Yel 6
6
Yelũsalemu Ĩthyũlũlũkĩtwe nĩ Amaitha
1Inyw'ĩ andũ ma mbaĩ ya Mbengyameni sembai mũkevithe,
kĩai mume Yelũsalemu!
Vuvĩai soo ndũanĩ ya Tekoa,
na mũyĩkĩa wonany'o kũu Mbethi-akelemu,
nũndũ mũisyo na wanangĩko mũnene,
nĩsyũkĩte kuma ngalĩko ya ĩũlũ.
2Ndũa ya Saioni nĩ mbanake na nĩyakwendeesya,
ĩndĩ ngamyananga.
3Asumbĩ makooka me na asikalĩ moo mamĩvithũkĩe,
mailyĩ ta aĩthi matongoesye ndĩthya syoo.
Makamba maeema moo kũmĩthyũlũlũka,
kĩla mũsumbĩ e na kĩsio kyake.
4Makaneenany'a masye, “Ĩyũmbany'ei tũkite Saioni,
ũkĩlai tũmĩvithũkĩe mũthenya katĩ!
Ĩndĩ kyeva nĩ kwitũ nũndũ nĩkwambĩĩa kũtuka,
nĩkwambĩĩa kũka kĩvindu.
5Tũkĩlei ũtukũ tũmavithũkĩe,
na kwananga myako ya yo mĩlũmu.”
6Mwĩai Ngai Mwene Ũtonyi W'onthe easya atĩĩ,
“Temangai mĩtĩ ya Yelũsalemu,
ũmbai ivumbu imĩthyũlũlũkĩte.
Ndũa ĩno no nginya ĩkanw'e,
nthĩnĩ wayo vai kĩndũ kĩendee ate o andũ kũthĩny'a angĩ.
7O tondũ kĩthima kĩendeeaa kumya kĩw'ũ kyakyo,
no w'o andũ ma Yelũsalemu maendeeaa kwĩka ũthũku woo.
Ũng'endu na wanangĩko nikwĩw'ĩka ndũanĩ ĩsu,
ndiekaa kwona ũwau na itau vo.
8Ĩsũvĩei inyw'ĩ andũ ma Yelũsalemu,
ndikese kũmũlea vyũ,
na kũtia nthĩ yenyu yĩ nthei,
wĩthĩe vai mũndũ ũtũa vo.”
Ũkany'o wa Ĩsilaeli nũndũ wa Kũmũlea Ngai
9Mwĩai Ngai Mwene Ũtonyi W'onthe easya atĩĩ,
“Ũmbany'ai andũ ma Ĩsilaeli onthe ala matialĩte,
o tondũ andũ mombanasya nzavivũ syonthe ila itialĩte,
mamanthei ĩngĩ,
o tondũ mũkethi wa nzavivũ wĩkaa.”
10Nũũ ũla nĩneena nake nĩmũnenge ũkany'o,
nĩ kana mambĩw'e?
Matũ moo nĩmakunĩke,
maitonya kwĩw'a.
Ndeto ya Ngai kwoo nĩ kĩndũ kya kũvũthya,
na mayendeeaw'a nĩyo.
11Kwoou ngoo yakwa nĩyusũĩte ũthatu mwai wa Mwĩai Ngai,
na nditonya kũwũmĩĩsya.
Nĩvo ĩndĩ Mwĩai Ngai wambĩie atĩĩ,
“Onosya ũthatu ũsu ĩũlũ wa syana ila syĩ nzĩanĩ sya ndũa,
ĩũlũ wa anake ala mombanĩte vamwe.
Mũndũ na mũka wake nĩmeũkwatwa nĩ ũthatu ũsu,
o na nũũmakwata ala akũũ na ala akũũ mũno.
12 #
Yel 8.10-12
Nyũmba syoo ikanengwa andũ angĩ,
vamwe na mĩũnda yoo na iveti syoo,
nũndũ ngatambũũky'a kw'oko kwakwa,
nĩkany'e andũ ma nthĩ ĩno.
13Ngamakany'a nũndũ kuma ũla mũnini kũvika ũla mũnene,
onthe me na ĩtomo ya kũkwata syĩndũ kwa nzĩa ĩtaĩlĩte,
o na athani na athembi,
onthe nĩmakenganaa.
14 #
Esek 13.10
Maiitaa maũũmĩsye ma andũ makwa matekwona ũsu ta ũndũ ũnene,
maneenaa makasya kwĩ mũuo,
o yĩla kũte mũuo o na vanini.
15Maasonoka yĩla meekie maũndũ ma kũthatya?
Aiee, mayaasonoka o na vanini,
o na mayĩsĩ mũndũ ew'aa nthoni ata.
