Yovu 15
15
Yovu na Anyanyae Maineenany'a Ĩvinda ya Kelĩ
15.1—21.34
Ũneeni wa Kelĩ wa Elivasi
1Nĩvo ĩndĩ Elivasi, kuma ndũanĩ ya Temani wasũngĩie kwa kũkũlya atĩĩ,
2“Mũndũ mũĩ nũsũngĩaa na ndeto sya mana,
kana kusũwa nĩ ndeto ite vata?
3Mũndũ mũĩ nĩwĩteteaa na ndeto itaĩlĩte,
kana kwĩtetea na ũneeni ũtauna?
4Ĩndĩ we Yovu nũũtuma andũ methĩwa mate na kĩkĩo kya Ngai;
na nũũtuma andũ maeka kwĩyumya kũla kwĩ Ngai.
5Ũneeni waku nĩw'o ũkwonany'a ũthũku waku,
naku ũnyuvaa kũneena ta akengani.
6Ndeto syaku mwene nĩsyo iũkũsilĩla ti inyie,
ũneeni waku nĩw'o ũũkũsilĩla.
7“Wĩsũanĩa nue mũndũ wa mbee kũsyawa?
Wasyaiwe iĩma itanamba kwĩthĩwa vo?
8We waĩ nzamanĩ ya Ngai?
Kana nue mũĩ wĩ weka?
9Wĩsĩ ũndũ mwaũ ũla ithyĩ tũtesĩ?
Ũeleawa nĩ ũndũ mwaũ ũla ithyĩ tũtaeleawa?
10Katĩ waitũ ve atumĩa akũũ oĩ,
me na ũkũũ mbee wa ĩthe waku.
11Mokiakisyo ala Ngai ũkũnengae ko manini mũno?
Kana ndeto yake ya ũuu kwaku ti kĩndũ?
12Ngoo yaku yĩkũtongoesya kũthata nĩkĩ,
na wĩvenaveny'a na ngathĩĩo nĩkĩ,
13nginya ũkathatĩa Ngai,
na kũneena ndeto ithũkĩte ta isu?
14 #
Yovu 25.4-6
Ve mũndũ ũtonya kwĩthĩwa e mũtheu?
Ũla ũsyaĩtwe nĩ mũndũ mũka nũtonya kwĩthĩwa e mũlũngalu?
15Ethĩwa Ngai ndaĩkĩĩaa o na alaĩka make,
na ethĩwa kwake o na matu ti matheu,
16nĩ vinya mũno kũĩkĩĩa mũndũ,
ũla nĩ mũvuku na wĩkaa maũndũ mathũku;
ũla wĩ na waũni wa kwĩka mothũku ta waũni wa kĩw'ũ.
17“Mbĩthukĩĩsye yu, nakwa nĩngũkwony'a,
nĩngũũtavya maũndũ ala nonete,
18maũndũ ala mamanyĩĩtw'e nĩ andũ oĩ,
maũndũ ala aaũmae moo mataavitha,
19aaũmae ala no mo me oka,
Ngai wanengie nthĩ ĩsu, yĩla vataĩ mũeni wavĩtĩlaa katĩ woo.
20Mũndũ mũthũku athĩnaa mĩthenya yonthe ya thayũ wake,
mũndũ ũte tei athĩnaa myaka yonthe ĩla ũnengetwe.
21Mawasya ma kũtelemya mausũaa matũnĩ make,
yĩla ũkwona ta ũendee nesa,
nĩw'o ing'ei imũvithũkĩaa.
22Mũndũ mũthũku ndethĩawa na wĩkwatyo wa kuma kĩvindunĩ;
athĩĩwe kũawa na ũvyũ.
23Nĩwangangaa aimantha lĩu aikũlya, ‘Lĩu ũĩva?’
Mũndũ ũsu nĩwĩsĩ kana mũthenya wa kĩvindu nĩ mũthengeeu.
24Thĩna na woo, nimũtelemasya,
imũsindaa o tondũ mũsumbĩ wĩyũmbanĩtye kũthi kaũnĩ ũsindaa.
25Maũndũ asu mekĩkaa nũndũ mũndũ ũsu nũkũnzĩe Ngai ngundi;
nĩwĩkathĩĩe vala ve Mwene Ũtonyi W'onthe.
26Nũminĩte kũsemba na mĩng'athĩlĩĩlyo avithũkĩe Ngai,
nũminĩte kũsemba e na ngao nũmu.
27O na vala ũthyũ wake nĩ mũnou mũno,
na kĩnyunyu kyake kyusĩe mauta,
28akatũa ndũanĩ ila syatiiwe syĩ nthei,
nyũmbanĩ ila itekalawa nĩ mũndũ,
nyũmba ila syavangiwe syĩthĩwe ivumbu sya myako myanangĩku.
29Mũndũ ũsu ndakethĩwa e mũthwii o na ĩndĩĩ,
na syĩndũ syake iikekala ĩũlũ wa nthĩ,
o na ũthwii wake ndũkanyaĩĩka ĩũlũ wa nthĩ.
30Vate ndĩi ndakalea kũkw'a.
Akeethĩwa ailyĩ mũtĩ ũla nthongoo syaw'o ivĩvĩtw'e nĩ mwaki,
na mĩthũmũ ya Ngai ĩkamũũlũkya athi vaasa.
31Nĩ aeke kwĩkenga kwa kwĩkwatya syĩndũ ite vata,
nũndũ vai kĩndũ ũkakwata ta ĩtuvi yake.
32Ailyĩ ta ũvonge ũla ũvovaa ĩvinda yaw'o yĩtanavika,
na ndwĩsaa kũthongooa ĩngĩ.
33Akeethĩwa ailyĩ ta mũsavivũ,
ũla wĩtĩkasya nzavivũ mbĩthĩ,
ta mũthata ũla wĩtĩkasya malaa maw'o.
34Onthe ala matakĩaa Ngai maikethĩwa na syana,
na mwaki ũkaananga mĩsyĩ ya andũ ala mosaa ĩtuvi ya wendeesyo.
35Nĩmaitavaa ũseleke na maisyaa ũthũku,
na ngoo syoo iseũvasya ũkengani.”
Currently Selected:
Yovu 15: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
