Yovu 32
32
Ũneeni wa Eliu
(32.1—37.24)
1Aũme asu atatũ: Elivasi, Mbilitati na Nzovali nĩmaekie kũsũngĩa Yovu nũndũ nĩweesĩ kana kwa w'o nde na ĩvĩtyo. 2Eliu mwana wa Mbalakeli, nzyawa ya Mbusi kuma mũsyĩnĩ wa Lamu nĩwathatie mũno, nũndũ Yovu nĩweetalaa kwĩthĩwa e mũlũngalu na nĩwatũlaa Ngai mũtĩ. 3O ta ũu Eliu nĩwathatiw'e nĩ anyanyae asu atatũ ma Yovu. Mamũthatĩtye nũndũ nĩmaemiwe nĩ kwony'a Yovu ĩvĩtyo, na kwa nzĩa ĩsu matuma Ngai oneka ta we wĩ na ĩvĩtyo. 4Eliu eeteelile aneene na Yovu ala angĩ mamina kũneena nũndũ maĩ akũũ mbee wake. 5Yĩla Eliu woonie kana katĩ wa aũme asu atatũ vai ũmwe waĩ atonya kũsũngĩa Yovu, nĩwathatie. 6Nĩvo ĩndĩ Eliu mwana wa Mbalakeli nzyawa ya Mbusi waneenie asya atĩĩ,
“Nyie nĩ mũndũ wa mũika, inyw'ĩ mwĩ akũũ;
kwoou nĩĩ na w'ĩa kumya woni wakwa.
7Nĩvo nĩsũanĩie nasya, ‘Andũ ala akũũ nĩmaneene,
na ala me na myaka mingĩ maimanyĩsya ũĩ.’
8Ĩndĩ nĩ veva wa Ngai Mwene Ũtonyi W'onthe,
ũla ũlikaa nthĩnĩ wa mũndũ nĩ kana ethĩwe na ũmanyi.
9Ũkũũ ti w'o ũtumaa mũndũ ethĩwa e mũĩ,
ti ala akũũ me oka mamanyaa ũla w'o.
10Kwoou nĩasya atĩĩ, ‘Mbĩthukĩĩsyei;
o nakwa ekai numye woni wakwa.’
11“Nĩthukĩĩsye ũneeni wenyu,
nĩnĩwie ndeto syenyu sya ũĩ mũendee kũmantha kĩla mũũneena.
12Nĩnĩmwĩthukĩĩisye nesa,
na vai ũmwe ũnoony'a Yovu kana nũvĩtĩtye,
kana akasũngĩa makũlyo make.
13Ĩsũvĩei mũikese kwasya, ‘Nĩtwonie ũĩ;
no Ngai ũtonya kũsũngĩa Yovu, ĩndĩ ti mũndũ.’
14Yovu eneenaa nenyu, ti inyie,
ĩndĩ ndisũngĩa Yovu ũndũ mwamũsũngĩa.
15Yovu, anyanyae maku nĩmavũavũana na masindwa,
mai na ũndũ ũngĩ maneena.
16Nĩkũlya, nĩendeea kweteela matekũneena,
na maũngamĩte mate ũndũ maweta?
17O nakwa nĩngũũnenga ũsũngĩo wakwa,
nĩngumya woni wakwa.
18Nũndũ nĩ na maũndũ maingĩ ma kũneena,
veva ũla wĩ nthĩnĩ wakwa nũũnthing'ĩĩsya.
19Nalea kũkwata mwanya wa kũneena,
nĩtembũka ta kĩkuu kya kĩthuma kyusĩe ndivai nzaũ.
20No nginya nĩneene nĩ kana nthũmũe,
no nginya nathamye na ngĩsũngĩa.
21Ndiendeesya mũndũ o na wĩva,
kana kwĩyendeesya kwa mũndũ o na wĩva.
22Nũndũ nyie ndyĩsĩ kwĩyendeesya,
Mũmbi wakwa ndakese kũngany'a mĩtũkĩ.”
Currently Selected:
Yovu 32: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
