Yel 7
7
Yelemia Aitavany'a Ĩkalũnĩ
1Mwĩai Ngai nĩwaneenie na Yelemia amwĩa atĩĩ, 2“Enda ũkaũngame mũvĩanĩ wa kũlika Ĩkalũnĩ yakwa nyie Mwĩai Ngai, na wĩ vau ũitavany'a wasye atĩĩ, ‘Ĩw'ai ndeto ya Mwĩai Ngai inyw'ĩ andũ ma Yuta, ala mũlikĩlaa mĩvĩanĩ ĩno mũthaithe Mwĩai Ngai. 3Mwĩai Ngai Mwene Ũtonyi W'onthe, Ngai wa Ĩsilaeli emwĩa atĩĩ: Lũngalyai mĩendele yenyu na meko menyu, nakwa ngamũeka mũendee kwĩkala vaa. 4Mũikekwatye ndeto ii sya ũvũngũ mũũneena mũyasya: Yĩĩ nĩ Ĩkalũ ya Mwĩai Ngai, Ĩkalũ ya Mwĩai Ngai, Ĩkalũ ya Mwĩai Ngai!’
5“Ethĩwa kwa w'o mũkalũngalya mĩendele yenyu na meko menyu; ethĩwa mũkaatĩĩaa sila wa katĩ mũisilany'a mũndũ na mũtũi wake, 6na ethĩwa mũkaeka kũmathĩny'a aeni kana ala makw'ĩĩwe nĩ aaĩthe, kana aka ndiwa, na mũyĩeka kũaĩa andũ mate na ĩvĩtyo nthĩ ĩno, na mũyĩeka kwĩyĩka naĩ kwa kũthaitha ngai ingĩ, 7nĩvo ĩndĩ nakwa nĩmũeka mwĩkale nthĩ ĩno, ĩla kuma tene nanengie aaũmae menyu yĩthĩwe yoo tene na tene.
8“Inyw'ĩ mwĩkwatĩtye ndeto sya ũvũngũ itemũtethya. 9Nĩmũkũlya, mũkooyaa na kũaa, mũkalaalaa na kwĩvĩta mawĩvĩto ma ũvũngũ, mũkatoeeasya ngai yĩtawa Mbaali ũvani na kũthaitha ngai ingĩ mũtaamanya, 10na ĩndĩ mũyũka kũũngama mbee wakwa vaa Ĩkalũnĩ yakwa na mũyasya, ‘Ithyĩ twĩ avonoku!’ Na ĩtina wa ũu mũiendeea kwĩka maũndũ asu onthe ma kũnthatya? 11#Mat 21.13; Mk 11.17; Lk 19.46 Nĩkũlya, Ĩkalũ yĩĩ yakwa yĩtw'ĩkĩte ngunga ya kwĩvitha ing'ei? Nyie Mwĩai Ngai nĩnonete maũndũ onthe ala mwĩkaa.
12 #
Yos 18.1; Sav 78.60; Yel 26.6 “Yu endai Silo mũkasisye vandũ vala tene vaakĩtwe Ĩeema yakwa na vakaiwa Ĩsandũkũ ya Ũtianĩo, mwone ũndũ navekie nũndũ wa ũthũku wa andũ makwa Ĩsilaeli. 13Yu ĩndĩ nenyu, nyie Mwĩai Ngai nĩmwĩa kana, nĩkwĩthĩwa nĩmwĩkĩte maũndũ aa onthe, na nũndũ naneenie nenyu mavinda maingĩ na mwalea kũmbĩw'a, na namwĩta mwalea kwĩtĩka, 14yu nakwa ngeeka nyũmba ĩno yakwa ĩla mwĩkwatĩtye, na vandũ vaa nanengie aaũmae menyu, o ũndũ neekie Silo. 15Ngamwĩkya kũasa mũno o tondũ nekisye ana-a-ĩthe menyu onthe, nzyawa sya Evalaimu.
16“Naku we Yelemia, ndũkavoyee andũ aa. Ndũkamaĩĩe kana kũmavoyea, na ndũkambĩsũve nũndũ woo, nũndũ ndikwĩthukĩĩsya. 17Nĩũkũlya, we nũkwona ũndũ maendee kwĩka ndũanĩ sya nthĩ ya Yuta, na nzĩanĩ sya ndũa ya Yelũsalemu? 18#Yel 44.17-19 Syana iendaa ikauna ngũ, namo aaĩthe maivuva mwaki, nasyo iveti iikima mũtu iuĩe mĩkate ngai ĩla metaa Mũsumbĩ Mũndũ Mũka wa Ĩtunĩ. O vamwe na ũu nĩmaumĩasya ngai ingĩ nthembo sya kũnyuwa sya ndivai nĩ kana manthatye. 19Ĩndĩ nyie Mwĩai Ngai nĩkũlya atĩĩ: Nyie ninyie mathatasya kana methatasya mo ene na kwĩyĩetee nthoni? 20Kwoou nyie Mwĩai Ngai Mũsumbĩ nĩasya atĩĩ: Ngoonosya ũthatu wakwa mwai vandũnĩ vaa. Ngawonosya ĩũlũ wa andũ na nyamũ, na ĩũlũ wa mĩtĩ na mosyao ma mĩũnda. Ũthatu ũsu ũkeethĩwa ũilyĩ mwaki na ndũkavoeka.”
