Yovu 14
14
1“Mũndũ ũla ũsyaĩtwe nĩ mũndũ mũka,
matukũ make nĩ manini na mausũĩtwe nĩ thĩna.
2Nĩwĩanaa ta ĩlaa na ayũma;
o ta kyuu kĩla kĩvĩtaa, we ndekalaa.
3Ame Ngai, nĩkĩ ũsiasya mũndũ ta ũsu,
na ũyambĩĩa kũsila nake?
4Nũũ ũla ũtonya kumya kĩndũ kĩtheu kuma kĩndũnĩ kĩte kĩtheu?
Vai mũndũ ũtonya!
5Mĩthenya ya mũndũ nĩ mĩtale;
we Ngai nũminĩte kũvanga ũtalo wa myei yake,
naku nũmwĩkĩĩe mĩvaka ũtatonya kũkĩla.
6Kwondũ wa ũu sisya ũtee na ũiekana nake,
nĩ kana atanĩe mĩthenya yake o ta mũndũ mũandĩke.
7Ve wĩkwatyo kwa mũtĩ ũla ũminĩte kũtemwa;
mũtĩ ũsu nũtonya kwĩthĩwa thayũ ĩngĩ na kũthongooa.
8O na vala mĩi ya mũtĩ ũsu nĩtonya kũkũa,
na kĩthukĩ kyaw'o kĩyũmĩa mũthanganĩ,
9mũtĩ ũsu weew'a mũuke wa kĩw'ũ nũthongooaa,
nĩwumasya nthongoo ta mũtĩ mwĩũ.
10Ĩndĩ Mũndũ nũkusaa, na ũsu nĩw'o mũthya wake;
mũndũ nũvevaa ĩvinda ya mũthya, na ayĩthĩwa atevo ĩngĩ.
11“O ũndũ kĩw'ũ kĩng'alaa ũkanganĩ,
kana o ũndũ kĩw'ũ kĩolekaa ũsĩnĩ na ũsĩ ũing'ala,
12now'o andũ makomaa nthĩ na mailea kũkĩla ĩngĩ;
andũ maikokĩla nginya yĩla matu makathela,
kana kũamũkw'a kuma toonĩ woo.
13“Mwa kavaa kethĩwa nũmbitha mbũanĩ,
na ũimbw'ĩkĩĩa nginya ũthatu waku ũthele!
Mwa kethĩwa no ũmbangĩe ĩvinda na kũndilikana!
14Nĩkũlya, andũ mamina kũkw'a nĩmatonya kwĩthĩwa thayũ ĩngĩ?
Kethĩwa ũu nĩwĩthĩawa, mĩthenya yonthe ya thĩna wakwa,
nĩkala neteelete na wĩkwatyo ĩvinda yĩla ngathaw'a.
15Nĩvo ĩndĩ wĩthĩwa ũtonya kwĩtana, nakwa ngĩkwĩtĩka;
nĩvo ũtonya kwĩthĩwa na mea na kyũmbe kĩla woombie na moko maku.
16Wĩthĩwa ũisyaĩĩsya kĩla ĩtambya ndambasya,
ĩndĩ ndwĩthĩwa ũiatĩĩa naĩ yakwa.
17Mavĩtyo makwa methĩwa mavingĩwa mũvukonĩ;
naku wĩthĩwa ũvw'ĩka ũthũku wakwa.
18“Ĩndĩ o tondũ iĩma iombokaa na kũvalũka,
na mavia manene maikũka kuma vala mekalaa,
19na o tondũ kĩw'ũ kĩĩsaa mavia,
na mbua mbingĩ ĩikua mũthanga,
ũu now'o naku wanangaa wĩkwatyo wa mũndũ.
20Ngai nũvalũkasya mũndũ,
nake mũndũ ũsu ayaa tene na tene;
nũalyũlaa ũthyũ wa mũndũ na ũimwĩkya ĩtheka.
21Syana syake syatw'ĩka andũ me ndaĩa,
mũndũ ndamanyaa;
syavenwa ndaĩa,
mũndũ ndonaa ũu.
22Mũndũ ew'aa kyalya kya mwĩĩ wake mwene,
na eyĩw'ĩaa kyeva we mwene.”
Currently Selected:
Yovu 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
