Yel 3

Ĩsilaeli Ĩilyĩ ta Kĩveti kĩte Kĩĩkĩĩku

1Mwĩai Ngai ekũlya atĩĩ, “Ethĩwa mũndũ-ũme nĩwataanĩsya na mũka auma kwake na atwawa nĩ mũndũ ũngĩ, nĩwaĩlĩte kũmwosa ethĩwe kĩveti kyake ĩngĩ? Ethĩwa akamwosa, ũndũ ũsu ndũkavukya nthĩ yoo mũno? We Ĩsilaeli wĩkĩte ũmalwaya na aũme aingĩ, nĩkũlya, yu nĩwaĩlĩte kũnzyokea?

2Kwa sisya iĩmanĩ ĩũlũ kũla kũte kĩndũ wone. Ve vandũ o na vamwe ũtaakũnĩa ũmalwaya? Nĩwĩkalaa nthĩ ũtee wa nzĩa weteelete endwa maku, o tondũ Mũalavu wovasya andũ weũnĩ. Nũvukĩtye nthĩ na ũmalwaya waku mũthũku. 3Kwondũ wa ũu mbua nĩsiĩĩtwe ĩkalea kua. Mbua ya uũa nĩleete kua. Ĩndĩ o vamwe na ũu ũthyũ waku nĩ mũnyiau ta wa ĩlwaya, ndwĩ na nthoni o na vanini. 4Yu wĩmbĩkaĩla ũkasya atĩĩ, ‘Ame ĩthe wakwa, we wĩthĩĩtwe mũnyanyawa kuma wananĩ wakwa, 5ũkekalaa ũthatĩte mavinda onthe? Ũthatu waku ũkaendeea tene na tene?’ We Ĩsilaeli, ũu nĩ w'o ũneenaa, ĩndĩ ũendeeaa kwĩka mothũku onthe ala ũtonya kwĩka.”

Ngai Aitavya Andũ ma Ĩsilaeli na ma Yuta Nĩmamũsyokee

6 # 2Asu 22.1—23.30; 2Mav 34.1—35.27 Ĩvindanĩ ya kũsumbĩka kwa Yosia, Mwĩai Ngai nĩwaneenie nakwa angũlya atĩĩ, “Nĩwonete ũndũ Ĩsilaeli ũla ũte mũĩkĩĩku vala nĩĩ wĩkĩte? Nĩwambatĩte ĩũlũ wa kĩla kalĩma katũlu, na akathi ungu wa kĩla mũtĩ wĩ matũ maingĩ, na akekĩa ũmalwaya kw'o. 7Nasũanĩaa kana amina kwĩka maũndũ asu akanzyokea, ĩndĩ ndaanzyokea. Yuta, mwĩĩtu-a-inyia ũla ũte mũĩkĩĩku, nĩwoonie ũu. 8Yuta nĩwoonie kana kwondũ wa ũmalwaya w'onthe ũla Ĩsilaeli ũla ũte mũĩkĩĩku weekie, nĩnamũlũngilye na namũnenga valũa wa kũtaanĩsya. O na Yuta oona ũu ndaakĩa, ĩndĩ o nake nĩwaendie kwĩka ũmalwaya. 9Ndaaona ũmalwaya wa Ĩsilaeli ta ũndũ, kwoou nĩwavukisye nthĩ ĩsu kwa kwĩka ũmalwaya wa kũthaitha mĩvw'anano ĩseũvĩtw'e na mavia na mĩtĩ. 10Ĩtina wa maũndũ asu onthe Yuta ndaanzyokea na ngoo yake yonthe, ĩndĩ anzyokeie na ũseleke. Nĩasya ũu nyie Mwĩai Ngai.”

11Mwĩai Ngai nĩwaneenie nakwa ĩngĩ ambĩa atĩĩ, “Ĩsilaeli ũla ũte mũĩkĩĩku e kavaa kwĩ Yuta ũla nzeleke. 12Kwoou enda ũtavye Ĩsilaeli nyie Mwĩai Ngai nĩmwĩa atĩĩ,

‘Nzyokee we Ĩsilaeli ũla ũte mũĩkĩĩku,

ndikũsisya na ũthatu,

nĩkwĩthĩwa nyie Mwĩai Ngai nĩ tei,

ndikũthatĩa tene na tene.

13Ũndũ ũla waĩlĩte kwĩka no kumbũla ĩvĩtyo yaku,

kana nĩwang'endeie nyie Mwĩai Ngai, Ngai waku,

na nũthaithĩĩte ngai ngeni ungu wa kĩla mũtĩ wĩ matũ maingĩ,

na ũkalea kũmbĩw'a.’

