Yel 8
8
1“Nyie Mwĩai Ngai nĩasya kana ĩvindanĩ yĩu, mavĩndĩ ma asumbĩ na atongoi ma Yuta, mavĩndĩ ma athembi na ma athani, na mavĩndĩ ma andũ onthe ala mekalaa Yelũsalemu makaumw'a mbũanĩ syoo. 2Makaumw'a mayanĩkĩwa syũa, mwei o na ndata sya ĩtunĩ, ila andũ asu mendete na maithũkũmaa, ila mamanthaa, maatĩĩaa na mathaithaa. Mavĩndĩ asu maikombanw'a kana kũthikwa, ĩndĩ makanyaĩĩkĩa ĩũlũ wa nthĩ ta vũũ. 3Onthe ala makatiala me thayũ ma mbaĩ ĩno nthũku, makenda kũkw'a kũte kwĩkala thayũ me kũndũ kw'onthe kũla nĩmanyaaĩkĩsya. Nĩasya ũu nyie Mwĩai Ngai Mwene Ũtonyi W'onthe.”
Naĩ ya Andũ ma Yuta na Ũkany'o woo
4We Yelemia neena na andũ makwa ũmee atĩĩ,
“Nyie Mwĩai nĩmakũlya,
yĩla mũndũ wavalũka nũleaa kũkĩla?
Kana yĩla mũndũ wavĩtya nzĩa nũleaa kũsyoka na ĩtina?
5Nĩkĩ ĩndĩ mwaathũkie kuma vala nĩĩ na mũyaanzyokea?
Mũlũmanĩtye na mĩvw'anano yenyu,
na nĩmũleete kũnzyokea.
6Nyie nĩnĩteete kũtũ ngamwĩthukĩĩsya,
ĩndĩ mũineenaa nesa.
Vai ũmwe wenyu wĩlilaa nũndũ wa ũthũku wake na kwĩkũlya,
‘Ũndũ ũũ nĩkie nĩ mwaũ?’
Kĩla mũndũ aatĩĩaa nzĩa yake mwene,
ta mbalasi ĩendete na vinya ĩkalike kaũnĩ.
7O na masaũ nĩmesĩ mavinda ma mo ma kũthama,
o na ndumbũ, mĩthoonzwe na tũnyange,
nĩsyĩsĩ mavinda ala syaĩlĩte kũsyoka mawĩkalonĩ masyo,
ĩndĩ andũ makwa mayĩsĩ myamũlo yakwa nyie Mwĩai Ngai.
8“Inyw'ĩ mũtonya ata kwasya, ‘Twĩ oĩ,
na nĩtwĩsĩ mĩao ya Mwĩai Ngai’?
Ĩndĩ amanyĩsya ma mĩao nĩmamĩalyũlĩte ĩkatw'ĩka ya ũvũngũ.
9Andũ menyu ala oĩ makasonokw'a;
makatelemw'a na kũkwatw'a.
Nĩmaleete ndeto yakwa nyie Mwĩai Ngai,
na kwoou nĩ ũĩ mwaũ ũla me naw'o?
10 #
Yel 6.12-15
Kwondũ wa ũu nganengane iveti syoo kwa andũ angĩ,
na mĩũnda yoo ngĩmĩnengane kwa ala memasinda.
Ngameka ũu nĩkwĩthĩwa kuma ũla mũnini kũvika ũla mũnene,
onthe me na ĩtomo ya kũkwata syĩndũ kwa nzĩa ĩtaĩlĩte,
o na athani na athembi,
onthe nĩmakenganaa.
11 #
Esek 13.10
Maiitaa maũũmĩsye ma andũ makwa matekwona ũsu ta ũndũ ũnene,
maneenaa makasya kwĩ mũuo,
o yĩla kũte mũuo o na vanini.
12Maasonoka yĩla meekie maũndũ ma kũthatya?
Aiee, mayaasonoka o na vanini,
o na mayĩsĩ mũndũ ew'aa nthoni ata.
Kwoou makaminwa o ta ala angĩ,
ĩvinda yĩla nĩmakany'a, ũsu nĩw'o ũkethĩwa mũminũkĩlyo woo.
Nĩasya ũu nyie Mwĩai Ngai.
13“Nĩnendaa kũmbany'a andũ makwa,
o tondũ mũĩmi wũmbanasya ngetha;
ĩndĩ mailyĩ ta mũsavivũ ũte na nzavivũ,
kana ta mũkũyũ ũte na makũyũ,
ũla o na matũ maw'o nĩ momũ.
Kwoou nĩnĩekete aeni mose nthĩ yoo.
14“Andũ ma Yuta mekũlany'a,
‘Tũilyĩ vaa mana nĩkĩ?
Nĩtũmbanei na tũithi tũkalike ndũanĩ mbiĩĩe tũkw'ĩĩe kw'o!
Nĩkwĩthĩwa Mwĩai Ngai, Ngai waitũ nũtw'ĩte tũminwe,
na nũtũnengete kĩw'ũ kĩ sumu tũnyw'e,
nũndũ nĩtũmũvĩtĩsye.
15Tweekwatasya kana tũkeethĩwa na mũuo,
ĩndĩ tũyaaona ũseo;
tweekwatasya kana tũkavow'a,
ĩndĩ twatelemw'a.
16Nĩtũkwĩw'a mbalasi sya amaitha maitũ iitiva syĩ ndũanĩ ya Ndani,
na kwany'a kwa mbalasi syoo nũme nĩkũũtuma nthĩ yaitũ yonthe ĩthingitha.
Mokĩte kwananga nthĩ na syĩndũ syonthe ila syĩ vo,
kwananga ndũa na onthe ala matwĩe nthĩnĩ wayo.’
17“Nyie Mwĩai Ngai nĩasya kana ngamũtũmĩa nzoka katĩ wenyu,
syĩmbuva ila itatonya kũvoovw'a, na ikamũũma.”
Yelemia Akĩmaĩĩa Andũ make
18Nĩna kyeva kingĩ kĩtathela,
ngoo yakwa yĩ na woo mwingĩ.
19Ĩthukĩĩsye kĩĩo kya andũ makwa,
kuma nthĩ yĩ kũasa meĩa maikũlya:
“Nũndũ Mwĩai Ngai waumie Saioni?
Nũndũ mũsumbĩ wayo ũmĩtiĩte?”
Nake Ngai emasũngĩa ayasya,
“Nĩkĩ inyw'ĩ mũnthatĩtye kwa kũthaitha mĩvw'anano myasũvye,
na ngai syenyu ngeni sya mĩvw'anano?”
20Andũ namo maendee kũĩa mayasya,
“Ĩvinda ya ngetha nĩ ĩvĩtũku,
na thano ũkathela,
ĩndĩ tũinamba kũtangĩĩwa.”
21Nĩkwĩthĩwa andũ makwa nĩ aũmĩsye,
o nakwa nĩ mũũmĩu;
nĩna kĩĩo na nĩĩw'a nĩsaanĩw'e.
22Nĩkũlya, nũndũ Ngileati vatoneka ndawa?
Nũndũ vatoneka ndakĩtalĩ?
Nĩkĩ ĩndĩ andũ makwa mataavow'a,
makethĩwa na ũima wa mwĩĩ ĩngĩ?
Currently Selected:
Yel 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
