Yovu 33
33
Eliu Aikany'a Yovu
1“We Yovu, yu ĩthukĩĩsye ũneeni wakwa,
ĩthukĩĩsye nesa kyonthe kĩla ngũneena.
2Nĩnĩyũmbanĩtye kũneena,
ngilĩlye kũneena.
3Ndeto syakwa syonthe nĩ sya w'o,
na nĩneena w'o.
4Veva wa Ngai nĩwe wambũmbie,
na veva wa Mwene Ũtonyi W'onthe nũnengae thayũ.
5“Ethĩwa nũtonya nzũngĩe,
vanga ndeto syaku nesa wĩ mbee wakwa,
weta ũndũ ũkwenda.
6We, nakwa tũilyĩ ũndũ ũmwe mbee wa Ngai,
ithyelĩ twoombiwe na yũmba.
7Kwoou ndwĩ na kĩtumi kya kũngĩa,
kana ũsũanĩe nyie nĩndonya ũkũnenga thĩna.
8“Nũneenete ndyĩw'a,
na ngew'a ndeto syaku.
9Nũneenete ũkasya, ‘Nyie ndi na ĩvĩtyo, vai ũthũku nĩkĩte,
ndi na ĩvĩtyo na vai naĩ nthĩnĩ wakwa.
10Ngai nũmanthaa itumi sya kũnthĩny'a,
na andalaa ta nĩ mũmaitha wake.
11 #
Yovu 13.27
Nĩwovaa maũũ makwa na mĩtĩ ya kwova andũ,
na kũsyaĩĩsya kw'onthe kũla nĩendaa.’
12Ĩndĩ eka ngũtavye, We Yovu wĩ na ĩvĩtyo,
Ngai nĩ mũnene mbee wa andũ.
13Wĩsikatĩa Ngai kyaũ ũyasya,
‘Ndesũngĩa ĩkũlyo yakwa o na yĩmwe.’?
14O na vala Ngai aneenaa kwa nzĩa syĩ kĩvathũkany'o,
vai mũndũ ũmanyaa ũndũ Ngai wasya.
15 #
Yovu 4.13
Ũtukũ, yĩla andũ makomete vyũ,
Ngai nũneenaa namo ndotonĩ kana mawoninĩ.
16Nĩvo ĩndĩ ũtumaa mew'a ũndũ ũkwasya,
na aimatelemya na mokany'o.
17Aneenaa nĩ kana atume andũ maekana na naĩ,
na aimavetangĩa kwĩthĩwa me na mĩkathĩĩo.
18Ngai ndetĩkĩla andũ manangwe;
nũmovoasya kuma kĩkw'ũnĩ.
19Ngai nũkanasya mũndũ kwa kũtuma awaa,
na kũtuma ethĩwa na kyalya mwĩĩnĩ.
20Ũwau nũtumaa mũndũ aemwa nĩ lĩu,
o na lĩu ũla mũseo nĩwĩw'aa ate kũwenda.
21Mwĩĩ wake nũthelaa vyũ,
ũkethĩa mavĩndĩ make ala matanoonekaa nĩmaumĩla.
22Ethĩawa e vakuvĩ mũno na mbũa,
thayũ wake wĩthĩawa ũthengee ala maetae kĩkw'ũ.
23Nĩvatonyeka mũlaĩka ũmwe katĩ wa alaĩka aingĩ ma Ngai akoka kũmũtetheesya,
alaĩka ala malilikanasya andũ ũndũ ũla waĩlĩte.
24Mũlaĩka ũsu aneenaa na tei akasya,
‘Mũlekyei! Ndethi nthĩ ya ala akw'ũ,
nĩna kĩndũ kya kũĩva ovow'e.
25Eka mwĩĩ wake ũseũve ta wa mũndũ wa mũika,
na ayĩthĩwa e na vinya ta yĩla waĩ wa mũika.’
26Mũndũ ũsu avoya, Ngai akamũsũngĩa,
akathaithaa Ngai e na ũtanu.
Ngai akatuma ethĩwa e mũlũngalu ĩngĩ.
27Akaina e mbee wa andũ akyasya;
‘Nĩnĩvĩtĩtye; nĩnĩkĩte ũla ũte ũseo, ĩndĩ Ngai nũndekeete.
28Nĩwambonokisye ndikathi nthĩ ya ala akw'ũ,
nyie nĩ o thayũ.’
29“Ngai nĩwĩkaa mũndũ maũndũ asu onthe,
mavinda kwa mavinda.
30Nũtangĩĩaa thayũ wa mũndũ,
na aimũnenga ũtanu wa kwĩthĩwa thayũ.
31We Yovu ĩthukĩĩsye nesa, ĩw'a ũndũ ngũkwĩa;
vindya na ũyĩeka nĩneene.
32Ĩndĩ ethĩwa wĩ na ũndũ ũkwenda kwasya weta,
nĩngwenda ũkũsĩĩa kana ndwĩ na ĩvĩtyo.
33Ethĩwa ti ũu, mbĩthukĩĩsye;
kilya, na nĩngũũmanyĩsya ũndũ ũtonya kwĩthĩwa wĩ mũĩ.”
Currently Selected:
Yovu 33: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
