Yovu 31
31
1“Nĩnĩvĩtĩte ngathana kana,
ndikaasisya mwĩĩtu na wendi mũthũku.
2Nĩkũlya, Ngai Mwene Ũtonyi W'onthe ekanaa ata naitũ?
Aĩvaa meko ma andũ ata?
3Nũndũ andũ ala athũku matakwataa mathĩna,
na eki ma naĩ maikwata wanangĩko?
4Nũndũ Ngai ũtamanyaa maũndũ onthe ala nĩkaa,
na kũatĩĩa kyonthe kĩla nĩkaa?
5Nyie ndyaaĩsa kwĩka ũndũ ũthũku,
ndyaaĩsa ũkengana.
6Ngai nĩanthime na kĩthimi kya w'o,
na nũkũmanya kana ndi na ĩvĩtyo.
7Ethĩwa naaĩsa kuma nzĩanĩ ĩla ya w'o,
na ngetĩkĩlya ngoo yakwa yendeew'e nĩ ũthũku,
kana ethĩwa naathokoanw'a nĩ naĩ,
8nĩvo ĩndĩ nĩvanda, na ũngĩ aiya,
na kyonthe kĩla kĩmea kĩikũangwa.
9“Ethĩwa naaendeew'a nĩ kĩveti kya mũtũi wakwa,
na ngakyovya nzyaĩĩsye mũomonĩ wake,
10kĩveti kyakwa nĩkĩuĩe mũndũ-ũme ũngĩ,
na kũmanyana kĩ-mwĩĩ na aũme angĩ.
11Nũndũ yĩu yĩthĩwa yĩ ĩvĩtyo ĩnene,
ĩvĩtyo yaĩlĩte kumĩw'a ũtw'ĩo nĩ asili.
12Ũsu wĩthĩwa ũilyĩ mwaki ũla wanangaa,
ũũvĩvya syĩndũ syakwa syonthe.
13Yĩla ũmwe wa athũkũmi makwa wanyungunyĩsya nũndũ wakwa,
nĩnamwĩthukĩĩasya na ngĩmwĩka nesa.
14Kethĩwa ndyaaĩka ũu, nĩthĩwa nĩtonya kwĩa Ngai ata?
Angũlya, nĩmũsũngĩa ata?
15Ngai ũla woombie mũthũkũmi ũsu nowe wambũmbie,
nĩwe watũmbie ithyonthe.
16“Ndyaalea kũtethya ngya,
ndyaaĩtĩkĩla aka ndiwa mekale me akw'ũ ngoo.
17Ndyaaya lĩu wakwa nĩ nyioka,
ngalea kũĩsanĩa na syana ndiwa.
18Nĩthĩĩtwe nĩilyĩ ta ĩthe woo,
ĩvinda yonthe ya thayũ wakwa.
19Noona mũndũ ũkwenda kwaa nũndũ nde na ngũa,
ngya ũkethĩa ndeyĩũĩa ngũa,
20nĩnamũnengae ngũa iseũvĩtw'e na w'ĩa wumĩte malondunĩ makwa.
Nĩvo ĩndĩ mũndũ ũsu wangathimaa na ngoo yake yonthe.
21Ethĩwa nyie naaũkĩlya kw'oko kwakwa nĩtelemye kana ndiwa,
nũndũ nĩnĩsĩ nĩngũsinda ĩkoani kotinĩ,
22kw'oko kwakwa kũtũlĩke,
kũkavũke kuma kĩtuonĩ kyakwa.
23Nũndũ nĩnakĩaa Ngai ndakandetee ũndũ mũthũku,
ndyaĩ nĩtĩkĩla kwĩka ũndũ ta ũsu.
24“Ethĩwa naatw'ĩkĩthya thaavu wĩkwatyo wakwa,
kana ngeta thaavu mũseo mũno wĩvitho wakwa,
25ethĩwa naaĩkathĩĩa nũndũ wa ũthwii wakwa mwingĩ,
kana ngekathĩĩa nũndũ wa ũkwati wakwa mwingĩ,
26kana ethĩwa naathaitha syũa nũndũ wa kyeni kyayo,
kana mwei nũndũ wa ũtisu waw'o,
27na naluluutĩka nĩithaithe,
kana nĩkumane nĩinenge ndaĩa,
28maũndũ asu o namo methĩwa me mavĩtyo ma kũsilĩlwa,
nũndũ nĩthĩwa nakengie Ngai ũla wĩ ĩũlũ.
29Ndyaatana mũmaitha wakwa aanangwa,
kana ngew'a mũyo akwatwa nĩ ũndũ mũthũku.
30Ndyaaĩtĩkĩla nĩke naĩ,
kwa kũumanĩa thayũ wake.
31Andũ ala mekalaa mũsyĩ kwakwa nĩmesĩ,
kana kĩla ĩvinda nĩnathokasya aeni.
32Vai mũendi wa kyalo waakoma nza nzĩanĩ,
nĩnavingũĩaa ũla ũendete kyalo mĩomo yakwa.
33Ndyaavitha naĩ syakwa ũndũ andũ amwe mekaa,
kwa kũvitha ĩvĩtyo yakwa ngoonĩ yakwa,
34nũndũ nĩnakĩaa wingĩ wa andũ,
kana ngakĩa kĩvũthya kya mbaĩ, na ngavindya ngalea kumaala.
35“Kethĩwa ve o mũndũ ũmbĩthukĩĩsya,
nĩngwĩvĩta kana kĩla ngwasya nĩ kya w'o.
Ngai Mwene Ũtonyi W'onthe nĩanzũngĩe.
Kethĩwa maũndũ ala mũmaitha wakwa ũnzikatĩte namo nĩmaandĩkwa ngamona,
36kwa w'o nyie nĩũmosa na kũmakua kĩtuonĩ kyakwa,
na kũmailĩĩla mũtwenĩ wakwa ta kĩlaũnĩ.
37Nĩũtavya Ngai maũndũ onthe ala nĩkĩte,
nĩthi vala ũĩ nĩilyĩ ta mũtongoi ũte na w'ĩa.
38“Ethĩwa naaũya mĩũnda ĩla nĩĩmaa,
kana ngamĩvenana kuma kwa ene mayo,
39ethĩwa naaya lĩu ũla wavandĩtwe vo,
na natuma aĩmi ala maũvandĩte mew'a nzaa,
40ĩia yĩ mĩw'a yĩmee vandũ va nganũ,
na ĩia yĩimea vandũ va nganũ ĩla yĩtawa mbaale.”
Yovu nĩwamina kũneena.
Currently Selected:
Yovu 31: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
