Yel 32
32
Yelemia Aithooa Mũũnda Anathothi
1 #
2Asu 25.1-7
Mwĩai Ngai nĩwaneenie na Yelemia mwakanĩ wa ĩkũmi wa kũsumbĩka kwa Nzetekia mũsumbĩ wa Yuta, ũla nĩ w'o waĩ mwaka wa ĩkũmi na nyanya wa kũsumbĩka kwa Nevukatinesa. 2Ĩvindanĩ yĩu, asikalĩ ma Nevukatinesa mũsumbĩ wa Mbavilonĩ mathyũlũlũkĩte ndũa ya Yelũsalemu, nake mwathani Yelemia avingĩĩtwe kĩwanzanĩ kya asyaĩĩsya, kĩla kyaĩ nyũmbanĩ ya kĩ-ũsumbĩ ya mũsumbĩ wa Yuta. 3Yelemia avingĩĩtwe vau nĩ Mũsumbĩ Nzetekia ũla waneenete akamũkũlya atĩĩ, “Yelemia, nĩ kyaũ kĩũtuma wathana ũkasya kana Mwĩai Ngai easya, ‘Nĩngũnengane ndũa ĩno ũtonyinĩ wa mũsumbĩ wa Mbavilonĩ nake aimyosa. 4Nzetekia mũsumbĩ wa Yuta ndakavonoka kuma mokonĩ ma Akalitei. Vate nzika akanenganwe kũla kwĩ mũsumbĩ wa Mbavilonĩ, na akoonana nake metho kwa metho na kũneenany'a nake masyaanĩtye. 5Nzetekia akooswa atwawe Mbavilonĩ, na akekala kw'o nginya yĩla ngekana nake ũndũ ngwenda. O na Nzetekia okita na andũ ma Mbavilonĩ ndakamasinda. Nĩasya ũu nyie Mwĩai Ngai.’ ”
6Yelemia nĩwaneenie asya kana Mwĩai Ngai nĩwaneenie nake amwĩa atĩĩ, 7“Anameli mwana wa Salumu mwendw'a-ĩthe waku akooka kũla ũĩ na aikwĩa atĩĩ, ‘Thooa mũũnda wakwa ũla wĩ ndũanĩ ya Anathothi, nũndũ we nakwa twĩ ũndũ tũileny'e, na kwoou nue wĩ na ũthasyo wa kũũthooa, ndũkathoowe nĩ mũndũ ũte wa mũsyĩ witũ.’ ”
8Nĩvo ĩndĩ Anameli mwana wa mwendw'a-ĩthe wakwa wookie kũla nĩĩ kĩwanzanĩ kya asyaĩĩsya, kwĩanana na ũndũ Mwĩai Ngai wandavĩtye. Anameli nĩwambĩie atĩĩ, “Thooa mũũnda wakwa ũla wĩ ndũanĩ ya Anathothi kĩsionĩ kya nthĩ ya mbaĩ ya Mbengyameni, nũndũ we nakwa twĩ ũndũ tũileny'e, na kwoou nue wĩ na ũthasyo wa kũũthooa, ndũkathoowe nĩ mũndũ ũte wa mũsyĩ witũ. Kwoou ũthooe ũtw'ĩke waku.” Nĩvo ĩndĩ namanyie kana kwa w'o Mwĩai Ngai nĩ we waneenete ũu.
9Kwoou nyie nĩnathooie kuma kwa Anameli mwana wa mwendw'a-asa mũũnda ũsu waĩ Anathothi. Nĩnamũthimĩie silĩva wa ngulamu maana elĩ namũĩva. 10Nĩneekĩie saii na natumba mũulĩ valũa wa kwonany'a kana nĩnathooa mũũnda ũsu, neeta ngũsĩ na nathima silĩva ũsu. 11Nĩvo ĩndĩ noosie valũa ũsu wa kwonany'a kana nĩnathooa mũũnda. Valũa ũsu waĩ mũtumbe mũulĩ, na waĩ na mĩao ya ũndũ tweew'ana. Nĩnawosanĩisye na ũngĩ ũtaĩ mũtumbe mũulĩ. 12Nĩnanengie Mbaluku mwana wa Nelia ũla waĩ mwana wa Maaseia valũa isu syelĩ. Namũnengie valũa isu twĩ mbee wa Anameli mwana wa mwendw'a-asa, na ngũsĩ ila syeekĩĩte valũa saii yĩla nathooaa mũũnda, o vamwe na Ayuti onthe ala mailyĩ kĩwanzanĩ kya asyaĩĩsya. 13Nĩnamwĩaĩie Mbaluku mayĩw'a namwĩa atĩĩ, 14“Mwĩai Ngai Mwene Ũtonyi W'onthe, Ngai wa Ĩsilaeli easya nĩwose valũa ii syelĩ, ũũ mũtumbe mũulĩ na ũũ ũte mũtumbe mũulĩ, na ũisyĩkĩa mbisũnĩ ya yũmba nĩ kana syĩkale ũsũvĩonĩ vandũ va ĩvinda ĩasa. 15Mwĩai Ngai Mwene Ũtonyi W'onthe, Ngai wa Ĩsilaeli easya: Nyũmba, mĩũnda na mĩũnda ya mĩsavivũ ila syĩ nthĩ ĩno ikathoowa ĩngĩ.”
