Yovu 22
22
Yovu na Anyanyae Maineenany'a Ĩvinda ya Katatũ
22.1—27.23
Ũneeni wa Elivasi
1Nĩvo ĩndĩ Elivasi, kuma ndũanĩ ya Temani wasũngĩie kwa kũkũlya atĩĩ,
2 #
Yovu 35.6-8
“Mũndũ nũtonya kũtethya Ngai na ũndũ o na wĩva?
O na mũndũ ũla mũĩ vyũ no amũtethye?
3Nĩkũlya, kwĩthĩwa wĩ mũlũngalu nĩkũtanĩthya Mwene Ũtonyi W'onthe?
Akwataa ũtandĩthyo mwaũ nũndũ wa ũlũngalu waku?
4Kwĩthĩwa wĩ na kĩkĩo nĩkw'o kũtumaa akũkany'a,
na kũituma akũsilĩla?
5Aiee, ekaa ũu nũndũ nũvĩtĩtye mũno,
nũndũ wa mothũku onthe ala ũtaekaa kwĩka.
6Wosaa syĩndũ sya andũ ma mũsyĩ waku nĩ kana makũĩve kĩla wamakovethya.
Nĩwosaa ngũa syoo makatiwa me athei.
7Ala me na mĩnoo ndwaamanenga kĩw'ũ manyw'e,
na nĩwavatie ala maĩ na nzaa lĩu.
8Nĩwatumie ũla wĩ ũtonyi osa nthĩ yonthe,
na waeka ũla wĩ ndaĩa atũe vo.
9Nĩwaleile kũtetheesya aka ndiwa,
na wooyĩa na kũthĩny'a syana ndiwa.
10Kwoou yu ũthyũlũlũkĩtwe nĩ mĩteo,
na nũkwatawa nĩ w'ĩa ũteũmanya.
11Kwĩna kĩvindu kingĩ ũkethĩa ndwene kĩndũ,
na ũvw'ĩkĩtwe nĩ kĩw'ũ kingĩ.
12Nũndũ Ngai ũtekalaa ĩtunĩ ĩũlũ?
Nũsiasya ndata syĩ ungu wake, o na vala syĩ ĩũlũ mũno!
13Naku wĩkũlya, ‘Ngai esĩ kyaũ?
Nũthw'ĩkĩtwe nĩ matu, atonya kũtũsilĩla ata?’
14Wĩsũanĩa kana Ngai nũthw'ĩkawa nĩ matu ala makamu ndakatwone,
ĩvindanĩ yĩla ũkũtembea esĩlĩte ĩũlũ wa yayaya.
15Nĩũkũlya, wĩendeea kwĩsĩla nzĩanĩ o ĩla ngũũ,
ĩla andũ ala athũku mesĩle?
16Nĩmavulilw'e ĩvinda yoo yĩte ĩviku,
wambĩlĩĩlyo woo nĩwakuiwe nĩ kĩw'ũ kingĩ.
17Maneenie na Ngai mamwĩa atĩĩ, ‘Ekana naitũ!’
Na o ta ũu makũlya, ‘Mwene Ũtonyi W'onthe atonya kũtwĩka ata?’
18Ĩndĩ nowe watumie methĩwa me athwii.
Nyie nditonya kũelewa nĩ mosũanĩo ma ala athũku.
19Andũ ala alũngalu nĩmatanaa moona Ngai aikany'a ala athũku.
Ala mate ĩvĩtyo nĩmathekaa na kũvũthĩĩsya ala athũku,
20mayasya atĩĩ, ‘Kwa w'o kyonthe kĩla andũ athũku methĩawa nakyo nĩkyanangawa,
na mwaki ũivĩvya kĩla kyatiala.’
21Yu ĩndĩ Yovu, ĩw'ana na Ngai,
na ũieka kũmwona ta mũmaitha waku.
Weeka ũu, Ngai akakũathima.
22Ĩtĩkĩla motao ala ũkũũnenga;
ĩkalya ndeto syake ngoonĩ yaku.
23Ethĩwa ũkeenyivya na ũisyokea Mwene Ũtonyi W'onthe,
na ũiekana na mothũku onthe ala mekĩkĩte mũsyĩnĩ waku,
24na ethĩwa ũkekya thaavu waku ĩtheka,
thaavu waku kuma Ovili ũsĩnĩ mũng'alu,
25na ĩngĩ ethĩwa Mwene Ũtonyi W'onthe akatw'ĩka thaavu waku,
na aitw'ĩka kwaku silĩva ũla mũseo vyũ,
26nĩvo ĩndĩ wĩtana nthĩnĩ wa Mwene Ũtonyi W'onthe,
na ũimanya kana nĩwe wumo wa ũtanu waku.
27Ũkamũvoyaa, nake akakũsũngĩaa,
naku ũyĩanĩĩsya mawĩvĩto maku.
28Maũndũ onthe ala wavanga makeanĩaw'a,
na kyeni kĩkakenaa nzĩanĩ syaku.
29Nũndũ Ngai nũvalũkasya ala mekathĩĩaa,
ĩndĩ nũtangĩĩaa ala menyivasya.
30Nũvonokasya ũla wĩ na ĩvĩtyo,
ĩĩ, akakũvonokya nũndũ wa meko maku maseo.”
Currently Selected:
Yovu 22: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
