Yovu 28
28
Ũĩ Ũikathĩĩwa
1“Kwa w'o ve ĩima yĩnzawa silĩva,
ve vandũ thaavu ũtheeaw'a.
2Andũ menzaa kyũma kuma mũthanganĩ,
na maitwekethya kyũma kĩtune kuma ĩvianĩ.
3Andũ ala menzaa syũma nĩmathũkũmaa maimanĩ makuĩte taa,
nĩmamanthaa nginya kũndũ kũliku mũno,
na mayĩnza mavia me kĩvindunĩ kĩkamu.
4Vaasa kuma vala andũ matũaa kana andũ mataaĩsa ũkinya,
andũ nĩmenzaa maima.
Nĩmathũkũmĩaa vau me oka me maimanĩ, masũĩte na makanda.
5Lĩu nĩwumaa ĩũlũ wa nthĩ,
ĩndĩ ungu wa nthĩ ĩsu kwĩthĩawa kũyatũkanga ta kwĩ mwaki.
6Mavia ma nthĩ ĩsu methĩawa na tũvila twa thooa mũnene twĩtawa savaya,
na kĩtoo kya nthĩ ĩsu kĩthĩawa na thaavu.
7Vai kĩlũĩ kĩsĩ nzĩa ya kũthi maimanĩ asu,
vai ndei yaaĩsa kũmona.
8Nyamũ sya kĩthekanĩ iyaaĩsa kwĩsĩla nzĩanĩ isu,
mũnyambũ ndwaaĩsa kwĩsĩla vo.
9Andũ nĩmenzaa mavia momũ mũno,
makenza iĩma ikathela kuma wambĩlĩĩlyonĩ wasyo.
10Maendee kũlika mavianĩ nthĩnĩ,
nĩmethĩaa mavia ma thooa mũnene.
11Nĩmamanthaa kũla mbũsĩ syambĩlĩĩlye,
na maiete kĩla kĩvithĩtwe ũtheinĩ.
12Ĩndĩ ũĩ ũtonya kwoneka va?
Ũmanyi ũtũaa va?
13Mũndũ ndatonya kũmanya thooa waw'o;
ũĩ ndũtonya kwoneka andũnĩ.
14Kũla kũliku ũkanganĩ mũnene kwaasya, ‘Ũĩ ndwĩ nthĩnĩ wakwa.’
O na ũkanga waasya, ‘Ũĩ ndwĩ nthĩnĩ wakwa.’
15Ndũtonya kũthoowa na thaavu ũla mũseo vyũ,
o na ndũtonya kũthooeka na ithimo sya silĩva.
16Ndũtonya kũthoowa na thaavu kuma Ovili,
o na ndũtonya kũthoowa na mavia me thooa mũnene ma onekisi kana savaya.
17Wĩ thooa mũnene mbee wa thaavu kana kĩoo,
mbee wa mĩio ya wanake ya thaavu mũseo mũno,
18Thooa wa ũĩ nĩ mũnene mbee wa mavia momũ ma ũkanganĩ,
kana wa kĩoo kĩũtisa.
Thooa wa ũĩ nĩ mũnene mbee wa tũvila twa thooa mũnene.
19Tũvila twa tovasi kuma Ethiovia tũitonya kwĩananw'a naw'o,
o na thaavu ũla mũseo ndwĩanany'a thooa na ũĩ.
20Ũĩ yu ĩndĩ wumaa va?
Na ũmanyi ũtũaa va?
21Vai kyũmbe kĩ thayũ kĩtonya kũwona,
o na nyũnyi ĩũlũkĩte ndĩtonya kũwona.
22Wanangĩko na kĩkw'ũ ineenaa ikasya,
‘Twĩkaa o kwĩw'a na matũ maitũ ĩũlũ wa ũĩ.’
23Ngai nowe wĩsĩ nzĩa ya kũthi vala ve ũĩ,
na nĩwe wĩsĩ vala ũĩ ũtũaa.
24Nũndũ Ngai nĩwonaa o na kũvika kũla nthĩ ĩthelele,
nĩwonaa kĩla kĩndũ ĩũlũ wa nthĩ.
25Yĩla Ngai wanengie kĩseve vinya wakyo,
na avanga ũndũ ũkanga waĩlĩte kwĩthĩwa wĩana,
26na yĩla wavangie vala mbua yaĩlĩte kua,
na nzĩa ĩla kĩtundumo kyaĩlĩte kwĩsĩla,
27ĩvindanĩ yĩu nĩw'o woonie ũĩ na aweta ĩũlũ wa w'o.
Nĩwawonanisye na awumĩlya.
28 #
Sav 111.10; Nth 1.7; 9.10 Ngai nĩwaneenie na andũ amea atĩĩ,
‘Kũmũkĩa Mwĩai, ũsu nĩ ũĩ,
na kũekana na naĩ nĩ ũmanyi.’ ”
Currently Selected:
Yovu 28: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
