Yel 9
9
1Nenda kethĩwa mũtwe wakwa nũtw'ĩka kĩthima kya kĩw'ũ,
namo metho makwa maitw'ĩka nthongo sya methoi,
nĩ kana nĩĩe ũtukũ na mũthenya,
nĩmaĩĩe andũ makwa ala moaĩtwe.
2Nenda kethĩwa nĩ na kasũmba weũnĩ,
ta kala andũ makomelaa maendete kyalo,
nĩ kana nĩtie andũ makwa,
na ngĩthi kwĩkala vaasa namo!
Nũndũ onthe nĩ ilaalai,
nguthu ya andũ mate aĩkĩĩku.
3Nyie Mwĩai Ngai nĩasya atĩĩ,
“O tondũ ũta ũkootawa,
now'o makootaa nĩmĩ syoo maneene ũvũngũ;
ũvũngũ nĩw'o wongelekete nthĩ yoo mbee wa ũw'o.
Maendeeaa kuma ũthũkunĩ ũmwe kũthi ũla ũngĩ,
na maimbĩsĩ nyie Mwĩai Ngai.
4Kĩla mũndũ nĩamwĩsũvĩe mũtũi wake,
na ndakamũĩkĩĩe mwana-a-ĩthe o na wĩva;
nũndũ kĩla mũndũ amũkengaa mwana-a-ĩthe,
na kĩla mũndũ aendaa aineenea mũtũi wake maũndũ ma ũvũngũ.
5Kĩla mũndũ amũkengaa mũtũi wake,
na vai mũndũ ũneenaa ũla w'o.
Nĩmamanyĩisye nĩmĩ syoo kũneena ũvũngũ,
nĩmekaa naĩ na mayĩsaa kumbũla.
6Maendeeaa kũthĩny'a andũ mbee na mbee,
na kũmakenga mbee na mbee;
nĩmaleete kũmanya nyie Mwĩai Ngai.”
7Kwoou Mwĩai Ngai Mwene Ũtonyi W'onthe easya atĩĩ,
“Ngamathesya na kũmatata ũndũ silĩva ũtatawa na mwaki?
Nĩ ũndũ ũngĩ mwaũ naĩlĩte kwĩka nũndũ wa andũ makwa?
8Nĩmĩ syoo nĩ ta maangi ala maathaa na kũaa,
nũndũ maneenaa ũvũngũ.
Kĩla mũndũ aneenaa nesa na mũtũi wake,
ĩndĩ ngoonĩ yake avangaa kũmwoveesya.
9Yu nyie Mwĩai Ngai ngalea kũmakany'a nũndũ wa maũndũ aa?
Ngalea kwĩyĩĩvanĩsya kwa mbaĩ ĩilyĩ ta ĩno?”
10Ngaĩa na kwĩthĩwa na kĩmeto nũndũ wa iĩma,
o na ngaĩa nũndũ wa isesi ila syĩ weũnĩ,
nũndũ nĩ mbĩvye ũkethĩa vai mũndũ wĩsĩla vo,
o na vai indo syĩw'ĩkaa ikyany'a vo,
o na nyũnyi na nyamũ nikĩĩte ikauma vo.
11Mwĩai Ngai easya atĩĩ,
“Ngaananga Yelũsalemu ĩtw'ĩke kĩvumbu,
ĩtw'ĩke wĩkalo wa mbĩwa,
na ngatuma ndũa sya Yuta itiwa syĩ nthei,
vate andũ matwĩe vo.”
12Ve mũndũ mũĩ ũkethĩa no amanye maũndũ asu? Kana ve mũndũ ũmanyĩthĩtw'e ũndũ ũũ nĩ Mwĩai Ngai nĩ kana nake atũtavye? Nĩkĩ nthĩ ĩno yanangĩtwe vyũ na ĩkatiwa yĩ nthei ta weũ, ũkethĩa o na vai mũndũ wĩsĩlaa vo?
