Yovu 18
18
Ũneeni wa Mbilitati
1Nĩvo ĩndĩ Mbilitati kuma nthĩ ya Sui, wasũngĩie kwa kũkũlya atĩĩ,
2“Wĩneena nginya ĩndĩĩ?
Neena maũndũ ũsũanĩĩte nesa, naitũ nĩtũũneena.
3We wĩtũtw'ĩkĩthya ng'ombe nĩkĩ?
Wĩona twĩ atumanu nĩkĩ?
4We wĩĩka kwĩyĩũmĩsya na ũthatu waku.
Wĩona nthĩ ta ĩtonya kũtiwa yĩ nthei nũndũ waku?
Wĩona iĩma ta ithamw'a nĩ kana wĩanĩwe?
5 #
Yovu 21.17
Kyeni kya mũndũ mũthũku kĩkavow'a;
ũmũĩ wa mwaki wake ndũkakena ĩngĩ.
6Kyeni kĩla kĩ nyũmbanĩ yake kĩkatw'ĩka kĩvindu;
taa ũla wĩ vakuvĩ nake ũkavoa.
7Vinya wa matambya make ũkaolwa;
mĩvango yake mwene nĩmũvalũkasya.
8Maũũ make nĩmamũlikasya kĩteinĩ,
nĩmamũlikasya ĩimanĩ.
9Kĩtei nĩkĩmũkwatĩlasya kĩtiinyonĩ,
mũteo ũmũkwataa ũkamũlũmya.
10Mũndũ ũsu nũvithĩwe kĩtei kya ĩkanda nthĩ,
nĩwiĩwe mũteo nzĩanĩ yake.
11Motĩsyo maingĩ nĩmamũtelemasya kuma kĩla ngalĩko,
nĩmamũatĩĩaa kĩla vandũ.
12Vinya wake nũminĩtwe nĩ nzaa;#18.12 Vinya wake nũminĩtwe nĩ nzaa: Kana thĩna mũnene nũũmwĩw'ĩthya ĩtomo.
thĩna mũnene nũmweteele avalũka.
13Ũwau mũthũku nũĩsaa kĩkonde kyake,
ũwau wũaa nũĩsaa mamutha make.
14Nĩwumaw'a ũsũvĩonĩ wa nyũmba yake,
na aitwawa na vinya vala ve mũsumbĩ wa motĩsyo.
15Vai kĩndũ kĩtialĩte nyũmbanĩ yake,
lavuti nũnyaĩĩkĩw'e vala wĩkalaa.
16Ethĩawa ta mũtĩ ũla wũmaa kuma mĩinĩ,
nginya ĩũlũ mbongenĩ.
17Ĩũlũ wa nthĩ vai mũndũ ũkamũlilikana,
ĩsyĩtwa yake yĩikawetwa ĩngĩ andũnĩ.
18Mũndũ ũsu nũsembethaw'a kuma nthĩ ya ala me thayũ,
nũvetawa kuma kyeninĩ akatwawa kĩvindunĩ.
19Ndethĩawa na syana kana nzũkũlũ katĩ wa andũ make,
na vala wekalaa vai mũndũ ũtialaa.
20Andũ ma ũthũĩlonĩ wa syũa nĩmasaanĩaw'a nĩ kĩla kĩmũkwatĩte,
andũ ma wumĩlonĩ wa syũa nĩmakwatawa nĩ w'ĩa mwingĩ.
21Kwa w'o asu nĩmo maũndũ ala makwataa mũndũ ũla ũtakĩaa Ngai,
maũndũ asu nĩmo makwataa mũndũ ũla ũtamwĩsĩ Ngai.”
Currently Selected:
Yovu 18: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