Nĩasya ũu nyie Mwĩai Ngai.

14“Nyie Mwĩai Ngai nĩmwĩa atĩĩ:

Nzyokeai inyw'ĩ syana mũte aĩkĩĩku,

nũndũ ninyie Mwĩai wenyu.

Ngoosa mũndũ kuma ndũanĩ ĩmwe,

na elĩ kuma mũsyĩnĩ ũmwe, na ngĩmũete Saioni.

15“Ngamũnenga aĩthi mambendeeasya ala makamũtongoesya na ũĩ na ũmanyi. 16Nyie Mwĩai Ngai nĩasya atĩĩ, ‘Ĩvindanĩ yĩu, yĩla mwĩingĩva na kwongeleka mwĩ nthĩ ĩsu, mũikasyoka kũweta ĩngĩ Ĩsandũkũ yakwa ya Ũtianĩo. Mũikasũanĩa ĩũlũ wayo kana kũyĩlilikana; mũikethĩwa na vata nayo o na mũikaseũvya yĩngĩ. 17Ĩvindanĩ yĩu ndũa ya Yelũsalemu ĩkeetwa Kĩvĩla kya Kĩ-ũsumbĩ kya Mwĩai Ngai, na nthĩ syonthe ikoombanĩa Yelũsalemu itaĩe ĩsyĩtwa yakwa nyie Mwĩai Ngai, na iikasyoka kũatĩĩa kwenda kwa ngoo syoo mbũmũ na nthũku. 18Ĩvindanĩ yĩu andũ ma Yuta makakomana na andũ ma Ĩsilaeli, na makookany'a kuma nthĩ ya ngalĩko ya ĩũlũ, malike nthĩ ĩla nanengie aaũmae menyu yĩthĩwe ũtiĩwa.’

19“We Ĩsilaeli nĩnasũanĩie kũkwosa ta mwana wakwa,

na ngĩũnenga nthĩ nzeo,

nthĩ mbanake kwĩ ũtiĩwa wa mbaĩ ĩngĩ o na yĩva.

Nasũanĩaa kana ũkambĩtaa Ĩthe waku,

na ndũkaeka kũngatĩĩa.

20Ĩndĩ o tondũ kĩveti kĩte kĩĩkĩĩku kũla kwĩ mũũme kĩmũtiaa,

no w'o we Ĩsilaeli wĩthĩĩtwe ũte mũĩkĩĩku kũla nĩĩ.

Nĩasya ũu nyie Mwĩai Ngai.”

21Kĩĩo kya andũ ma Ĩsilaeli nĩkĩkwĩw'ĩka kuma iĩmanĩ ĩũlũ kũla kũte kĩndũ,

meĩa makĩmwĩkaĩla Ngai,

nũndũ nĩmelelũkĩtye mĩendele yoo,

na makolwa nĩ Mwĩai Ngai, Ngai woo.

22“Nzyokeai inyw'ĩ syana syakwa mũte aĩkĩĩku,

nakwa ngatuma mũeka kwĩthĩwa mũte aĩkĩĩku.

Nenyu mwĩasya,

‘Nĩtũkĩte tũkũsyokee, nũndũ nue Mwĩai Ngai waitũ.

23Twathaithĩa mĩvw'anano iĩmanĩ ndyaatũtethya,

mboka itaĩle ila tweekĩie kw'o syaĩ sya mana.

Ĩndĩ kwa w'o we Mwĩai Ngai, Ngai waitũ,

nue ũtangĩĩaa andũ ma Ĩsilaeli.

24“ ‘Ĩndĩ kuma twĩ anini, nĩtwanangĩte syĩndũ syonthe ila aaĩthe maitũ manoeie, kwa kũsyumĩsya mĩvw'anano yĩ nthoni: Indo syoo, ana na eĩtu moo. 25Twaĩlĩte kũkoma nthĩ twĩw'ĩte nthoni na tũivw'ĩkwa nĩ kĩvũthya, nũndũ nĩtũmũvĩtĩsye Mwĩai Ngai, Ngai waitũ. Ithyĩ na aaĩthe maitũ nĩtwamũvĩtĩisye kuma twĩ anini kũvika ũmũnthĩ; tũyaaĩw'a mĩao ya Mwĩai Ngai, Ngai waitũ.’ ”

Currently Selected:

Yel 3: KAMBA

Highlight

Copy

Compare