya kũmwona?
Ĩndĩ e na ũtonyi ĩũlũ wa mũndũ na ĩũlũ wa nthĩ,
30nĩ kana asiĩĩe mũndũ ũla ũtamũkĩaa Ngai ndakasumbĩke,
na o ta ũu amũsiĩĩe ndakaseũvĩsye andũ mũteo.
31“Mũndũ akaneena na Ngai akamwĩa atĩĩ,
‘Nĩnĩvĩtĩtye, ĩndĩ ndikeka naĩ ĩngĩ,
32manyĩsye kĩla ndatonya kwona;
ethĩwa nĩnĩvĩtĩtye, ndikeka ũu ĩngĩ.’
33Nĩkũlya, Ngai akalea kũmũkany'a alea kũalyũla ngoo yake?
Nue waĩlĩte kũnyuva ti inyie; kwoou weta ũndũ wĩsĩ.
34“Andũ me na ũmanyi na andũ me na ũĩ,
ala mambĩthukĩĩasya makambĩaa atĩĩ,
35‘Yovu aneenaa ate na ũĩ,
ndeto syake iina ũmanyi.’
36Nenda kethĩwa Yovu nũsilĩlwa nginya mũminũkĩlyo,
nũndũ asũngĩaa ta mũndũ mũthũku.
37Yovu ongelaa ũng'endu naĩnĩ yake,
e katĩ waitũ nũvũthasya Ngai,
nĩwongelaa ndeto syake sya kũleana na Ngai.”
Currently Selected:
Yovu 34: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
