Yovu 21
21
Ũsũngĩo wa Yovu
1Nĩvo ĩndĩ Yovu wasũngĩie asya atĩĩ,
2“Ĩthukĩĩsyei ndeto syakwa nesa,
ngiakisyei kwa kũmbĩthukĩĩsya.
3Ũmĩĩsyai nambe kũneena,
na namina kũneena nĩmũtonya kũendeea kũmbũthya.
4“Nyie ndiũnyungunyĩsya kũla kwĩ mũndũ,
nĩ na kĩtumi kĩseo kya kwĩthĩwa ndomĩĩsya.
5Nzisyei na mũisaanĩw'a,
nginya mũkunĩke makanyw'a menyu na moko.
6Nasũanĩa maũndũ ala mangwatĩte, nĩngũtelema;
mwĩĩ wakwa nũũthĩlĩa.
7Nĩkũlya, Ngai aekaa andũ athũku maendee kwĩkala thayũ nĩkĩ?
Aekaa makũe na kũendeea nesa nĩkĩ?
8Nĩmonaa syana syoo iyĩendeea nesa,
o na nĩmekalaa thayũ makona esũkũũe mayĩana.
9Mekalaa na mũuo nyũmbanĩ syoo mateũkĩa;
Ngai ndamakanasya.
10Kĩla ĩvinda moi yavingĩanĩw'a na nzaũ nĩsyaa,
ng'ombe syoo nga nisyaanaa ite kũvuna.
11Twana twoo tũithaũka nĩtũthaanyũkangaa ta tũtena twa malondu.
Nĩtũsũngaa,
12na kwina wathi ũkũnĩtwe ndambulĩnĩ na ngitaa nini,
na kũtanĩa wasya wa mũtũlilũ.
13Mĩthenya ya thayũ woo yĩthĩawa na moseo,
na mesaa kũkw'a me na mũuo.
14Andũ athũku meaa Ngai atĩĩ, ‘Ekana naitũ!
Tũikwenda kũmanya nzĩa syaku.
15Mwene Ũtonyi W'onthe nĩwe ũũ, nĩ kana tũmũthũkũme?
Na tũkwataa ũtandĩthyo mwaũ twamũvoya?’
16Maasya maendeeaa nesa kumana na vinya woo,
kwoou ndyĩtĩkĩla ũtao wa andũ asu athũku.
17Nĩkũlya, ve ĩvinda taa wa ala athũku waaĩsa kũvow'a?
Ve ũmwe woo waakwata thĩna mũnene?
Ngai aaĩsa kũkany'a ala athũku ũthatunĩ wake,
18na kũmaũlũkya ũndũ mavuti maũlũkaw'a nĩ kĩseve,
kana ũndũ kĩuutani kĩũlũkasya kĩtoo?
19Inyw'ĩ mwĩasya, ‘Ngai akaĩvanĩsya syana syoo nũndũ wa naĩ syoo.’
Aiee, Ngai nĩamakany'e nũndũ wa naĩ syoo, nĩ kana mo mamanye ũu.
20Eki ma naĩ nĩmakwate ũkany'o woo ene,
nĩmeyonee ene ũthatu wa Mwene Ũtonyi W'onthe.
21Thayũ woo wa kũũ ĩũlũ wa nthĩ wathela,
maitethasya andũ moo ala matiwa ĩtina.
22Ve mũndũ ũtonya kũmanyĩsya Ngai,
Ngai ũla ũsilĩlaa o na ala mekalaa ĩtunĩ?
23Andũ amwe nĩmakusaa mena vinya w'onthe,
me asũvĩĩku vyũ na me eanĩe,
24mĩĩ yoo yĩ na mauta,
na mavĩndĩ moo mausĩe mũthungo.
25Angĩ nĩmakusaa me na woo ngoonĩ,
mataaĩsa kwĩthĩwa na ĩvinda ya ũtanu.
26Ĩndĩ onthe makw'a mathikawa mũthanganĩ,
na onthe nĩmaĩsawa nĩ iinyũ.
27Nĩnĩsĩ mosũanĩo menyu,
na mĩvango yenyu ya kũmbĩka naĩ.
28Inyw'ĩ mũkũlasya, ‘Ĩĩva yu nyũmba ya ũla mũndũ wĩ nguma,
nyũmba ĩla ala andũ athũku mekalaa.’
29No mwaakũlya aendi ma kyalo?
No mwaaĩthukĩĩsya ũndũ maisye,
30kana mũndũ mũthũku nũsũvĩawa ĩvindanĩ ya wanangĩko,
nũvonokaw'a ĩvindanĩ ya ũthatu?
31Vai mũndũ ũsikataa ũla mũthũku,
kana kũmũĩvanĩsya maũndũ ala wĩkĩte.
32Mũndũ mũthũku nũtwaawa mbũanĩ,
na mbũa yake ĩisungwa.
33Andũ aingĩ nĩmaendaa mathikonĩ make,
na mũthanga ndũmũtumbĩĩaa mũno.
34Kwoou mũtonya ata kũngiakisya na ndeto sya mana?
Vai ũndũ ũngĩ ũtiele kuma mosũngĩonĩ menyu ate o ũvũngũ.”
Currently Selected:
Yovu 21: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
