Yel 27
27
Yelemia Aimanyĩsya kwa Kwĩyoveea Ĩsoki
1Mwambĩlĩĩlyonĩ wa kũsumbĩka kwa Nzetekia mwana wa Yosia mũsumbĩ wa Yuta, Mwĩai Ngai nĩwaneenie na Yelemia. 2Mwĩai Ngai nĩwambĩie atĩĩ: “Ĩseũvĩsye ĩsoki yĩna mĩkwa, na ũiyoveea ngingonĩ yaku. 3Ĩtina wa ũu tũmana vala ve mũsumbĩ wa Etomu, mũsumbĩ wa Moavi, mũsumbĩ wa Aamimoni, mũsumbĩ wa Tile, na mũsumbĩ wa Sitoni. Nĩmatwaĩwe ũtũmani ũsu nĩ atũmwa ala mokie Yelũsalemu kwona Nzetekia mũsumbĩ wa Yuta. 4Meaĩe ũmee makatavye asumbĩ moo kana nyie Mwĩai Ngai Mwene Ũtonyi W'onthe, Ngai wa Ĩsilaeli nĩmea atĩĩ, 5‘Nyie ninyie noombie nthĩ, andũ na nyamũ ila itũaa vo, ngĩtũmĩa ũtonyi wakwa na vinya wakwa mũnene, na nĩninengae o ũla ngwenda aisumbĩke. 6Yu nĩnĩnenganĩte nthĩ ii syonthe ũtonyinĩ wa Nevukatinesa mũsumbĩ wa Mbavilonĩ, mũthũkũmi wakwa, na nĩnĩmũnengete o na nyamũ sya kĩthekanĩ ĩmũthũkũme. 7Mbaĩ syonthe ikamũthũkũma, na iithũkũma mwana wake na mwĩsũkũũe, nginya yĩla ĩvinda ya kũsindwa kwa nthĩ yake yĩvika. Nĩvo ĩndĩ mbaĩ mbingĩ na asumbĩ me vinya memũtw'ĩkĩthya ngombo yoo.
8“ ‘Ĩndĩ ethĩwa mbaĩ o na yĩva kana ũsumbĩ o na wĩva ũkalea kũmũthũkũma Nevukatinesa mũsumbĩ wa Mbavilonĩ, na kũlea kũkua ĩsoki yake, nyie Mwĩai Ngai ngakany'a mbaĩ ĩsu kwa kũmĩetee kaũ, yũa na ũwau mũthũku, kũvika nĩmamine vyũ kwa ũtonyi wa Nevukatinesa. 9Kwoou mũikethukĩĩsye athani menyu, andũ menyu ala maaũasya, ala mavuanasya ndoto, ala mathanaa maũndũ, kana awe menyu ala mamwĩaa: Mũikathũkũme mũsumbĩ wa Mbavilonĩ. 10Nũndũ memwathanĩa wathani wa ũvũngũ, ũla wĩtuma mumw'a nthĩ yenyu mũtwawe kũasa; ngamũlũngĩlĩĩlya kũasa mũkae. 11Ĩndĩ andũ ma mbaĩ ĩla yĩĩtĩkĩla kũkua ĩsoki ya mũsumbĩ wa Mbavilonĩ na kũmũthũkũma, nyie Mwĩai Ngai ngamaeka mekalae nthĩ yoo, mamĩĩmae na kũtũaa vo. Nĩasya ũu nyie Mwĩai Ngai.’ ”
12Nĩnaneenie na Nzetekia mũsumbĩ wa Yuta namũnenga ũtũmani o ta ũsu namwĩa atĩĩ, “Kuai ĩsoki ya mũsumbĩ wa Mbavilonĩ mũmũthũkũme, na mũithũkũma andũ make na mũkekala thayũ. 13Nĩkĩ we na andũ maku mũkwenda mwĩũaĩwa kaũnĩ, mũawe nĩ yũa na ũwau mũthũku, ila Mwĩai Ngai waĩtye kana ikamina mbaĩ o na yĩva ĩla ĩtethũkũma mũsumbĩ wa Mbavilonĩ? 14Mũikamethukĩĩsye athani ala meũmwĩa mũikathũkũme mũsumbĩ wa Mbavilonĩ, nũndũ memwathanĩa ũvũngũ. 15Nyie Mwĩai Ngai nĩasya kana ndyaamatũma, ĩndĩ nĩmekwathana ũvũngũ ĩsyĩtwanĩ yakwa, na kwoou ngamũlũngya mume nthĩ ĩno mũkae, inyw'ĩ vamwe na athani asu meũmwathanĩa.”
16Nĩnasyokie naneena na athembi na andũ onthe namea atĩĩ, “Ũũ nĩ w'o Mwĩai Ngai ũkũmwĩa: Mũikethukĩĩsye athani menyu ala meũmwathanĩa maimwĩa kana mĩio ya Ĩkalũ ya Mwĩai Ngai ĩkatũngwa mĩtũkĩ kuma Mbavilonĩ, nũndũ memwathanĩa ũvũngũ. 17Mũikamethukĩĩsye, ĩndĩ thũkũmai mũsumbĩ wa Mbavilonĩ na mũkekala thayũ. Nĩkĩ mũkwenda ndũa ĩno ĩtiwe yĩ nthei? 18Ethĩwa kwa w'o mo nĩ athani, na ethĩwa maneenaa ndeto ya Mwĩai Ngai, eka mamwĩsũve Mwĩai Ngai Mwene Ũtonyi W'onthe nĩ kana mĩio ĩla ĩtialĩte Ĩkalũnĩ, na ĩla ĩtialĩte nyũmbanĩ ya mũsumbĩ wa Yuta, na ndũanĩ ya Yelũsalemu ndĩkatwawe Mbavilonĩ. 19Ũũ nĩ w'o Mwĩai Ngai Mwene Ũtonyi W'onthe ũkwasya ĩũlũ wa ituĩ na ĩtangi, matina na mĩio ĩla ĩngĩ yonthe ĩtialĩte ndũanĩ ĩno, 20ĩla Nevukatinesa mũsumbĩ wa Mbavilonĩ ũtaakua ĩvindanĩ yĩla wamũtavie Yekonia mwana wa Yeoiakimu mũsumbĩ wa Yuta, amumya Yelũsalemu amũtwaa Mbavilonĩ e vamwe na anini make onthe. 21Nyie Mwĩai Ngai Mwene Ũtonyi W'onthe, Ngai wa Ĩsilaeli nĩasya ũũ ĩũlũ wa mĩio ĩla ĩtialĩte Ĩkalũnĩ, nyũmbanĩ ya kĩ-ũsumbĩ ya mũsumbĩ wa Yuta, na ndũanĩ ya Yelũsalemu: 22Mĩio ĩsu ĩkatwawa Mbavilonĩ na ĩkekala kw'o kũvika mũthenya ũla nyie nĩenda itũngwe. Nĩvo ĩndĩ nĩmĩtũnga vaa na kũmia vo. Nĩasya ũu nyie Mwĩai Ngai.”
Currently Selected:
Yel 27: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
