Yovu 19
19
Ũsũngĩo wa Yovu
1Nĩvo ĩndĩ Yovu wasũngĩie asya atĩĩ,
2“Mwĩendeea kũnthĩny'a,
na kũndilanga ilungu na ndeto syenyu nginya ĩndĩĩ?
3Nĩmũnumangĩte mavinda maingĩ;
inyw'ĩ mũikwĩw'a nthoni mũimbĩka naĩ?
4O na ethĩwa nĩ w'o nĩmbĩtĩtye,
ĩvĩtyo yakwa yĩngonetye nyie mwene.
5Mwĩsũanĩa kana ninyw'ĩ aseo kũte nyie,
na mwĩona mathĩna makwa ta wonany'o wa ĩvĩtyo yakwa.
6Ĩndĩ manyai kana nĩ Ngai ũmbĩkĩte naĩ,
na akandea na kĩtei kyake.
7O na vala nĩnĩkayĩte ngasya, ‘Nĩnĩkĩtwe naĩ!’ Ndisũngĩawa.
Nĩnĩtanĩte na wasya mũnene, ĩndĩ vai sila wa katĩ.
8Ngai nũvingĩte nzĩa syakwa syonthe ũkethĩa nditonya kũvĩta;
nũvw'ĩkĩte nzĩa syakwa na kĩvindu.
9Ngai nũmbenete ndaĩa yakwa yonthe,
na nĩwanangĩte nguma yakwa.
10Nũndembũangĩte ngalĩko syonthe nginya ngathela;
nũkũĩte wĩkwatyo wakwa ta mũtĩ.
11Ũthatu wake wĩ ĩũlũ wakwa,
ambonaa ta nĩ ũmwe wa amaitha make.
12Nguthu syake sya asikalĩ ma kaũ syũkaa syĩ vamwe,
nĩsyĩyũmbanĩtye nĩ kana imbithũkĩe;
nĩsyambĩte maeema masyo kwĩlingĩla nyũmba yakwa.
13Ngai nũtumĩte ana-a-asa makwa mandia,
andũ ala nĩsĩ nĩmandiĩte vyũ.
14Andũ makwa ma mũsyĩ nĩmaendete kũasa,
anyanyawa nĩmolĩtwe ninyie.
15Aeni ala mookaa mũsyĩ kwakwa nĩmolĩtwe ninyie;
athũkũmi makwa ma aka mambosaa ta nĩ mũndũ matesĩ.
Mambonaa ta nĩ mũeni
16Nĩtaa mũthũkũmi wakwa ĩndĩ ailea kwĩtĩka,
o na namwĩsũva andetheesye.
17Kĩveti kyakwa kĩitonya kũmĩĩsya mũuke wa mĩthũmũ yakwa;
nĩtw'ĩkĩte kĩndũ kĩte kya kwendeesya kwa ana ma mwaitũ.
18O na twana tũla tũnini nĩtũmbũthasya,
yĩla naumĩla, nĩtũnthekeeaa.
19“Anyanyawa ala twĩsene mũno nĩmandeaa,
ala nendete mũno nĩmandekete.
20Mwĩĩ wakwa ũtialĩte mavĩndĩ na kĩkonde,
na ndialĩtye vanini nĩkw'e.
21Mbĩw'ĩei tei inyw'ĩ anyanyawa, mbĩw'ĩei tei,
nũndũ Ngai nũngũnĩte.
22Inyw'ĩ mũnthĩnĩtye o ũndũ Ngai ũnthĩnĩtye nĩkĩ?
Mũinesa kwĩanĩwa nĩ thĩna ũla mũnengete?
23“Mwa kethĩwa ndeto syakwa niandĩkwa!
Mwa kethĩwa niandĩkwa ĩvukunĩ!
24Mwa kethĩwa niandĩkwa ĩvianĩ kwa kũtemeleelwa na kĩandĩki kya kyũma,
nĩ kana iikaavutĩke tene na tene.
25Nũndũ nyie nĩnĩsĩ kana Mwovosya wakwa e thayũ,
na kana mũminũkĩlyonĩ akaũngama ĩũlũ wa nthĩ andetee.
26O na ĩtina wa kĩkonde kyakwa kwanangĩka,
ngamwona Ngai nĩ na mwĩĩ ũũ.#19.26 nĩ na mwĩĩ ũũ: Kana ndena mwĩĩ ũũ
27Nyie mwene ngamwona,
nyie mwene, na ti mũndũ ũngĩ.
Ngoo yakwa yeteelete ũu na mea maingĩ!
Yovu Aikany'a Anyanyae Make
28Ethĩwa inyw'ĩ mwĩkũlya,
‘Tũtonya kwĩka ata tũkatuma athĩna mũno?’
Na ethĩwa mwĩasya, ‘Thĩna wake wumanĩte nake mwene,’
29inyw'ĩ ene nĩmwaĩlĩte kũkĩa ũkany'o,
kĩmena kyenyu kĩkatuma mũkanw'a,
na nĩvo mwĩmanya kana ve ũmwe ũla ũsilĩlaa.”
Currently Selected:
Yovu 19: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
