Yel 2
2
Ngai Ayĩsũva Andũ ma Ĩsilaeli Mamũsyokee
1Mwĩai Ngai nĩwaneenie nakwa ambĩa atĩĩ, 2“Enda ũkatavye andũ ma Yelũsalemu nyie Mwĩai Ngai nĩasya atĩĩ,
‘Nĩngũlilikana ũndũ we Yelũsalemu weeyumĩtye yĩla waĩ wa mũika,
ũndũ wambendete o tondũ mũtwawa wendaa mũũme,
na wangatĩĩa twesĩla weũnĩ,
nthĩ ĩte mbande kĩndũ.
3We Ĩsilaeli waĩ mũtheu kwakwa nyie Mwĩai Ngai,
waĩ ũsyao wa mbee wa ngetha yakwa.
Onthe ala makũthĩnisye namatalile kwĩthĩwa avĩtany'a,
na namaetee wanangĩko. Nĩasya ũu nyie Mwĩai Ngai.’ ”
Mavĩtyo ma Andũ ma Ĩsilaeli
4Ĩthukĩĩsyei ndeto ya Mwĩai Ngai inyw'ĩ nzyawa sya Yakovo,
ĩĩ, ĩthukĩĩsyei inyw'ĩ mĩsyĩ yonthe ya andũ ma Ĩsilaeli.
5Ũũ nĩ w'o Mwĩai Ngai ũkwasya:
“Nĩ ĩvĩtyo yaũ yĩla aaũmae menyu mambonie nayo,
na yatuma mathi kũasa nakwa?
Nĩmaatĩĩie mĩvw'anano ya mana,
na o namo matw'ĩka ma mana.
6O na mayaakũlya, ‘Aĩva Mwĩai Ngai,
ũla watumisye nthĩ ya Misili,
ũla watũtongoeisye weũnĩ,
atwĩsĩlya nthĩ ya kĩthangathĩ kĩthei na yĩ maima,
nthĩ ĩte kĩw'ũ na yĩ mĩisyo,
nthĩ ĩtatũaa andũ na ĩtesĩlawa?’
7Nĩnamũetie namũlikya nthĩ nou,
mũĩsae mosyao ma yo na syĩndũ sya yo nzeo.
Ĩndĩ mwalika nĩmwavukisye nthĩ yakwa,
na mwatw'ĩkĩthya ũtiĩwa wakwa kĩndũ kya kũthatya.
8Athembi mayaakũlya, ‘Aĩva Mwĩai Ngai?’
O na kau nĩ mo mamanyĩasya mĩao, maimbĩsĩ.
Atongoi na mo nĩmang'endeie;
na mo athani mathanie ĩsyĩtwanĩ ya Mbaali,
na mathaithaa mĩvw'anano ya mana.”
Ĩkoani ya Mwĩai Ngai na Andũ Make
9“Kwoou nyie Mwĩai Ngai nĩasya kana nĩ na ĩkoani nenyu ĩngĩ,
ngasila nginya nĩsile na nzyawa syenyu.
10Endai ngalĩko ya ũthũĩlonĩ wa syũa kũvika kĩthamanĩ kya Saivulasi mũkasisye,
tũmanai wumĩlonĩ wa syũa kũvika nthĩ ya Ketali na mũĩsisya nesa,
mwone kana ve ũndũ ta ũũ waaĩkĩka:
11Ve mbaĩ yaakũany'a ngai syayo o na kau no ngai sya mĩvw'anano?
Ĩndĩ andũ makwa nĩmangũanĩtye nyie Ndaĩa yoo,
mangũanĩtye na mĩvw'anano ya mana.
12Inyw'ĩ matu seng'ai nĩ ũndũ ũũ,
nyie Mwĩai Ngai nĩmwĩa nĩmũteleme na mũimaka mũno,
13nũndũ andũ makwa nĩmekĩte mothũku elĩ:
Mbee nĩmandiĩte nyie,
ũla ninyie mbuluti ya kĩw'ũ kĩetae thayũ.