Makaminwa o ta ala angĩ,
ĩvinda yĩla nĩmakany'a ũsu nĩw'o ũkethĩwa mũminũkĩlyo woo.
Nĩasya ũu nyie Mwĩai Ngai.”
Andũ ma Ĩsilaeli Mailea Nzĩa sya Ngai
16 #
Mat 11.29
Mwĩai Ngai easya atĩĩ,
“Ũngamai makomanĩonĩ ma nzĩa na mũisisya;
kũlyai vala nzĩa sya tene iĩ,
kũlyai vala ve nzĩa ĩla nzeo na mũyĩsĩla vo,
nenyu mũkakwata ũthũmũo.
Ĩndĩ inyw'ĩ mwaisye, ‘Tũyĩĩsĩla nzĩanĩ ĩsu.’
17Nĩnamũnyuvĩie asyaĩĩsya na namwĩa,
‘Ĩthukĩĩsyei yĩla soo wĩvuvwa!’
Ĩndĩ inyw'ĩ mwasya, ‘Tũyĩĩthukĩĩsya.’
18Yu ĩndĩ ĩw'ai inyw'ĩ mbaĩ sya andũ,
na mũimanya inyw'ĩ wũmbano wa andũ,
maũndũ ala mekũkwata andũ aa.
19“Ĩthukĩĩsye we nthĩ:
Nĩngũetee andũ aa wanangĩko,
ta ũkany'o wa mĩvango yoo mĩthũku.
Nĩkwĩthĩwa nĩmaleete kwĩw'a ndeto syakwa,
na makalea mĩao yakwa.
20Nĩna vata mwaũ wa ũvani ũla maetae kuma Sieva,
na mĩtĩ ĩnyungaa nesa ĩla maetae kuma nthĩ yĩ kũasa?
Ndiĩtĩkĩla nthembo syoo sya kũvĩvw'a;
nthembo syoo iimbendeeasya.
21“Kwoou nyie Mwĩai Ngai nĩasya:
Ngaiĩa andũ aa syĩndũ sya kũmaluluutĩkya ila syĩtuma maluluutĩka,
Ĩthe na mwana, mũtũi na mũnyanyae onthe makaminwa.”
Amaitha kuma Ngalĩko ya Ĩũlũ Maivithũkĩa Ĩsilaeli
22Mwĩai Ngai easya atĩĩ,
“Ve andũ mokĩte kuma nthĩ yĩ ngalĩko ya ĩũlũ,
mbaĩ nene ya andũ nĩkwĩyũmbany'a kuma kũndũ kũasa mũno.
23Me na mbũta na matumo,
nĩ andũ athe mate tei.
Mokĩte malĩsĩte mbalasinĩ me na kĩlitũko ta kya ũkanga,
mailyĩ asikalĩ mevangĩte kũkita,
makũvithũkĩe we Saioni.”
24Andũ ma Yelũsalemu measya atĩĩ,
“Nĩtwĩw'ĩte ũvoo wa kũvithũkĩwa kwitũ,
moko maitũ nĩ maleelu,
twĩ na kĩmako na tũkakwatwa nĩ woo,
ta wa mũndũ mũka ũkwaũnya.
25Tũikaumaale tũthi isesinĩ,
kana twĩsĩle nzĩanĩ,
nũndũ amaitha maitũ makwete mbyũ;
motĩsyo me kĩla ngalĩko.
26Andũ ma Yelũsalemu twĩkĩeie ngũa ngaamu sya makunia,
na tũyiliita mũunĩ;
nĩtũĩe kĩĩo kĩ woo,
ta mũndũ ũkũĩĩa mwana wake e ũmwe,
nũndũ mwanangi nĩwũkĩte kũtũvithũkĩa kwa kĩthũlũmũko.”
27Mwĩai Ngai easya atĩĩ,
“We Yelemia ngwiĩte ũtate andũ makwa ta mũndũ ũla ũtataa syũma,
nĩ kana ũmanye na kũtata mwĩkalo woo.
28Onthe nĩmomĩtye ngoo na nĩ ang'endu,
maendaa makĩmaneenea andũ angĩ ndeto sya ũvũngũ.
Momĩtye ngoo syoo ta mbulonzi kana kyũma,
na onthe nĩmekaa maũndũ mathũku.
29Andũ makwa mailyĩ ta silĩva ũte mũthesye,
ũla o na ũkatata kũũthesya no wĩa wa mana,
o na ethĩwa mwaki ũvyũvĩte ata.
Kwoou no wĩa wa mana kũendeea kũthesya andũ makwa,
nũndũ andũ athũku maivetawa makathela.
30Makeetwa silĩva ũte vata,
nũndũ nyie Mwĩai Ngai nĩnĩmaleete.”
Currently Selected:
Yel 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
