Yovu 27
27
Ũsũngĩo wa Yovu
1Yovu nĩwaendeeie na ũneeni wake asya atĩĩ,
2“O tondũ Ngai wĩ thayũ, ũla ũmbatĩte sila wa katĩ,
Mwene Ũtonyi W'onthe ũla ũtumĩte thayũ wakwa wĩthĩwa na thĩna,
3ĩvindanĩ yonthe ya thayũ wakwa,
na ĩvindanĩ yĩla veva wa Ngai wĩ manyiũũnĩ makwa,
4nyie ndikaneena ũndũ ũthũku,
na ũĩmĩ wakwa ndũkaweta ũvũngũ.
5Ndikamũtalĩla inyw'ĩ ũlũngalu nongi,
ndikaaĩsa kwasya kana nĩna ĩvĩtyo nĩkĩte o na mũthenyanĩ wa kĩkw'ũ kyakwa.
6Ndikaeka kwasya kana nĩ mũlũngalu,
wasya wa ngoo yakwa nĩ mũseo.
7Mũmaitha wakwa nĩethĩwe ta mũndũ mũthũku,
ũla ũleanaa nakwa nĩethĩwe ta mũndũ ũte mũlũngalu.
8Nũndũ wĩkwatyo wa ũla ũtamwĩsĩ Ngai nĩ mwaũ,
ĩvindanĩ yĩla Ngai woosa thayũ wake?
9Nĩkũlya, yĩla mũndũ ũsu wakwatwa nĩ thĩna,
Ngai nĩwĩw'aa kĩĩo kyake?
10Mũndũ ũsu akatana mbee wa Mwene Ũtonyi W'onthe?
Akeekaĩlaa Ngai mavinda onthe?
11Eka ngũmanyĩsye ũndũ ũtonyi wa Ngai ũnenevete,
na ũkũelesya ndeũkũvitha mũvango wa Ngai Mwene Ũtonyi W'onthe.
12Inyw'onthe nĩmwĩyoneete;
yu ĩndĩ mwĩneena maũndũ aa ma mana nĩkĩ?
13Ũũ nĩw'o Ngai wĩkanaa na ala athũku,
ũtiĩwa ũla andũ mate tei makwataa kuma kwa Mwene Ũtonyi W'onthe.
14Nĩmatonya kwĩthĩwa na ana aingĩ,
ĩndĩ onthe mayũaĩwa kaũnĩ.
Nzyawa syoo iyĩsaa kwĩthĩwa na lĩu wĩanĩe.
15Ala mevonoka makooawa nĩ ũwau mũthũku,
na o na iveti syoo iikaĩa nũndũ wa kĩkw'ũ kyoo.
16O na vala nĩmatonya kwĩthĩwa na silĩva mwingĩ ta kĩtoo,
na kwĩthĩwa na ngũa itatalĩka,
17mũndũ mũĩkĩĩku akasyĩkĩa,
na andũ alũngalu makaana silĩva ũsu.
18Mũndũ mũthũku nĩwakaa nyũmba iilyĩ ta ũlũalũĩ wa mbũambũĩ,#27.18 ũlũalũĩ wa mbũambũĩ: Maandĩko Matheu kĩthyomonĩ kya Kĩevelania maĩtye syĩmbalutya kana ndala ya nyũnyi.
kana ta kasũmba kakĩtwe nĩ mũndũ ũla ũsungaa.
19Esaa ũkoma e mũthwii, ĩndĩ ndakeka ũu ĩngĩ;
aamũka ethĩaa ũthwii wake wĩ mũthelu.
20Okĩawa nĩ w'ĩa ta kĩw'ũ kya mbua mbingĩ;
kĩseve kya ũtukũ nĩkĩuutanaa kĩkamũveta.
21Kĩseve kya kwananga kuma ngalĩko ya wumĩlonĩ wa syũa,
kĩkamũvetanga kuma mũsyĩ kwake;
22kĩkauutanĩa vala ũĩ vate tei,
aendee kũtata ũndũ ũtonya evonokye.
23Kĩseve kĩkaendeea kũuutana asembete,
kĩimũtelemya na vinya wa kwananga.”
Currently Selected:
Yovu 27: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