Mboya ya Yelemia
16Namina kũnenga Mbaluku mwana wa Nelia valũa wa kwonany'a kana nĩnathooa mũũnda, nĩnamũvoyie Mwĩai Ngai ndyasya atĩĩ, 17“Ame Mwĩai Ngai Mũsumbĩ! We nue kwa vinya waku mwingĩ na ũtonyi waku mũnene woombie ĩtu na nthĩ. We vai ũndũ ũkũema. 18Nĩwonanasya wendo waku ũtaolekaa kwa andũ ngili mbingĩ, ĩndĩ nũkanasya andũ nũndũ wa naĩ sya aaũmae moo. We Ngai mũnene mwene vinya, Mwĩai Ngai Mwene Ũtonyi W'onthe nĩyo ĩsyĩtwa yaku. 19Ũvangaa maũndũ manene, na meko maku nĩ manene. Nĩwonaa maũndũ onthe ala andũ mekaa, na ũmatuvaa kwĩanana na mĩendele yoo na meko moo. 20Nĩweekie syama na maũndũ ma kũseng'ya nthĩ ya Misili, na no ũendee kwĩka syama isu nginya ũmũnthĩ, kũla kwĩ andũ ma Ĩsilaeli na andũnĩ ala angĩ onthe, ũkethĩa kũvika o na ũmũnthĩ wĩsĩkĩe kĩla vandũ. 21Nĩwaumisye andũ maku nthĩ ya Misili ũitũmĩa syama na maũndũ ma kũseng'ya, vinya waku mũnene na ũtonyi vamwe na motĩsyo manene. 22Nĩwamanengie nthĩ ĩno nthwii na nou, o tondũ weevĩtie kũla kwĩ aaũmae moo wamatha kũmanenga. 23Nĩmalikile na mamyosa mamĩmesya, ĩndĩ nĩmaleile ũkwĩw'a kana kũatĩĩa mĩao yaku. Mayaaĩka maũndũ onthe ala wameaĩie. Kwoou kĩu nĩkyo kyatumie ũmaetee ũthũku ũũ.
24“Andũ ma Mbavilonĩ nĩmakĩte ivumbu ikathyũlũlũka ndũa nĩ kana mamĩkwate. Nũndũ wa kaũ, nzaa na ũwau mũthũku, ndũa ĩno nĩnenganĩtwe ũtonyinĩ wa andũ ma Mbavilonĩ ala meũmyũkita. Kwa w'o maũndũ ala waneenie nĩmekĩkĩte, naku we nĩwene ũu. 25Ĩndĩ we Mwĩai Ngai Mũsumbĩ nue waneenie nakwa wambĩa, ‘Thooa mũũnda na mbesa na ũyĩthĩwa na ngũsĩ,’ o na kau ndũa ĩno nĩnenganĩtwe ũtonyinĩ wa andũ ma Mbavilonĩ.”
