Yel 4
4
Ngai Aitavya Andũ ma Ĩsilaeli Nĩmaalyũle Ngoo.
1Mwĩai Ngai easya atĩĩ, “Ethĩwa nũkwenda kũnzyokea we Ĩsilaeli, nzyokee nyie. Waveta syĩndũ syaku sya kũthatya nĩeke kũsyona na ũyĩthĩwa wĩ mũĩkĩĩku kwakwa, 2na ũyĩvĩtaa ĩsyĩtwanĩ yakwa mawĩvĩto ma w'o, ma sila wa katĩ na ma ũlũngalu, nĩvo ĩndĩ andũ ma mbaĩ ingĩ makandaĩa nakwa ngĩmaathima.”
3 #
Osea 10.12
Ũũ nĩw'o Mwĩai Ngai ũkũtavya andũ ma Yuta na ala matwĩe Yelũsalemu:
“Ĩmai mĩũnda yenyu ĩla ĩtaaĩmwa,
na mũikavande mĩw'anĩ.
4Inyw'ĩ andũ ma Yuta na ala mũtwĩe Yelũsalemu,
ĩanĩsyai ũtianĩo wakwa nenyu,
ĩthesyei kwondũ wakwa nyie Mwĩai Ngai.
Mwalea kwĩka ũu, ũthatu wakwa ũkamwakanĩa ta mwaki,
na ũimũvĩvya vate mũndũ ũtonya kũũvosya,
nũndũ nĩmwĩkĩte maũndũ mathũku.
Yuta Ĩkilĩlye Kũvithũkĩwa
5“Tavyai andũ ma Yuta na ala matwĩe Yelũsalemu mũmee atĩĩ,
‘Vuvai soo kĩla vandũ nthĩ yenyu.’
Ĩtai andũ na wasya mũnene mũmee atĩĩ,
‘Ũmbanai na tũithi tũlike ndũanĩ mbiĩĩe!’
6Ũkĩlyai kĩvevelo kya kwony'a andũ nzĩa ya kũthi Saioni!
Sembai mũkevithe, mũikekalange!
Nũndũ nyie Mwĩai Ngai nĩngũete ũthũku kuma ngalĩko ya ĩũlũ,
ĩĩ, wanangĩko mũnene.
7Ta mũnyambũ wumĩte wĩvithonĩ waw'o,
mwanangi wa mosumbĩ nĩwumaalĩte.
Nĩwumĩte wĩkalonĩ wake;
nĩwũkĩte kwananga nthĩ yenyu,
akaomboanga ndũa sya Yuta,
wĩthĩe vai mũndũ ũtwĩe vo.
8Kwoou ĩkĩai ngũa ngaamu sya makunia,
ĩai na kwĩthĩwa na kĩmeto,
nũndũ kũvika o nayu,
Mwĩai Ngai ndanaeka kũtũthatĩa na ũthatu wake mwai.”
9Mwĩai Ngai easya atĩĩ, “Mũthenya ũsu asumbĩ na anini moo makakw'a ngoo, athembi makasaanĩw'a, na athani makaseng'a.” 10Nĩvo ĩndĩ naisye, “Ai, Mwĩai Ngai Mũsumbĩ, kwa w'o nũkengete mũno andũ ma Yuta na ma Yelũsalemu. Ũmeĩte makeethĩwa na mũuo, ĩndĩ matinĩĩw'e ũvyũ mĩmeo.”
11Ĩvindanĩ yĩu andũ ma Yuta na ala matwĩe Yelũsalemu, makatavw'a kana kĩseve kĩvyũ kyumĩte weũnĩ iĩmanĩ ĩũlũ kũla kũte kĩndũ nĩkĩmokĩe. Kĩseve kĩu ti kya kũũlũkya kana kũthesya lĩu wa mbaa mbeke, 12ĩndĩ nĩ kĩseve kĩ vinya mũno kyumĩte kwakwa. Nayu nĩngũmaumĩsya ũtw'ĩo.
Yuta Ĩthyũlũlũkĩtwe nĩ Amaitha
13Kwa sisya, mũmaitha okĩte ta matu,
makasya make ma kaũ mokĩte ta kĩlingi,
mbalasi syake syĩ mĩtũkĩ kwĩ ndiũ.
Kyeva nĩ kwitũ nũndũ nĩtwathela!
14We Yelũsalemu, thesya ũthũku ũla wĩ ngoonĩ yaku nĩ kana ũtangĩĩwe.
Wĩendeea kwĩthĩwa na mosũanĩo mathũku kĩvika ĩndĩĩ?
15Atũmwa nĩmeũtavany'a kuma ndũanĩ ya Ndani,
na kuma Iĩmanĩ sya Evalaimu;
menyaĩĩkya ũvoo wa wanangĩko.
