Yovu 29
29
Yovu Aiminũkĩlya Ũneeni wake
1Yovu nĩwaendeeie na ũneeni wake asya atĩĩ,
2“Mwa kethĩwa nĩilyĩ o tondũ nailyĩ myeinĩ ya navu tene,
mĩthenyanĩ ĩla Ngai wanzũvĩaa.
3Yĩla taa wake wamulĩkĩlaa wĩ ĩũlũ wakwa,
na nesĩlaa kĩvindunĩ ndongoew'e nĩ kyeni kyake.
4Yĩu nĩ ĩvinda yĩla naendee nesa,
na ũnyanya wakwa na Ngai wasiĩĩaa mũsyĩ wakwa kuma ũthũkunĩ.
5Yĩla Mwene Ũtonyi W'onthe waĩ vamwe nakwa,
na syana syakwa syaĩ vakuvĩ nakwa,
6ng'ombe na mbũi syakwa syaumasya ĩia yingĩ,
na ngetha ya mĩtĩ yakwa ya mĩthata yaumaa mauta maingĩ.
7Yĩla atumĩa moombanĩa mũvĩanĩ wa ndũa,
nakwa ngĩkala vamwe namo,
8anake ma mũika mambona oou maũngamaa ũtee,
na ala akũũ maũngamaa manenge ndaĩa.
9Atongoi ala maĩ ma ndaĩa nĩmaekaa kũneena,
na kwĩkwata kanyw'a mony'e andũ nĩmakilye.
10Mawasya ma anene me ndaĩa nĩmavindĩthaw'a,
na maieka kũneena.
11Mũndũ o na wĩva ambĩw'a nĩwaneeneaa nesa,
na ala mambonaa maneenaa nesa ĩũlũ wakwa,
12nũndũ nĩnatangĩĩaa ngya ila syambĩkaĩlaa,
na ala mataĩ na aaĩthe ma kũmatetheesya.
13Ala meethĩawa ũkyanĩ mũnene nĩmangumasya,
na nĩnatethasya aka ndiwa methĩwe ũsũvĩonĩ.
14Neekĩaa ũlũngalu ta w'o ngũa yakwa,
sila wa katĩ waĩ ta w'o ngũa yakwa ndaasa na ngovia yakwa.
15Nyie naĩ metho kwa ilalinda,
na maũũ kwa ala me maũũ mathũku.
16Naĩ ĩthe wa ala athĩni,
nĩneethukĩĩasya mavata ma aeni.
17Nĩnaanangaa ũtonyi wa andũ athũku,
na kwovosya ala meũthĩnw'a nĩmo.
18Nasũanĩaa kana ngakw'ĩĩa mũsyĩ kwakwa,
na ũkũũ wakwa ũyongeleka wingĩve ta kĩthangathĩ.
19Nyie nailyĩ ta mũtĩ ũnyaĩĩkĩtye mĩi yaw'o kĩw'ũnĩ,
ũla mbonge syaw'o syĩthĩawa na ĩmwe ũtukũ w'onthe.
20Andũ onthe mangumasya kĩla ĩvinda,
na vinya wakwa ndwaaĩsa kũnzonokya.
21Andũ nĩmambĩthukĩĩasya na kweteela,
meeteelaa ũtao wakwa makilĩtye.
22Namina kũneena vai ũmwe waneenaa ĩngĩ,
ndeto syakwa syalikaa matũnĩ moo na ũuu.
23Andũ mambeteelaa ũndũ meteelaa mbua,
meethĩawa mailyĩ ta andũ meteelete mbua ya uũa.
24Yĩla makw'a ngoo nĩnamonasya ũthyũ wa ũtanu,
ũthyũ wakwa wĩ na ũtanu nĩwamanengae wĩkwatyo.
25Nĩnamanyuvĩaa nzĩa na kwĩkala ta mũtongoi woo,
natũaa ta mũsumbĩ e katĩ wa asikalĩ make ma kaũ;
nailyĩ ta mũndũ ũla ũkiakiasya ala me na kyeva.”
Currently Selected:
Yovu 29: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