Kelĩ meyakĩe ithima,
ithima mbatũkangu italũmya kĩw'ũ!
Wasyo ũla Andũ ma Ĩsilaeli Makwatĩte nũndũ wa Kũmũtia Ngai
14“Nĩkũlya, Ĩsilaeli nĩ ngombo? Kana ko wasyaiwe e ngombo?
Nĩkĩ ĩndĩ ũtindaa asyĩmĩtwe nĩ amaitha make?
15Nĩmamũkoomeie ta mũnyambũ,
ĩĩ, mamũkoomea na wasya mũnene.
Nĩmanangĩte nthĩ yake ĩkatiwa yĩ nthei,
ndũa syake nĩ mbĩvye ikatiwa ite andũ.
16O na andũ ma ndũa sya Memivisi na Tavanesi,
nĩmakũnie lolotya wa mũtwe wake waatũka.
17We Ĩsilaeli tyo ue weeyĩeteie thĩna ũũ mũnene,
kwa kũmũtia Mwĩai Ngai, Ngai waku,
o yĩla wakũtongoesye nzĩanĩ?
18Yu wĩona ta wĩkwata kyaũ wathi nthĩ ya Misili,
kũnyw'a kĩw'ũ kya Ũsĩ wa Naeli?
Kana wĩona ta wĩkwata ũseo mwaũ wathi nthĩ ya Asuli,
kũnyw'a kĩw'ũ kya Ũsĩ wa Euvalati?
19Ũthũku waku ũkakũkany'a,
na kũsyoka na ĩtina kwaku kũkakũsilĩla.
Ũkatia wamanya kana nĩ ũndũ mũthũku na wĩ wũũ,
kũmũtia Mwĩai Ngai, Ngai waku.
Nyie Mwĩai Ngai Mũsumbĩ Mwene Ũtonyi W'onthe,
nĩasya kana we ndwĩ na kĩkĩo kyakwa o na vanini.”
Andũ ma Ĩsilaeli Mailea Kũthaitha Mwĩai Ngai
20Mwĩai Ngai Mũsumbĩ easya atĩĩ,
“Navu tene we Ĩsilaeli nĩwatũlile ĩsoki yaku yĩla nakũtongoeasya nayo,
na watusanga makanda maku ala nakũtongoeasya namo na wasya:
‘Ndikũthũkũma we Mwĩai Ngai.’
Kwoou nĩweenenganie kwĩka ũmalwaya,
ũithaithĩa ĩũlũ wa kĩla kalĩma katũlu,
na ungu wa kĩla mũtĩ wĩ matũ maingĩ.
21Nyie nakũvandie ta mũsavivũ wakwa mũnyuve,
navanda mbeũ ĩla nzeo vyũ.
Nĩ kyaũ ĩndĩ kĩkwanangĩte,
ũkatw'ĩka mũsavivũ wa kĩthekanĩ ũte vata?
22O na ũkathamba na ĩati kana ũkatũmĩa savunĩ mwingĩ,
ĩlanga ya ĩko ya ĩvĩtyo yaku yĩ o mbee wakwa.
Nĩasya ũu nyie Mwĩai Ngai Mũsumbĩ.
23Ũtonya ata kwasya: ‘Nyie ndimũvuku,
nyie ndyaathaitha Mbaali’?
Kwa sisya ũndũ weekie yĩla waĩ mwandanĩ,
lilikana maũndũ ala wĩkĩte.
Ũilyĩ ta ngamĩle nga ya mũika,
ĩla ĩsembaa kũũ na kũũ,
24kana ta ĩng'oi ĩka ya kĩthekanĩ yamanyĩie kwĩkala weũnĩ,
yĩla yĩatĩĩaa mũuke yĩyenda yĩla ĩũme.
Nũũ ũtonya kũsiĩĩa mũmeo wayo?
Mang'oi maũme mainoaa maiyĩmantha;
nĩmayonaa nũndũ yĩthĩawa yĩenda yĩla ĩũme.
