Yel 31
31
Andũ ma Ĩsilaeli Makasyoka Nthĩ yoo
1Mwĩai Ngai easya atĩĩ, “Mũthenya ũsu ngeethĩwa Ngai wa mĩsyĩ yonthe ya andũ ma Ĩsilaeli, namo makeethĩwa andũ makwa.”
2Mwĩai Ngai easya atĩĩ,
“Andũ ala mavonokie kũawa na ũvyũ,
nĩmooneie nesa weũnĩ,
yĩla Ĩsilaeli wamanthaa ũthũmũo,
3nĩnamumĩlĩĩle nĩ kũasa.
We Ĩsilaeli nĩngwendete na wendo ũtakathela,
kwoou nĩthĩĩtwe nĩ mũĩkĩĩku kwaku.
4Ngakwaka ĩngĩ ũlũme vyũ,
we Ĩsilaeli ũla mũseo!
Ũkoosa ndambulĩnĩ syaku o ĩngĩ,
na ũithi ũkasũnge vamwe na ala meũtana.
5Ũkavanda mĩũnda ya mĩsavivũ o ĩngĩ iĩmanĩ sya Samalia;
aĩmi makamĩvanda na maitanĩa mosyao mayo!
6Nũndũ mũthenya nĩwũkĩte,
yĩla asyaĩĩsya meĩtana na wasya mũnene,
me nthĩ yĩ iĩma ya Evalaimu mayasya,
‘Ũkai twambate Saioni,
kũla kwĩ Mwĩai Ngai, Ngai waitũ!’ ”
7Mwĩai Ngai easya atĩĩ,
“Inĩai Ĩsilaeli na wasya mũnene wa ũtanu,
kumyai mbaĩ ĩsu nene kwĩ mbaĩ ila ingĩ syonthe.
Tavany'ai, taĩai, na mũyasya,
‘Ame Mwĩai Ngai tangĩĩa andũ maku,
andũ ma Ĩsilaeli ala matialĩte.’
8Ngamaumya nthĩ ya ngalĩko ya ĩũlũ,
na ngĩmombany'a kuma kĩla vandũ ĩũlũ wa nthĩ.
Makeethĩwa vamwe na ilalinda na ala me maũũ mathũku,
aka aito na ala mekwaũnya,
nguthu nene mũno ya andũ ĩkasyoka vaa.
9Andũ makwa makasyoka maĩĩte,
makamboya nĩendee kũmatũnga.
Ngamesĩlya ũtee wa tũlũsĩ twĩ kĩw'ũ,
nzĩanĩ ndũngalu ĩla matakaluluutĩka.
Nũndũ ninyie ĩthe wa Ĩsilaeli,
na Evalaimu nĩ we mwana wakwa wa mbee.”
10Mwĩai Ngai easya atĩĩ,
“Inyw'ĩ andũ ma nthĩ syonthe mbĩthukĩĩsyei,
tavany'ai nginya kũndũ kũasa ndeenĩ sya ũkanga mwasye atĩĩ,
‘Ũla wanyaĩĩkisye andũ ma Ĩsilaeli akamombany'a,
na kũmasũvĩa ũndũ mũĩthi ũsũvĩaa malondu make.’
11Nũndũ nyie Mwĩai Ngai nĩndangĩĩe andũ ma Ĩsilaeli,
na ngamavonokya kuma nthĩ syĩ vinya mbee woo.
12Makooka Kĩĩmanĩ kya Saioni ĩũlũ na mayina na ũtanu;
makeew'a mũyo nũndũ wa mĩthĩnzĩo yakwa nyie Mwĩai Ngai,
mĩthĩnzĩo ya ngetha ya mbaa mbeke, ndivai na mauta,
mĩthĩnzĩo ya tũtena twa malondu na twa mbũi, na tũsaũ twa ng'ombe.
Makeethĩwa mailyĩ ta mũũnda mũnyithye nesa,
na maikaĩwa ĩngĩ nĩ kĩndũ.
13Nĩvo ĩndĩ eĩtu mesũnga na kwĩw'a mũyo,
na anake na atumĩa maitana,
ngatuma kĩĩo kyoo kĩtw'ĩka ũtanu;
ngamakiakisya na ngĩtw'ĩkĩthya kĩmako kyoo ũtanu.
14Ngavũnĩthya athembi na syĩndũ ila nou,
na ngavũnĩthya andũ na syĩndũ nzeo.
Nĩasya ũu nyie Mwĩai Ngai.”