Ũsilĩlo nũndũ wa Ũng'endu wa Yuta
21Mwĩai Ngai Mwene Ũtonyi W'onthe, Ngai wa Ĩsilaeli easya atĩĩ, “Nthembo syenyu ila mumasya syongelei nthembo sya kũvĩvw'a, na mũiya nyama isu! 22Yĩla naumisye aaũmae menyu nthĩ ya Misili, ndyaaneena namo kana ngameaĩa ĩũlũ wa nthembo sya kũvĩvw'a na nthembo ila ingĩ, 23ĩndĩ nĩnamanengie Mwĩao ũũ: Mbĩw'ei, na nĩngwĩthĩwa Ngai wenyu, nenyu mũyĩthĩwa andũ makwa. Atĩĩai nzĩa ĩla ngũmwĩaĩa nĩ kana mũendee nesa. 24Ĩndĩ mayaambĩw'a kana makambĩthukĩĩsya; vandũ va ũu, maatĩĩie mosũanĩo moo ene, na wũmũ wa ngoo syoo syĩ na ũthũku. Vandũ va kũendeea mbee, masyokie na ĩtina. 25Kuma yĩla aaũmae menyu maumie nthĩ ya Misili kũvika ũmũnthĩ, kĩla ĩvinda nĩthĩĩtwe ngĩmatũmĩa athũkũmi makwa athani, 26ĩndĩ mayaambĩw'a kana kũmbĩthukĩĩsya. Nĩmoomisye ngoo na meeka mothũku maingĩ kwĩ ala aaũmae moo meekie.
27“We Yelemia ũkamatavya maũndũ aa onthe, ĩndĩ maikakwĩthukĩĩsya, ũkameta ĩndĩ maikakwĩtĩka. 28Nĩvo ĩndĩ wĩmea atĩĩ, ‘Inyw'ĩ mwĩ mbaĩ ĩleete kũmwĩw'a Mwĩai Ngai, Ngai woo, na ĩkalea kwĩtĩkĩla ũkany'o wake. Ũw'o ndwoneka katĩ wenyu o na vanini, mũyĩsaa kũneena ũw'o o na ĩndĩĩ.
29Enzai nzw'ĩĩ syenyu inyw'ĩ andũ ma Yelũsalemu na mũisyĩkya ĩtheka,
ĩai mwĩ kĩĩmanĩ ĩũlũ kũla kũte kĩndũ,
nũndũ nyie Mwĩai Ngai nĩnĩmũleete na ngamũeka,
inyw'ĩ nzyawa ĩla ĩnthatĩtye.’ ”
Ũthũku ũla Andũ ma Yuta Meekaa me Mwandanĩ wa Inomu
30Mwĩai Ngai easya atĩĩ, “Andũ ma Yuta nĩmekĩte ũthũku mbee wakwa. Nĩmaiĩte mĩvw'anano yoo ya kũnthatya Ĩkalũnĩ yakwa na makayĩvukya. 31#Ali 18.21; 2Asu 23.10; Yel 32.35 Nĩmakĩte kĩthembeo Mwandanĩ wa Mbeni-inomu kĩla metaa Tovethi, vala mavĩvĩasya ana moo na eĩtu moo ta nthembo. Ndyaameaĩa kwĩka ũndũ ũsu, o na ndyaaũsũanĩa. 32Kwondũ wa ũu nyie Mwĩai Ngai nĩmũtavya kana ĩvinda nĩyũkĩte, yĩla vandũ vau vataketwa ĩngĩ Tovethi, kana Mwanda wa Mbeni-inomu, ĩndĩ vakeetawa Mwanda wa Kũaĩa. Vakeetwa ũu nũndũ makathika andũ vau Tovethi nginya vausũe wĩthĩe vai vandũ mathikana. 33Mĩĩ yoo ĩkatw'ĩka lĩu wa nyũnyi na wa nyamũ sya kĩthekanĩ, na vaikethĩwa mũndũ wa kwilũngya. 34#Yel 16.9; 25.10; Ũvu 18.23 Ndũanĩ syonthe sya Yuta na nzĩanĩ sya Yelũsalemu ngamina kũtheka na wasya wa ũtanu, o na ũtanu wa mboka sya mũtwaano, nĩkwĩthĩwa nthĩ ĩkatiwa yĩ mbanange.
Currently Selected:
Yel 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
