Yovu 12
12
Ũsũngĩo wa Yovu
1Nĩvo ĩndĩ Yovu wasũngĩie asya atĩĩ,
2“Vate nzika ninyw'ĩ wasya wa andũ,
ũĩ ũkakw'a vamwe nenyu.
3Ĩndĩ o nakwa nĩ na ũĩ wĩanene na ũla mwĩ naw'o;
nyie ndi mũnini kĩlĩkonĩ kwĩ inyw'ĩ ũndũnĩ o na wĩva.
Ũla ũtesĩ maũndũ asu onthe mwaneena nũũ?
4Ndw'ĩkĩte kĩndũ kya kũthekeewa nĩ anyanyawa;
nyie ũla navoyaa Ngai akanzũngĩa,
o na vala nĩ mũlũngalu na nditũlwa mũtĩ nĩ mũndũ;
ndw'ĩkĩte kĩndũ kya kũthekeewa.
5Andũ ala mate na mathĩna,
nĩmavũthĩĩasya maũndũ mathũku ala mekĩkaa;
maũndũ ta ala makwataa mũndũ ũla ũtiũũkaa.
6Ĩndĩ ing'ei na ala matamwĩsĩ Ngai mekalaa na mũuo,
o na vala vinya woo nĩw'o ngai yoo.
7“Ĩndĩ we kũlya nyamũ, nasyo niũkũmanyĩsya;
kũlya nyũnyi sya yayaya, nasyo niũkũtavya;
8kũlya nthĩ, nayo nĩkũũmanyĩsya,
kana ũkũlye makũyũ ma ũkanganĩ nĩ kana makũtavye.
9Nĩ kĩva katĩ wa syĩndũ isu kĩla kĩtesĩ,
kana nĩ kw'oko kwa Mwĩai Ngai kwĩkĩte ũu?
10Thayũ wa syũmbe syonthe,
na mĩthũmũ ya andũ onthe yĩ ũtonyinĩ wake.
11Nĩkũlya, kũtũ nĩkũvathũkanasya ndeto,
o ũndũ ũĩmĩ ũsamaa lĩu?
12Ũĩ wĩ andũnĩ ala akũũ,
na ũmanyi wĩ andũnĩ ala mekalĩte mĩthenya mingĩ.
13Ũĩ na ũtonyi nĩ sya Ngai;
ũtao na ũmanyi nĩ syake.
14Ngai aomboa vai ũtonya kwaka;
oova mũndũ vai ũtonya kũmũthasya.
15Asiĩĩa mbua, nĩkũkaa mũnyao;
Aeka kue, nthĩ nĩyusũaa kĩw'ũ.
16“Vinya na ũsindi nĩ syake;
ũla ũkengawa na ũla ũkenganaa nĩ make.
17Nũekaa ala manenganae ũtao makathi mate ngũa;
na kũtuma atongoi meka ta andũ atumanu.
18Nũvenaa asumbĩ ũsumbĩ woo,
na aimatw'ĩkĩthya ovwa.
19Nũekaa athembi makathi mate ngũa,
na nũsindaa ala me na vinya.
20Nũvindĩthasya atai ala aĩkĩĩe,
na kũveta ũĩ wa atumĩa.
21Nĩwĩkĩĩthasya nthoni ala me ũtonyi,
na ala me vinya nũmavenaa mĩio ya kaũ.
22Nũvuanasya maũndũ maliku makoka kyeninĩ,
na nũtumaa kĩvindu kĩkamu kĩtw'ĩka kyeni.
23Nũtumaa mbaĩ ineneva na nũsyanangaa;
nũtumaa mbaĩ syĩthĩwa na vinya na nĩwivalaanasya.
24Nũvetaa ũmanyi atongoinĩ ma andũ ma nthĩ;
na nũtumaa maenda mangangĩte weũnĩ ũte nzĩa.
25Nũtumaa maenda mavavatĩte kĩvindunĩ ta ilalinda;
na nũtumaa maenda malũĩte ta athengi.”
Currently Selected:
Yovu 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