Tei wa Mwĩai Ngai kwa Andũ ma Ĩsilaeli
15 #
Mwa 35.16-19; Mat 2.18 Mwĩai Ngai easya atĩĩ,
“Wasya nũkwĩw'ĩka Lama,
kyeva na kĩĩo kĩ woo.
Laeli akĩĩa nũndũ wa syana syake,
na ndekwĩtĩkĩla kũkiakiw'a,
nĩkwĩthĩwa syonthe nĩ ngw'ũ.”
16Mwĩai Ngai easya atĩĩ,
“Eka kũĩa,
vangũla methoi maku,
nũndũ ũkatuvwa nũndũ wa wĩa waku,
syana syaku ikasyoka kuma nthĩ ya mũmaitha.”
Nĩasya ũu nyie Mwĩai Ngai.
17Kwoou kwaku ve wĩkwatyo ĩvindanĩ yũkĩte,
na syana syaku ikasyoka nthĩ yasyo ene.
Nĩasya ũu nyie Mwĩai Ngai.
18“Kwa w'o nĩnĩw'ĩte andũ ma Ĩsilaeli makĩĩa mayasya atĩĩ,
‘Mwĩai Ngai twailyĩ ta nzaũ ite manyĩsye wĩa,
ĩndĩ watũmanyĩsya kwĩthĩwa twĩ ewi.
Tũtũnge, nĩtwĩyũmbanĩtye kũsyoka kwaku,
nũndũ nue Mwĩai Ngai, Ngai waitũ.
19Nũndũ ĩtina wa ũkũtia nĩtweelilile,
twamina kũmanyĩw'a nĩtwakwatiwe nĩ kyeva mũno,
nũndũ wa mavĩtyo maitũ.
Twaĩ na nthoni na tũkavũavũana,
nũndũ twaĩ na mavĩtyo ma kuma twĩ anini.’
20“Nĩkũlya, nũndũ we Ĩsilaeli ũte mwana wakwa mwendwa?
Nũndũ ũte mwana ũla ũmbendeeasya mũno?
Nĩkwĩthĩwa o na vala nĩngũneeneaa ũthũku,
nĩthĩawa o ngũlilikanĩte.
Kwoou ngoo yakwa nĩkũkwenda;
kwa w'o ngakwĩw'ĩa tei.
Nĩasya ũu nyie Mwĩai Ngai.
21“Ĩseũvĩsye movano ma nzĩa,
na seũvyai ivwaũ sya kũmwony'a nzĩa;
sisyai nesa nzĩa nene;
nzĩa ĩla mwesĩlile yĩla mwaendete.
Inyw'ĩ andũ ma Ĩsilaeli,
syokai ndũanĩ ii syenyu.
22Mwĩendeea kwanganga nginya ĩndĩĩ,
inyw'ĩ andũ aa mũte aĩkĩĩku?
Nũndũ nyie Mwĩai Ngai nĩnũmbĩte ũndũ mweũ ĩũlũ wa nthĩ:
Mũndũ mũka akasunga mũndũ-ũme ndakavithũkĩwe.”
Andũ ma Ngai Makaendeea nesa Ĩvindanĩ Yũkĩte
23Mwĩai Ngai Mwene Ũtonyi W'onthe, Ngai wa Ĩsilaeli easya atĩĩ, “Yĩla ngatũngĩa andũ makwa moathimo moo, me nthĩ ya Yuta na ndũanĩ syayo, makaneena ĩngĩ masye atĩĩ,
‘Mwĩai Ngai nĩakũathime we kĩĩma kĩtheu,#31.23 kĩĩma kĩtheu: Kĩĩ nĩ Kĩĩma kya Saioni, kĩla ĩũlũ wakyo vaakĩtwe Ĩkalũ na nyũmba ya mũsumbĩ.
we wĩkalo wa ũlũngalu.’
24“Andũ makatũa vamwe nthĩ ya Yuta na ndũanĩ syayo syonthe, o na vakeethĩwa aĩmi na aĩthi ala mangangaa na ndĩthya syoo sya mbũi na malondu. 25Ngathũmũsya ala manoete, na ngavũnĩthya andũ onthe ala monzetw'e nĩ nzaa. 26Nĩvo ĩndĩ andũ measya atĩĩ, ‘Nĩendie kũkoma na neethĩwa na too mũseo.’
