Yel 5
5
Naĩ ya Andũ ma Yelũsalemu
1Sembai kũũ na kũũ nzĩanĩ syonthe sya Yelũsalemu,
sisyai nesa mũmanye!
Manthai kũla andũ mombanĩaa ndũanĩ,
mwone kana nĩmũtonya kwĩthĩa mũndũ o na ũmwe,
ũla wĩkaa ũlũngalu na ũatĩĩaa ũla w'o.
Mwamwĩthĩa, nyie Mwĩai Ngai nĩngũekea Yelũsalemu.
2O na kau nĩmevĩtaa mayasya,
“O tondũ Mwĩai Ngai wĩ thayũ,”
mevĩtaa mawĩvĩto ma ũvũngũ.
3We Mwĩai Ngai metho maku masiasya mone ũw'o.
Nũmakũnĩte, ĩndĩ mayaaĩw'a woo;
nũmaminĩte, ĩndĩ nĩmaleete kũkanw'a.
Nĩmomĩtye ngoo syoo ta ĩvia,
makalea ũkũsyokea.
4Nĩvo ĩndĩ nasũanĩie nasya atĩĩ,
“Andũ aa nĩ ngya na mai na ũmanyi;
mayĩsĩ kwenda kwa Mwĩai Ngai,
mayĩsĩ mĩao ya Ngai woo.
5Kwoou yu nĩngũthi kũla kwĩ atongoi nganeene namo;
kwa w'o asu nĩmesĩ kwenda kwa Mwĩai Ngai,
nĩmesĩ mĩao ya Ngai woo.”
Ĩndĩ o namo nĩmatũlĩte ĩsoki yoo yĩla wamatongoeasya nayo,
na makatusanga makanda ala wamatongoeasya namo.
6Kwondũ wa ũu mũnyambũ kuma kĩthekanĩ ũkamoaa,
na nzũi yumĩte weũnĩ ĩkamatembũanga.
Ngo ĩkooveesya ndũanĩ syoo,
ĩtembũange tũlungu mũndũ o na wĩva ũla wĩumaala.
Ngameka ũu nũndũ mavĩtyo moo nĩ maingĩ,
nĩmasyokete na ĩtina kaingĩ.
7Mwĩai Ngai ekũlya atĩĩ, “Ndonya ata ũkũekea?
Syana syaku nindiĩte,
na ikathaitha ngai sya mĩvw'anano.
Yĩla namanengie lĩu mavũna, nĩmeekie ũlaalai,
na mathi kũmbanĩa nyũmbanĩ sya malwaya.
8Mekalile ta mbalasi nũme iĩthĩtw'e ikavũna syĩ na wendi,
kĩla ũmwe ew'ĩaa mũmeo kĩveti kya mũtũi wake.
9Yu nyie Mwĩai Ngai nĩkũlya,
‘Ngalea kũmasilĩla nũndũ wa maũndũ aa?
Ngalea kwĩyĩĩvanĩsya vala ve mbaĩ ta ĩno?’
10“Likai mĩũndanĩ yoo ya mĩsavivũ mũmyanange,
ĩndĩ mũikamyanange vyũ.
Tilangai mbonge syayo,
nũndũ andũ aa ti makwa nyie Mwĩai Ngai.
11Andũ ma Ĩsilaeli na andũ ma Yuta,
methĩĩtwe mate aĩkĩĩku kwakwa o na vanini,
Nĩasya ũu nyie Mwĩai Ngai”
Mwĩai Ngai Ailea Andũ ma Ĩsilaeli
12Andũ ma Ĩsilaeli maneenete ũvũngũ ĩũlũ wa Mwĩai Ngai makasya atĩĩ, “Nde ũndũ wĩĩka! Vai ũthũku wĩtũkwata, na tũikesa kwĩthĩwa na kaũ kana yũa. 13Ndeto sya athani aa nĩ sya mana ta kĩseve kĩvĩtĩte. Vai ũtũmani manengetwe nĩ Ngai, na kwoou ũthũku ũla meũtwathanĩa ũmakwate nemo.” 14Kwoou Mwĩai Ngai Mwene Ũtonyi W'onthe easya atĩĩ, “Nĩkwĩthĩwa andũ aa nĩmaneenete ũu, ngatumaa ndeto syakwa ila we Yelemia ũneenaa itw'ĩka mwaki, namo andũ aa makatw'ĩka ngũ, na mwaki ũsu ũkaivĩvya. 15Nyie Mwĩai Ngai ngamũetee inyw'ĩ andũ ma Ĩsilaeli mbaĩ yumĩte kũasa ĩmũvithũkĩe. Nĩ mbaĩ yĩ ũtonyi yĩkalĩte ĩvinda ĩasa, na ĩneenaa kĩthyomo mũtesĩ na mũtekwĩw'a ũndũ mekwasya. 16Asikalĩ moo onthe nĩ ngũmbaũ, na maangi moo nĩmoaa. 17Makaya ngetha yenyu na lĩu wenyu; makooaa ana na eĩtu menyu; makooaa indo syenyu; makaananga mĩsavivũ yenyu na mĩkũyũ yenyu, na makamũkita na kũomboanga ndũa syenyu mbiĩĩe ila mwĩkwatĩtye.
