Yovu 30
30
1“Ĩndĩ yu andũ nĩmeũmbũthya,
andũ mate akũũ mbee wakwa.
Aaĩthe moo maĩ andũ ma mana,
ũkethĩa o na ndimanenga mwanya matetheesye ngitĩ syakwa kũsunga malondu.
2Vinya wa moko moo waĩ na ũtethyo mwaũ kwakwa,
andũ o na mataĩ na ũthangaau?
3Maĩ ngya mũno na maĩ na nzaa,
ũkethĩa no makukute mĩi myũmũ,
ũtukũ ithekanĩ, kũndũ kũte andũ.
4Nĩmakũaa mĩtĩ ya weũnĩ na kũmĩya,
o na nĩmaĩsaa mĩi ya mũlutemu, ĩla ĩte mũsamo.
5Nĩmalũngaw'a kuma vala ve andũ moo,
andũ mamalonzelaa ũndũ andũ maatĩĩe ing'ei malonzaa.
6Vate ũndũ ũngĩ nĩmaendie kũtũa matw'ĩkunĩ,
maimanĩ menze nthĩ na mavianĩ.
7Kuma ikuthunĩ nĩmanasya ta nyamũ,
na kũmbanĩa syĩnyeelyanĩ.
8Nĩ syana sya ndia, syana sya andũ ma mana,
nĩmalũngilw'e na mĩsalisa kuma nthĩ.
9Yu mokaa na kũnthekeea,
nyie ndw'ĩkĩte kĩndũ kya kũvũthw'a nĩmo.
10Nĩmaleanaa nakwa na kwĩkala vaasa nakwa,
o na mayĩthĩawa na nzika maindw'ĩlanga mata ũthyũ.
11Nũndũ Ngai nũndw'ĩte kyonze na mũndũ ũtetethya,
membĩka naĩ me na woo mwingĩ.
12Nguthu sya andũ moo nimbithũkĩaa,
nĩmandũngasya nzembete;
nĩmeyũmbanĩasya ĩvinda yoo ya mũthya ya kũmbĩka naĩ.
13Nĩmanangaa nzĩa yakwa ya kũkĩĩla na maitata kũmbĩka naĩ,
na vai mũndũ ũmasiĩĩaa.
14Mokaa mailyĩ ta mekumĩlĩĩla kĩtonyinĩ kĩnene,
na ĩtina wa kũmbithũkĩa maiendeea na mbee.
15Nayu nĩngwatĩtwe nĩ w'ĩa mwingĩ mũno,
maatĩĩe ndaĩa yakwa ta kĩseve,
na kũendeea kwakwa nesa kũvĩtũkĩte ta ĩtu.
16Yu ngilĩlye kũkw'a,
nĩ mĩthenyanĩ ya mathĩna.
17Mavĩndĩ makwa onthe nĩmekwalya ũtukũ,
kyalya kĩla kĩũnthĩny'a kĩiolekaa.
18Ngai nũngwatĩte ngũanĩ syakwa na vinya mũnene,
andũmĩtye ta kala ya ngũa yakwa.
19Nũmbĩkĩtye ndakanĩ,
nakwa ndw'ĩkĩte ta kĩtoo na mũu.
20Ame Ngai nĩngwĩtĩte ĩndĩ ndũũnzũngĩa,
yĩla ngũũvoya, ndũmbĩthukĩĩasya.
21Wĩmbĩka maũndũ mathũku mũno,
wĩngũna na vinya waku w'onthe.
22Ũmbũkĩlĩtye kĩsevenĩ na ũkatuma kĩngua,
nũnduutangĩaa kĩuutaninĩ.
23Nĩnĩsĩ we ũndwaĩte kĩkw'ũnĩ,
vandũnĩ vala vanyuvĩtwe kwa onthe ala me thayũ.
24Kwa w'o, vai mũndũ wĩkaa naĩ mũndũ wĩ na thĩna,
yĩla mũndũ ũsu wakũlya atetheew'e thĩnanĩ wake.
25Nĩkũlya, nũndũ nyie ndaaĩa nũndũ wa ala me thĩnanĩ?
Nũndũ ngoo yakwa ĩtaaĩthĩwa na kyeva nũndũ wa ala me na thĩna?
26Ĩndĩ ũu wĩ o vo, yĩla namanthaa ũseo, ũthũku nĩwookie;
Yĩla namanthaa kyeni, kĩvindu nĩkyookie.
27Nĩna kĩũũyũ na woo ngoonĩ;
nĩthĩĩtwe na thĩna kĩla mũthenya.
28Nangangaa kĩvindunĩ vate kyeni kya syũa;
nĩũngamaa andũnĩ ngĩsũvana ndetheew'e.
29Kĩĩo kyakwa kĩtumĩte ndw'ĩka ta mbĩwa;
nyie na nyaa tũi kĩvathũkany'o.
30Kĩkonde kyakwa nĩ kiũ na nĩkĩũsyũlĩka,
mwĩĩ wakwa wusĩe ndetema.
31Kwondũ wa ũu ngitaa yakwa nini nĩalyũkĩte ĩkaina wathi wa kyeva,
mũtũlilũ wakwa wĩumya wasya wa kĩĩo.”
Currently Selected:
Yovu 30: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