27“Nyie Mwĩai Ngai nĩasya kana ĩvinda nĩyũkĩte yĩla ngausũsya nthĩ ya Ĩsilaeli na Yuta andũ na nyamũ. 28Na o tondũ namasyaĩĩsye namakũa na namaomboa, namang'uthũla, namamina na namaetee ũthũku, no w'o nĩmasyaĩĩsya nĩmavande na kũmaka. 29#Esek 18.2 Ĩvindanĩ yĩu maikethĩwa matonya kũneena na kwasya,
‘Asyai nĩmaĩe nzavivũ syĩ ngaati,
na maeo ma syana me na nthithi.’
30Ĩndĩ kĩla mũndũ akakw'a nũndũ wa naĩ yake mwene: Mũndũ ũla wĩya nzavivũ syĩ ngaati, maeo make mwene nĩ mo mekwatwa nĩ nthithi.”
31 #
Mat 26.28; Mk 14.24; Lk 22.20; 1Ako 11.25; 2Ako 3.6 #Aevl 8.8-12 Mwĩai Ngai easya atĩĩ, “Ĩvinda nĩyũkĩte yĩla nyie ngaseũvya ũtianĩo mweũ na andũ ma Ĩsilaeli na ma Yuta. 32Ũtianĩo ũsu ndũkethĩwa ũilyĩ ta ũla natianĩie na aaũmae moo, yĩla namatongoesye na vinya wakwa maume nthĩ ya Misili. Nĩmaleile kwĩanĩsya ũtianĩo ũsu, o na vala nyie nailyĩ ta mũũme woo. Nĩasya ũu nyie Mwĩai Ngai. 33#Aevl 10.16 Ũũ nĩ w'o ũtianĩo ũla ngaseũvya na andũ ma Ĩsilaeli ĩtina wa ĩvinda yĩu:
Ngeekĩa mĩao yakwa nthĩnĩ woo,
na ngamĩandĩka ngoonĩ syoo.
Nyie ngeethĩwa Ngai woo,
namo makeethĩwa andũ makwa.
Nĩasya ũu nyie Mwĩai Ngai.
34 #
Aevl 10.17
Vaikethĩwa ĩngĩ mũndũ ũkũmanyĩsya mũtũi wake, kana mũndũ ũkũmanyĩsya mwana-a-inyia amwĩe, ‘Mũmanye Mwĩai Ngai,’ nũndũ andũ onthe anene na anini makamanya nyie Mwĩai Ngai. Ngamaekea mavĩtyo moo, o na ndikalilikana naĩ syoo ĩngĩ. Nĩasya ũu nyie Mwĩai Ngai.”
35Mwĩai Ngai ũla ũtumaa syũa yĩthĩwa kyeni kya mũthenya,
na kũtuma mwei na ndata syĩthĩwa kyeni kya ũtukũ,
ũla ũtumaa ũkanga wũkĩlya itulumo,
na ũla ĩsyĩtwa yake nĩ Mwĩai Ngai Mwene Ũtonyi W'onthe easya atĩĩ:
36“O tondũ ndakaeka kũtuma maũndũ asu mekĩka,
nyie Mwĩai Ngai nĩasya kana,
no w'o andũ ma Ĩsilaeli matakaeka kwĩthĩwa me andũ makwa tene na tene.”
37Mwĩai Ngai easya atĩĩ,
“Kethĩwa matu nĩmathimwa,
na myambĩlĩĩlyo ya nthĩ ĩimanthwa,
no nĩkye andũ ma Ĩsilaeli ĩtheka,
nũndũ wa maũndũ onthe ala mekĩte.
Nĩasya ũu nyie Mwĩai Ngai.
38“Ĩvinda nĩyũkĩte yĩla ndũa ĩno yĩakwa ĩngĩ kwondũ wakwa. Ĩkaakwa kuma Mwakonĩ Mũtũlu wa Ananeli nginya Mũvĩanĩ wa Konanĩ. 39Ũlii wa kũthima ũkatambũũkw'a ũlũngalĩte, nginya kalĩmanĩ ka Ngalevu na kũthyũlũlũka nginya Ngoa. 40Mwandanĩ w'onthe vala mĩĩ ya andũ akw'ũ na mũu syĩkaw'a, o vamwe na isesi syonthe kũvika kalũsĩnĩ ka Kĩtilonĩ, nginya konanĩ ya Mũvĩa wa Mbalasi ngalĩko ya wumĩlonĩ wa syũa, kw'onthe kũkeethĩwa kwĩ kũndũ kũtheu kwondũ wakwa nyie Mwĩai Ngai. Kũu vai kĩndũ kĩkanangwa kana kũombowa ĩngĩ tene na tene.”
Currently Selected:
Yel 31: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
