Yovu 20
20
Nzovali Aineena ĩvinda ya Kelĩ
1Nĩvo ĩndĩ Nzovali kuma Naamathi wasũngĩie asya atĩĩ,
2“Mosũanĩo makwa nĩmeũtuma nenda ũkũsũngĩa,
nũndũ nĩngũthĩnĩka mũno.
3Ndeto ila waneena nĩ sya kũumana,
ĩndĩ nũndũ nĩ na ũmanyi nĩngũũsũngĩa.
4“Kwa w'o we nĩwĩsĩ kana kuma tene,
kuma tene yĩla Ngai woombie mũndũ,
5ũtanu wa mũndũ mũthũku ndwĩkalaa ĩvinda ĩasa,
na ũtanu wa mũndũ ũla ũtamwĩsĩ Ngai wĩthĩawa o kwa kavinda.
6O na ethĩwa nguma yake yambataa nginya matunĩ,
na mũtwe wake ũvikĩte mathweonĩ,
7mũndũ ũsu akaa tene na tene ta kĩtoo kĩla kĩũlũkaw'a nĩ kĩseve;
andũ ala mamwĩsĩ makakũlasya, ‘We aĩva?’
8Akaa ta ndoto, atakoneka ĩngĩ;
akaa ta woni ũla wonekaa ũtukũ.
9Andũ ala mamwonie maikamwona ĩngĩ;
mũsyĩ wake ndũkamwona ĩngĩ.
10Syana syake ikamantha ũseo kuma kwa ngya,
na ikatũnga ũthwii wake ũla wooyie kuma kwa ngya.
11Mwĩĩ wake, ũla ĩvindanĩ yĩmwe wausũĩtwe nĩ vinya wa ũika,
ũkakoma kĩtoonĩ.
12Kanyw'anĩ wake ũthũku wĩ mũyo,
aũvithaa ungu wa ũĩmĩ wake.
13Ndendaa kũekana naw'o o na vanini,
ĩndĩ awĩkalasya kanyw'anĩ wake.
14Ĩndĩ ĩvunĩ yake lĩu wake nũmeasya wũũ,
ũmeasya wũũ ta sumu.
15Mũndũ mũthũku akatavĩka ũthwii ũla wooyie,
Ngai nũtumaa aũtavĩka kuma ĩvunĩ yake.
16Kĩla mũndũ mũthũku ũmelasya nĩ ta sumu,
kĩtumaa akw'a ta ũũmĩtwe nĩ nzoka ya kĩko.
17Ndakatanĩa mbũsĩ,
tũlũsĩ tusĩe ũkĩ wa nzũkĩ na mauta ma ĩia.
18No nginya atũnge syĩndũ ila ũthũkũmĩte akakwata atanamba kũitũmĩa;
ndakatanĩa ũsyao ũla ũkwatĩte kumana na kũtandĩthya kwake.
19Nũndũ nũthĩnĩtye ngya na akaitia ite na kĩndũ;
mũndũ ũsu nĩwosete nyũmba ila ũtaaka.
20Nũndũ ĩtomo yake yĩithelaa,
ndatonya kũeka kĩndũ o na kĩva kĩtiale.
21Vai kĩndũ kĩtialaa amina kũya lĩu,
kwoou ũtanu wake ũkathela.
22Yĩla wĩĩthĩwa e na kĩla kĩndũ, akakwatwa nĩ thĩna,
akaũmĩw'a vyũ nĩ thĩna.
23Aendee kũvũnĩthya ĩvu yake,
Ngai akamũkany'a athatĩte mũno,
na kũmũtulũĩla ũthatu wĩthĩwe lĩu wake.
24O na vala nũsembaa akĩĩte mũio wa kaũ wa kyũma,
ĩangi yĩna mũthya wa kyũma kya mbulonzi nĩyĩmũtonyaa mũkuthũ.
25Nũyĩkũaa kuma mũongonĩ wake,
nũyĩkũaa kuma ĩtemanĩ yake mũthya wayo ũtisatisĩte,
na w'ĩa mwingĩ nũkwataa ngoo yake.
26Ũthwii wake ũkaanangĩka vyũ;
mwaki ũla ũtaakwatw'a nĩ mũndũ ũkamũmina;
ũkamina kĩla kĩtialĩte nyũmba kwake.
27Ĩtu yĩkaumĩlya mavĩtyo make ũtheinĩ,
na nthĩ ĩkakũsĩĩa mavĩtyo make.
28Ũthwii wake w'onthe ũkaanangwa,
ũkakuwa mũthenyanĩ wa ũthatu mũnene wa Ngai.
29Kĩu nĩkyo Ngai ũnengae mũndũ mũthũku,
nĩw'o ũtiĩwa ũla Ngai ũmũtw'ĩĩe.”
Currently Selected:
Yovu 20: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