13Mwĩai Ngai nĩwasũngĩie asya atĩĩ, “Nĩkwĩthĩwa nĩmaleile mĩao yakwa ĩla namanengie; nĩmaleete kũmbĩw'a na makalea kwĩka ũndũ nameaĩie. 14Ĩndĩ maatĩĩie kwenda kwa ngoo syoo mbũmũ, na nĩmathaithaa ngai ila syĩtawa Mbaali, o tondũ aaũmae moo mamamanyĩisye. 15Kwondũ wa ũu, nyie Mwĩai Ngai Mwene Ũtonyi W'onthe, Ngai wa Ĩsilaeli nĩasya kana nganenga andũ aa lĩu wĩ wũũ maye, na ngĩmanenga kĩw'ũ kĩ sumu manyw'e. 16Ngamanyaaĩkya katĩ wa mbaĩ ila mo, o na aaũmae moo mataaimanya, na me kũu makokitwa nĩ amaitha moo nginya nĩmamine vyũ.”
Andũ ma Yelũsalemu Maikaya Matethw'e
17Mwĩai Ngai Mwene Ũtonyi W'onthe easya atĩĩ,
“Sũanĩai maũndũ ala mekĩkĩte,
na mũyĩta aka ala maĩaa;
ĩĩ, matũmanei aka asu mesĩ kũĩa nesa moke.”
18Namo andũ measya atĩĩ,
“Nĩmekalaate na mayũkĩlya wasya maĩe nũndũ witũ,
nĩmaĩe nginya metho maitũ metĩkye methoi,
ĩĩ, kũvika metho maitũ metĩkye methoi ta kĩw'ũ.”
19Wasya wa kĩĩo nũkwĩw'ĩka kuma Saioni ũyasya,
“Nĩtũminĩtwe vyũ!
Nthoni sitũ nĩ mbingĩ!
No nginya tũtie nthĩ yaitũ,
nĩkwĩthĩwa nyũmba sitũ niomboetwe.”
20Inyw'ĩ aka ĩw'ai ũndũ Mwĩai Ngai ũkũmwĩa,
teai matũ menyu mwĩw'e ũndũ ũkũneena.
Manyĩsyai eĩtu menyu wathi wa kĩĩo,
na kĩla ũmwe nĩamanyĩsye mũtũi wake wathi wa mathiko.
21Nũndũ kĩkw'ũ nĩkĩsĩlĩte ndĩlĩsyanĩ,
kĩkalika nyũmbanĩ sitũ ndũmu.
Nĩkĩminĩte syana ũkethĩa iyoneka malelũnĩ,
na kĩkamina anake ũkethĩa mayoneka kũla mombanĩaa ndũanĩ.
22Matavye ũmee atĩĩ, “Mwĩai Ngai easya:
‘Mĩĩ ya andũ akw'ũ ĩkanyaĩĩkw'a isesinĩ ta vũũ,
ĩkanyaĩĩkw'a ta syove sya ngetha itiĩtwe ĩtina nĩ mũkethi,
na vai mũndũ ũkamyũmbany'a.’ ”
23Mwĩai Ngai easya atĩĩ,
“Mũndũ ũla mũĩ ndakekathĩĩe nũndũ wa ũĩ wake,
na ũla wĩ vinya ndakekathĩĩe nũndũ wa vinya wake,
o na mũndũ ũla mũthwii ndakekathĩĩe nũndũ wa ũthwii wake.
24 #
1Ako 1.31; 2Ako 10.17 Ĩndĩ ũla ũkwenda kwĩkathĩĩa nĩekathĩĩe ũndũnĩ ũũ:
Kwĩthĩwa ambĩsĩ na akamanya kana ninyie Mwĩai Ngai,
nyie ũla nendaa andũ na wendo ũtaolekaa,
nĩsilaa na sila wa katĩ, na nĩkaa ũlũngalu ĩũlũ wa nthĩ.
Nyie Mwĩai Ngai nĩasya kana nĩnendeeaw'a nĩ maũndũ asu.
25“Nyie Mwĩai Ngai nĩasya kana ĩvinda nĩyũkĩte, yĩla ngakany'a andũ onthe ala aĩke, ĩndĩ mekalaa ta mate aĩke: 26Andũ ma Misili, ma Yuta, ma Etomu, Aamimoni na Amoavi. O ta ũu ngakany'a onthe ala mekalaa nthĩ ya weũ, ala menzaa nzw'ĩĩ syoo ikatiwa ithũkũ. Andũ ma nthĩ isu syonthe ti aĩke, o na andũ ma Ĩsilaeli mayĩanĩasya ũtianĩo wakwa.”#9.26 mayĩanĩasya ũtianĩo wakwa: Kana ti aĩke ngoonĩ
Currently Selected:
Yel 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
