Yovu 16
16
Ũsũngĩo wa Yovu
1Nĩvo ĩndĩ Yovu wasũngĩie asya atĩĩ,
2“Nĩnĩw'ĩte maũndũ maingĩ ta asu;
inyw'onthe mwĩ akiakisya ma kũthĩny'a!
3Ũneeni wenyu wa mana ũkathela ĩndĩĩ?
Kana nĩ kyaũ kĩla kĩũtuma mwenda kũendeea kũneena?
4Kethĩwa inyw'ĩ nĩmũtw'ĩka nyie, nakwa ngĩtw'ĩka inyw'ĩ,
nĩthĩwa ngĩneena o tenyu;
nĩthĩwa nĩtonya kũseũvya ndeto sya kũmũneenea,
na kũmũthingithĩsya mũtwe wakwa.
5Nĩthĩwa nĩmwĩkĩa vinya na ũtao wakwa,
na ũkiakisyo wakwa wĩthĩwa ũmũvetea kyalya kyenyu.
6Ĩndĩ o na naneena kyalya kyakwa kĩiũthela,
na nalea kũneena kyalya kyakwa kĩikwĩveta.
7Kwa w'o Ngai nũminĩte vinya wakwa,
na akananga mũsyĩ wakwa w'onthe.
8Nũmbovete ngalũma, na ũsu ũkatw'ĩka ũkũsĩ,
ndialĩte kĩkonde na mavĩndĩ, na andũ matw'ĩte ũsu ta w'o ũkũsĩ wa ĩvĩtyo yakwa.
9Ngai nũndembũangĩte e na woo na akamena;
ambevetanĩsye maeo make nĩ kĩmena;
mũmaitha wakwa nũngũnũĩaa metho make e na woo.
10Andũ nĩmanthaũkĩaa na kũnthekeea,
nĩmanthyũlũlũkĩte na mengũna matau me na kĩvũthya.
11Ngai nũnenganĩte mokonĩ ma andũ me ngũlũ,
na nũmbĩkĩtye mokonĩ ma andũ athũku.
12Nĩnekalaa na mũuo, ĩndĩ we andũlanga;
nũngwatĩte ngingo na kũmbatũanga ilungu.
Nũndw'ĩkĩthĩtye ũvano wake wa kũatha;
13nũngathĩte na maangi kuma ngalĩko syonthe,
nũmbũthũĩte mbio ate na tei,
nĩwĩtĩte nyongo yakwa nthĩ.
14Nũnũmĩĩtye mavinda maingĩ,
na anzembeaa ta mũsikalĩ wa kaũ.
15Nĩnĩkĩĩte ngũa ngaamu sya makunia,
na ngekala nthĩ mũthanganĩ nĩ mũsinde.
16Ũthyũ wakwa nũtukĩte nũndũ wa kũĩa,
na metho makwa nĩ maimbu na nĩmatune.
17Ĩndĩ ũu wĩ o vo, ndyaathĩny'a mũndũ na moko makwa,
na mboya syakwa vala ve Ngai nĩ ntheu.
18Nĩilyĩ ta mũndũ mũae;
vaikethĩwe mũndũ o na ũmwe ũvitha ĩvĩtyo yĩĩ.
19 #
Yovu 19.25
O na yu ngũsĩ yakwa yĩ ĩtunĩ,
ũla ũndeteaa ekalaa ĩũlũ.
20Anyanyawa nĩmambũthasya;
nĩtĩkasya methoi ngĩvoya Ngai.
21Mwa kethĩwa ve o mũndũ ũmbĩsũvanĩa vala ve Ngai,
o ũndũ mũndũ wĩsũvanaa kwondũ wa mũnyanyae!
22Nyie ndialĩtye myaka mĩnini,
na ĩndĩ ngĩthi kyalo ndakasyoka.”
Currently Selected:
Yovu 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