16Tavyai mbaĩ syonthe kana mũmaitha nĩwũkĩte,
tavyai Yelũsalemu mũmĩe atĩĩ,
“Amaitha nĩmokĩte kuma nthĩ ya kũasa,
mokĩlĩlye ndũa sya Yuta wasya wa kaũ.
17Mathyũlũlũkĩte Yelũsalemu o tondũ asyaĩĩsya mathyũlũlũkaa mũũnda makĩũsũvĩa,
nĩkwĩthĩwa andũ mayo nĩmang'endeete.
Nĩasya ũu nyie Mwĩai Ngai.
18Mwĩkalĩle wenyu na meko menyu nĩmo matumĩte mũkwatwa nĩ ũthũku ũũ.
Ũũ nĩ w'o ũkany'o wenyu, na wĩ wũũ,
na nũmũtonyete kũvika ngoonĩ.”
Yelemia Ayĩw'a Kyeva nũndũ wa Andũ make
19Ĩia woo, Ĩia woo!
Nĩw'ĩte woo mwingĩ mũno!
Ĩia ngoo yakwa!
Ngoo yakwa ĩkũnĩte mũno,
Nditonya kũkilya,
nũndũ nĩngwĩw'a wasya wa soo,
wasya wa soo wa kaũ.
20Wanangĩko ũatĩĩawa nĩ wanangĩko ũngĩ,
nthĩ yonthe nĩ mbanange vyũ.
Kwa kĩthũlũmũko maeema makwa nĩmaanangwa,
na itambaa sya maeema makwa nĩsyaanangwa.
21Nĩendeea kwona kĩvevelo kya kaũ kũvika ĩndĩĩ,
na kwĩw'a soo wa kaũ ũivuvwa?
22Mwĩai Ngai easya atĩĩ,
“Andũ makwa nĩ atumanu na maimbĩsĩ;
mailyĩ ta syana ndumanu ite na ũmanyi.
Mesĩ mũno kwĩka ũthũku,
ĩndĩ mayĩsĩ kwĩka ũla ũseo.”
Woni wa Yelemia ĩũlũ wa Wanangĩko ũla Wũkĩte
23Nĩnasyaisye nthĩ noona yĩ mbanangĩku na yĩ nthei,
nĩnasyaisye matunĩ noona kũte kyeni.
24Nĩnasyaisye iĩma noona iithingitha,
na tũlĩma tw'onthe o natw'o noona tũithingithanga.
25Nĩnasyaisye na ndyaaona mũndũ o na ũmwe,
o na nyũnyi syonthe yayayanĩ syaĩ iũlũkile syathi vyũ.
26Nĩnasyaisye noona kana nthĩ ĩla yaĩ nzeo ĩtw'ĩkĩte weũ,
na kana ndũa syayo nĩ mbanange,
nũndũ wa ũthatu mwai wa Mwĩai Ngai.
27Mwĩai Ngai easya atĩĩ,
“Nthĩ yonthe ĩkatw'ĩkĩthw'a weũ ũte kĩndũ,
ĩndĩ ndikamyananga vyũ.
28Kwoou nthĩ ĩkeethĩwa na kĩĩo,
na matu makaia;
nũndũ nyie Mwĩai Ngai nĩnĩneenete na nĩnĩtw'ĩte ũu,
nĩmbangĩte kwĩka ũu na ndilea kũwĩka.”
29Andũ ma kĩla ndũa nĩmasembaa,
meew'a kũlonzany'a kwa asikalĩ ala malĩsĩte mbalasinĩ,
na ala maathaa na maangi,
amwe mevithaa ithekanĩ,
na angĩ maitũla mavianĩ.
Ndũa syonthe itiĩtwe syĩ nthei,
vai mũndũ wĩkalaa vo.
30Naku we Yelũsalemu ũla ũtiĩtwe wĩ mũthei,
wĩenda kwonany'a ata ũyĩkĩa ngũa ndune,
na kwĩkĩa syĩndũ sya wanake sya thaavu?
Wĩvaka metho maku langi nĩkĩ?
Wĩĩyanakavya o mana,
endwa maku nĩmeũkũvũthya,
na meenda ũkũaa.
31Nĩneewie kĩĩo ta kya mũndũ mũka akyaũnya,
kũkiva ta kwa mũndũ mũka aisyaa kana kake ka mbee,
nakyo kyaĩ kĩĩo kya Yelũsalemu aivevũũka,
atambũũkĩtye moko ayasya,
“Kyeva nĩ kwakwa!
Nĩngũvalũka mbee wa ala mokĩte kũmbũaa.”
Currently Selected:
Yel 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