18“Ĩndĩ o na ĩvindanĩ yĩu ndikamina vyũ andũ ma Ĩsilaeli. Nĩasya ũu nyie Mwĩai Ngai. 19Naku we Yelemia, yĩla andũ mekũkũlya atĩĩ, ‘Nĩkĩ Mwĩai Ngai, Ngai waitũ ũtwĩkĩte maũndũ aa onthe?’ Ũkamasũngĩa ũmee atĩĩ, ‘O tondũ mwamũtiie Mwĩai Ngai na mwathaitha ngai ngeni mwĩ nthĩ ĩno yenyu, yu mũkathũkũmaa ta aeni mwĩ nthĩ ĩte yenyu.’ ”
Ngai Aitavya Andũ ma Ĩsilaeli na ma Yuta Mavĩtyo moo
20Mwĩai Ngai easya atĩĩ, “Tavya andũ ma Ĩsilaeli na ma Yuta ũmee,
21 #
Ĩsa 6.9-10; Esek 12.2; Mk 8.18 ‘Ĩthukĩĩsyei inyw'ĩ andũ atumanu na mũte kĩlĩko,
mwĩ na metho ĩndĩ mũyonaa,
na mwĩ na matũ ĩndĩ mũyĩw'aa.
22 #
Yovu 38.8-11
Nĩkĩ mũtangĩaa nyie Mwĩai Ngai?
Nĩkĩ mũtatetemeaa mbee wakwa?
Nĩneekĩie kĩthangathĩ kĩthĩwe mũvaka wa ũkanga,
mũvaka wa tene na tene ũla ũkanga ũtatonya kũũkĩla.
O na itulumo sya w'o syookĩlany'a iitonya kũũkĩla,
o na syalitũka iitonya kũkĩla mũvaka ũsu.
23Ĩndĩ inyw'ĩ mwĩ na ngoo mbũmũ na ng'endu,
nĩmũndiĩte mũkathi ũtee.
24O na mũyĩsaa kwasya ngoonĩ syenyu:
Yu nĩtũmũkĩei Mwĩai Ngai, Ngai waitũ,
ũla ũtuĩasya mbua ĩvindanĩ ya yo,
mbua ya nthwa na ya uũa,
ũla ũtũnengae ĩvinda ya ngetha kĩla mwaka.’
25Mavĩtyo menyu nĩmatumĩte mũtakwata syĩndũ ii,
na naĩ syenyu ikamũvata kũkwata syĩndũ nzeo.
26Ve andũ athũku katĩ wa andũ makwa;
moveeasya andũ o tondũ atei ma nyũnyi mekaa;
nĩmateaa mĩteo na kũkwatya andũ.
27O ta kĩkavũ kyusũĩte nyũnyi,
nyũmba syoo syusũĩte ũkengani,
na nĩmatw'ĩkĩte andũ me nguma na athwii.
28Nĩ anou na makatendea mĩĩ;
mayĩsaa kũeka kwĩka ũthũku.
Mayĩsũvanĩaa ala makw'ĩĩwe nĩ aaĩthe makwate sila wa katĩ,
o na maimateteaa ala ngya makwate kĩla kĩmaĩlĩte.
29Yu nyie Mwĩai Ngai, ngalea kũmakany'a nũndũ wa maũndũ aa?
Ngalea kwĩyĩĩvanĩsya vala ve mbaĩ ta ĩno?”
30Ũndũ wa kũseng'ya na wa kũtelemya,
nĩwĩkĩkĩte nthĩ ĩno:
31Athani mathanaa ũvũngũ,
namo athembi matongoeasya kwĩanana na ũndũ mekwenda,
na andũ makwa mew'aa meanĩwe nĩ ũu.
Mũminũkĩlyonĩ mũkeeka ata?
Currently Selected:
Yel 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