25We Ĩsilaeli eka kwĩnosya ũisemba kũũ na kũũ,
kana ũtume ũkwatwa nĩ waũni.
Ĩndĩ we wĩasya, ‘Aiee, vai vata wa kũeka,
nũndũ nĩnendete ngai ngeni,
na nĩsyo nĩthaithaa!’ ”
Andũ ma Ĩsilaeli Maĩlĩte Kũkanw'a
26Mwĩai Ngai easya atĩĩ,
“O tondũ kĩng'ei kĩsonokaa kyakwatwa,
no w'o andũ ma Ĩsilaeli mesonoka,
makasonoka vamwe na asumbĩ moo,
atongoi moo, athembi moo na athani moo.
27Meaa mũtĩ atĩĩ, ‘We nue ĩthe wakwa,’
na kwĩa ĩvia atĩĩ, ‘We nue wanzyaie.’
Nĩmambonetye mĩongo yoo vandũ va kũnzisya,
ĩndĩ yĩla makwatwa nĩ thĩna mambĩkaĩlaa mayasya,
‘Ame ũka ũtũtangĩĩe!’
28Ĩndĩ ngai syaku ila weeseũvĩisye iĩva?
Nĩsyũke ikũtangĩĩe yĩla wĩ na thĩna
ethĩwa nitonya ũkũtangĩĩa;
Nũndũ inyw'ĩ andũ ma Yuta,
ngai syenyu singĩvĩte o ta ndũa syenyu.
29Mwĩnzikata nĩkĩ?
Inyw'onthe nĩmũng'endeete.
Nĩasya ũu nyie Mwĩai Ngai.
30O na kau nĩnamũkanisye, ũu ndwaatethya,
mũyaaĩtĩkĩla ũkany'o wakwa.
Nĩmũaĩte athani menyu na ũvyũ,
ũndũ mũnyambũ wĩ kaũ wũaa.
31Inyw'ĩ andũ ma ĩvinda yĩĩ,
ĩw'ai ũndũ nyie Mwĩai Ngai ngũmwĩa.
Nyie ko natw'ĩkĩie andũ ma Ĩsilaeli nthĩ ya weũ,
kana nthĩ yĩ kĩvindu kĩkamu?
Nĩkĩ ĩndĩ andũ makwa maasya, ‘Ithyĩ twĩ athasye,
na tũyĩũka kwaku ĩngĩ?’
32Mwĩĩtu nũtonya kũlwa nĩ syĩndũ syake sya wanake?
Kana mũtwawa akolwa nĩ ngũa syake sya mũtwaano?
Ĩndĩ inyw'ĩ andũ makwa nĩmũlĩtwe ninyie,
mavinda maingĩ matatalĩka.
33Nĩwĩsĩ nesa kũmantha endwa maku,
ũkethĩa o na no ũmanyĩsye aka ala athũku mĩendele mĩthũku.
34Ngũa syaku nĩndalĩkangĩle nĩ nthakame ya ngya ite na mavĩtyo,
o na kau ndwaamethĩa maitũla nyũmba yaku.
Ĩndĩ o na wĩkĩte maũndũ asu onthe,
35wĩasya, ‘Nyie ndi na ĩvĩtyo,
Ngai nũekete kũnthatĩa.’
Ĩndĩ ngakũsilĩla nũndũ wa kwasya, ‘Ndyĩkĩte naĩ.’
36Wangangaa ũyĩalyũla mwĩkalĩle waku nĩkĩ?
Ĩndĩ ũkasonokw'a nĩ andũ ma Misili,
o tondũ wasonokiw'e nĩ andũ ma Asuli.
37Ũkauma Misili o nakw'o wilĩĩlĩte moko mũtwe nĩ nthoni,
nũndũ nyie Mwĩai Ngai nĩnĩmaleete ala wĩkwatasya,
na maikakũtethya o na vanini.”
Currently Selected:
Yel 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
