Yel 30
30
Ngai Ayatha Andũ make Kũmatũnga Nthĩ yoo
1Mwĩai Ngai nĩwaneenie na Yelemia amwĩa atĩĩ, 2“Ũũ nĩ w'o nyie Mwĩai Ngai, Ngai wa Ĩsilaeli ngwasya: Andĩka ĩvukunĩ maũndũ onthe ala ngũtavĩtye. 3Nũndũ nyie Mwĩai Ngai nĩasya kana ĩvinda nĩyũkĩte yĩla ngatũngĩĩa moathimo ma andũ makwa Ĩsilaeli na Yuta, na ngĩmatũnga nthĩ ĩla nanengie aaũmae moo mamĩmesye.”
4Maũndũ aa nĩmo Mwĩai Ngai waneenie ĩũlũ wa Ĩsilaeli na Yuta:
5Ũũ nĩ w'o Mwĩai Ngai ũkwasya:
“Nĩtwĩw'ĩte wasya wa kũtelemya,
wa kwĩw'ĩthya w'ĩa na ti wa mũuo.
6Kũlyai yu mũmanye:
Mũndũ-ũme nũtonya kũsyaa kana?
Nĩkĩ ĩndĩ ngwona kĩla mũndũ-ũme ekwete ivose,
ta mũndũ mũka ũkwaũnya?
Nĩkĩ kĩla mũndũ ũtukĩtye ũthyũ?
7Asi! Mũthenya ũsu nĩ mũnene,
vai ũngĩ ũilyĩ ta w'o,
nĩ ĩvinda ya thĩna kwa ũsyao wa Yakovo,
ĩndĩ ũu wĩ o vo, makatangĩĩwa kuma thĩnanĩ ũsu.
8“Mũthenyanĩ ũsu, nyie Mwĩai Ngai Mwene Ũtonyi W'onthe nĩasya kana ngatũlanga na kumya ĩsoki yĩla yĩ ngingonĩ syoo, na ngatusanga syĩndũ ila movetwe nasyo, na aeni maikamatw'ĩkĩthya ngombo syoo ĩngĩ. 9Ĩndĩ makamũthũkũmaa Mwĩai Ngai, Ngai woo na mũsumbĩ wa nzyawa ya Ndeviti ũla nĩmanyuvĩa.
10 #
Yel 46.27-28
“Kwoou nyie Mwĩai Ngai nĩkwĩa,
‘Ndũkakĩe we Yakovo mũthũkũmi wakwa,
o na ndũkateleme we Ĩsilaeli;
nũndũ ngakũtangĩĩa kuma nthĩ yĩ kũasa,
ngatangĩĩa ũsyao waku kuma nthĩ ĩla mataviwe matwawa.
Yakovo akasyoka na kwĩkala auĩtye na athũmũĩte,
na vai mũndũ ũkatuma akĩa.
11Nũndũ nyie Mwĩai Ngai nĩasya kana nĩ vamwe naku ngũtangĩĩe.
Ngamina vyũ mbaĩ syonthe ila namũnyaĩĩkĩisye kwoo,
ĩndĩ inyw'ĩ ndikamũmina vyũ,
o na kau ndilea kũmũkany'a;
ngamũsilĩla ũsilĩlo ũla ũmwĩanĩe.’
12“Nyie Mwĩai Ngai nĩasya:
Ũũmĩu waku ndũvoeka,
na kĩtau kyaku kĩyĩiitĩka.
13Vai mũndũ o na ũmwe wa ũkũtetea,
vai ndawa ya kĩtau kyaku,
we ndũiitĩka.
14Endwa maku onthe nĩmolĩtwe nue,
mai na vata naku yu,
nũndũ ngũkũnĩte ũndũ mũmaitha ũkũnawa.
Ngũkanĩtye ta nthũ ĩte tei,
nĩkwĩthĩwa ĩvĩtyo yaku nĩ ĩnene,
na naĩ syaku nĩ mbingĩ.
15Yu wĩĩa nĩkĩ nũndũ wa kũũmĩw'a kwaku?
Kyalya kyaku kĩivoeka.
Nĩkwĩthĩwa ĩvĩtyo yaku nĩ ĩnene,
na nĩkwĩthĩwa naĩ syaku nĩ mbingĩ,
nĩngwĩkĩte maũndũ aa.
16Ĩndĩ onthe ala makũminaa makaminwa,
na amaitha maku onthe makatwawa me atave.
Onthe ala makũtavie makatavwa,
na onthe ala makũsyĩmaa ngamatw'ĩkĩthya ma kũsyĩmwa.
17“Nyie Mwĩai Ngai nĩasya kana ngatuma wĩthĩwa na ũima wa mwĩĩ ĩngĩ,
na ngavosya itau syaku;
nĩkwĩthĩwa andũ makwĩtaa mũlũngw'a,
na maneenaa makasya, ‘Nĩ Saioni, ĩla ĩte na mũndũ wa kũmĩsũvĩa.’
18“Ũũ nĩ w'o Mwĩai Ngai ũkwasya:
Ngatũngĩĩa moathimo ma mĩsyĩ ya andũ ma Yakovo,
na ngeew'ĩa mawĩkalo moo tei.
Ndũa ya Yelũsalemu ĩkaakwa ĩngĩ kĩvumbunĩ kyayo,
na nyũmba ya kĩ-ũsumbĩ ĩkaakwa vala yaĩ mbeenĩ.
19Andũ ala meĩthĩwa matwĩe kw'o,
makaina mbathi sya kũtũnga mũvea,
na makookĩlya mawasya ma ũtanu.
Ngamaingĩvya na maikethĩwa avũthũ,
ngatuma manengwa ndaĩa na maikavũthw'a.
20Syana syoo ikeethĩwa o tondũ syailyĩ mbeenĩ,
na wũmbano woo ũkalũlũmĩĩlw'a mbee wakwa,
nakwa ngakany'a onthe ala mamathĩnasya.
21Makasumbĩkwa nĩ ũmwe woo ene,
mũtongoi woo akauma katĩ woo.
Ngamũthengeesya, nake akanthengeea,
nũndũ nũũ wĩ na ũkũmbaũ wa kũnthengeea?
Nĩasya ũu nyie Mwĩai Ngai.
22Nenyu mũkeethĩwa andũ makwa,
nakwa ngeethĩwa Ngai wenyu.”
23Kwoou ũthatu mwai wa Mwĩai Ngai wũkĩte ta kĩuutani!
Ũthilĩku wake wũkĩte ũilyĩ ta kĩlingi;
kĩkatolekela mĩtwenĩ ya andũ ala athũku.
24Ũthatu wa Mwĩai Ngai ndwĩusya,
kũvika eke na kwĩanĩsya ũndũ ũvangĩte.
Ĩvindanĩ yũkĩte mũkamanya maũndũ asu nesa.
Currently Selected:
Yel 30: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
