Yovu 11
11
Ũneeni wa Nzovali
1Nĩvo ĩndĩ Nzovali kuma nthĩ ya Naamathi wasũngĩie akũlya atĩĩ,
2“Ndeto isu syonthe niũlea kũsũngĩwa?
Mũndũ ũyũ ũneenete ndeto singĩvĩte ũu atonya ata kũtalĩlwa ũlũngalu?
3Wĩsũanĩa ũneeni waku wa mana nũũtuma andũ makilya?
Mũndũ ũla ũvũthasya akalea kũkanw'a?
4Ũneenaa ũkasya, ‘Kĩla ngũneena nĩ kyaw'o,
na ndi na ĩvĩtyo mbee wa Ngai.’
5Nenda kethĩwa Ngai nũneena naku,
akaneena naku akũsũngĩe.
6Ngai no akũtavye syĩmbithĩ sya ũĩ,
nĩkwĩthĩwa e ũĩ mwingĩ.
Manya kana Ngai ndaatala mavĩtyo maku onthe.
7“Kwa w'o we nũtonya kũmanya syĩmbithĩ sya Ngai?
We nũtonya kũmanya ũndũ ũnene wa Mwene Ũtonyi W'onthe wĩana?
8Wĩ ĩũlũ mbee wa matu.
We ũtonya kwĩka ata!
Nĩ mũliku mbee wa ũliku wa vala maveva ma ala akw'ũ mekalaa.
We ũtonya kũmanya kyaũ?
9Kĩthimo kyaw'o nĩ kĩasa mbee wa nthĩ,
nĩkĩthanthau mbee wa ũkanga.
10“Ethĩwa Ngai akakwata mũndũ amwove yela na kũmũtwaa kĩsilĩlonĩ,
nũũ ũtonya kũmũsiĩĩa?
11Kwa w'o Ngai nũmanyaa andũ ala me ũvũngũ,
na yĩla woona ũndũ ũthũku ndolawa nĩ andũ ala mawĩka.
12Mũndũ mũtumanu ndatonya kũĩva,
o tondũ ĩng'oi ya kĩthekanĩ yĩtasyaawa yĩ ĩvundĩsye.
13“Ĩndĩ wamũnenga Ngai ngoo yaku,
na kũmũtambũũkĩsya moko maku,
14ethĩwa ũkaeka kwĩka naĩ,
na kũlea ũthũku ũyĩthĩwa mũsyĩ kwaku,
15ũkeethĩwa ũte na nthoni;
ũkaũngama na ũlũmu ũte na w'ĩa.
16Ũkoolwa nĩ mathĩna maku;
ũkamalilikanaa o ta kĩw'ũ kyavĩtie.
17Thayũ waku ũkatisatisaa mbee wa syũa saa sita,
kĩvindu kya thayũ waku kĩkatw'ĩka kyeni kya kwakya.
18Ũkeethĩawa na ũkũmbaũ nũndũ ve wĩkwatyo;
Ngai akakũsũvĩa na ũkũnenga ũthũmũo.
19Ũkakomaa na vai mũndũ ũkakũtelemya;
andũ aingĩ makavoyaa ũtethyo kwaku.
20Ĩndĩ andũ athũku makaeka kwona;
makaaĩwa nĩ nzĩa ya kũkĩa nayo.
Wĩkwatyo woo wa mũthya nĩ kũkw'a.”
Currently Selected:
Yovu 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