26Nĩvo ĩndĩ Mwĩai Ngai waneenie na mwathani Yelemia amwĩa atĩĩ, 27“Ninyie Mwĩai Ngai, Ngai wa andũ onthe. Nĩkũlya, ve ũndũ wĩ vinya ũkethĩa nyie no nĩemwe nĩw'o? 28#2Asu 25.1-11; 2Mav 36.17-21 Kwoou nyie Mwĩai Ngai nĩasya kana nganengane ndũa ĩno ũtonyinĩ wa andũ ma Mbavilonĩ, na wa Nevukatinesa mũsumbĩ woo nake akamĩkwata. 29Andũ ma Mbavilonĩ ala mavithũkĩĩte ndũa ĩno makamĩlika na maimĩvĩvya. Makamĩvĩvanĩsya na nyũmba syayo ila iala syasyo syatũmĩawa kũvĩvĩsya ngai ĩla yĩtawa Mbaali ũvani, na kumĩsya nthembo sya kũnyuwa sya ndivai ila syaumĩaw'a ngai ingĩ nĩ kana inthatye. 30Andũ ma Ĩsilaeli na ma Yuta mayaaĩka ũndũ ũngĩ, ate o kwĩka naĩ kuma mwambĩlĩĩlyonĩ woo. Andũ ma Ĩsilaeli mayaaĩka ũndũ ũngĩ, ate o kũnthatya na meko moo. Nĩasya ũu nyie Mwĩai Ngai. 31Ndũa ĩno nĩtumĩte nĩthĩwa nĩ mũthatu na nĩ na ũthilĩku, kuma yĩla yaakiwe nginya ũmũnthĩ. Kwoou nĩngũmĩvetanga vyũ nĩeke kũmyona, 32nũndũ wa ũthũku w'onthe ũla andũ ma Ĩsilaeli na ma Yuta mekĩte makanthatya. Mekĩte ũu me vamwe na asumbĩ na atongoi moo, athembi na athani moo, na andũ ma Yuta na ala matwĩe Yelũsalemu. 33Mambonetye mĩongo yoo vandũ va kũnzisya. O na kau namamanyĩisye mavinda maingĩ, mayaaĩthukĩĩsya na kũkwata momanyĩsyo makwa. 34#2Asu 23.10; Yel 7.30-31; 19.1-6 Meekĩie mĩvw'anano ya kũthatya ya ngai syoo nthĩnĩ wa nyũmba ĩno yĩtanĩaw'a nakwa mamĩvukye. 35#Ali 18.21; 2Asu 23.10; Yel 7.31 Maakĩie ngai ĩla yĩtawa Mbaali kĩthembeo Mwandanĩ wa Mbeni-inomu, nĩ kana mathembeae ngai ĩla yĩtawa Moleki ana moo na eĩtu moo, o na kau ndyaameaĩa meke ũu, o na ndyasũanĩaa kana nĩmatonya kwĩka ũndũ ũsu wa kũthatya, na kũtuma andũ ma Yuta meka naĩ.”
Andũ ma Ĩsilaeli Mayathwa Wĩkwatyo
36Kwoou Mwĩai Ngai, Ngai wa Ĩsilaeli nĩwaneenie nakwa ambĩa atĩĩ, “Yelemia, andũ aa measya kana nũndũ wa kaũ, nzaa na ũwau mũthũku, ndũa ĩno nĩkwoswa nĩ mũsumbĩ wa Mbavilonĩ. Ĩndĩ nyie nĩasya: 37Ngoombany'a andũ kuma nthĩ syonthe kũla namanyaĩĩkĩsye, nũndũ wa ũthatu na ũthilĩku wakwa mũnene. Ngamatũnga vaa ĩngĩ, na ngĩtuma mekala me ũsũvĩonĩ. 38Makeethĩwa andũ makwa, nakwa ngeethĩwa Ngai woo. 39Ngamanenga ngoo ĩmwe, na kĩeleelo kĩmwe, methĩwe me na kĩkĩo kyakwa tene na tene kwondũ wa ũseo woo ene, na ũseo wa syana syoo ila syĩũka ĩtina woo. 40Ngaseũvya namo ũtianĩo wa tene na tene, kana ndikaeka o na ĩndĩĩ kũmeka nesa, ngeekĩa ngoonĩ syoo kwĩthĩwa me na kĩkĩo kyakwa, nĩ kana maikaandie ĩngĩ. 41Ngatanĩa kũmeka nesa na ngamekalya nthĩ ĩno tene na tene, nĩyumĩtye na thayũ wakwa na ngoo yakwa yonthe.
42“Nyie Mwĩai Ngai nĩasya kana o tondũ naeteie andũ aa ũndũ ũũ ũthũkĩte ũu, no w'o nĩmaetee moseo onthe ala nĩmathĩte. 43Andũ makathooa mĩũnda nthĩ ĩno ũũneena ũkasya kana ĩtiĩtwe yĩ nthei, ĩte na andũ kana nyamũ, na kana ĩnenganĩtwe ũtonyinĩ wa andũ ma Mbavilonĩ. 44Andũ makathooa mĩũnda na mbesa, na valũa syoo sya kwonany'a kana nĩmathooa mũũnda ikeekĩwa saii, itumbwe mũulĩ na vayĩthĩwa ngũsĩ. Mĩũnda ĩsu ĩkathoowa kĩsionĩ kya nthĩ ya Mbengyameni, isionĩ ila syĩ vakuvĩ na Yelũsalemu, ndũanĩ sya Yuta, ndũanĩ ila syĩ nthĩ yĩ iĩma, ndũanĩ ila syĩ nthĩ yĩ nguumo wa iĩma yĩ ngalĩko ya ũthũĩlonĩ wa syũa, na ndũanĩ ila syĩ ngalĩko ya ĩtheo ĩla yĩtawa Nengevu. Ũu ũkeethĩwa nũndũ ngatuma mũendeea nesa ĩngĩ. Nĩasya ũu nyie Mwĩai Ngai.”
Currently Selected:
Yel 32: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
