Yel 26
26
Athembi na Athani Mayenda Yelemia Oawe
1 #
2Asu 23.36—24.6; 2Mav 36.5-7 Mwambĩlĩĩlyonĩ wa kũsumbĩka kwa Yeoiakimu mwana wa Yosia mũsumbĩ wa Yuta, Mwĩai Ngai nĩwaneenie nakwa ambĩa atĩĩ, 2“Nyie Mwĩai Ngai nĩkwĩa enda ũkaũngame kĩwanzanĩ kya Ĩkalũ, na ũineena na andũ ma ndũa syonthe sya Yuta, ala mokaa kũthaithĩa Ĩkalũnĩ ya Mwĩai Ngai. Matavye maũndũ onthe ala ngũkwĩaĩa ũmatavye; ndũkatialye ũndũ o na ũmwe. 3No kwĩthĩwa makwĩthukĩĩsya, na kĩla ũmwe woo akethyũũa akatia mĩendele yake mĩthũku, nakwa ngĩeka kũete ũthũku ũla nĩwetete kana ngamaetee kwondũ wa meko moo mathũku. 4Matavye ũmee kana ũũ nĩ w'o nyie Mwĩai Ngai ngwasya, ‘Mwalea kũmbĩw'a na kũatĩĩa mĩao ĩla nĩmũnengete, 5na mwalea kũmew'a athũkũmi makwa athani, ala nĩmũtũmĩaa ĩngĩ na ĩngĩ, o na kau mũimethukĩĩasya, 6#Yos 18.1; Sav 78.60; Yel 7.12-14 nĩvo ĩndĩ nĩananga Ĩkalũ yĩĩ o tondũ naanangie Silo, na ngatw'ĩkĩthya ndũa ĩno kĩumo kwa mbaĩ syonthe ĩũlũ wa nthĩ.’ ”
7Athembi, athani na andũ ala angĩ onthe nĩmeewie Yelemia aineena maũndũ asu e Ĩkalũnĩ ya Mwĩai Ngai. 8Yĩla Yelemia waminie kũneena maũndũ onthe ala Mwĩai Ngai wamwĩaĩĩte atavye andũ onthe, athembi, athani na andũ onthe nĩmamũkwatie na mamwĩa atĩĩ, “We no nginya ũawe! 9Nĩkĩ wathana ĩsyĩtwanĩ ya Mwĩai Ngai ũyasya kana Ĩkalũ yĩĩ yĩkaanangwa ta Silo, na kana ndũa ĩno ĩkatiwa yĩ nthei ĩte andũ?” Andũ onthe nĩmamũmbanĩlĩĩile Yelemia vau Ĩkalũnĩ ya Mwĩai Ngai.
10Yĩla atongoi ma Yuta mamanyie maũndũ ala maendee, nĩmambatie kuma nyũmbanĩ ya mũsumbĩ mooka Ĩkalũnĩ, na mekala nthĩ mũvĩanĩ wa Ĩkalũ ũla weetawa Mũvĩa Mweũ. 11Nĩvo ĩndĩ athembi na athani matavisye atongoi na andũ onthe mamea atĩĩ, “Mũndũ ũũ aĩlĩte kũtw'ĩĩwa kũawa, nĩkwĩthĩwa nĩwathanĩa ndũa ĩno ũthũku, o tondũ inyw'ĩ mweew'a na matũ menyu.”
12Nĩvo ĩndĩ Yelemia waneenie na atongoi na andũ onthe amea atĩĩ, “Mwĩai Ngai nũndũmĩte nathane ũthũku ĩũlũ wa Ĩkalũ yĩĩ na ndũa ĩno, nĩneene maũndũ onthe ala inyw'ĩ mweew'a. 13Kwoou yu alyũlai mĩendele yenyu na meko menyu, na mũimwĩw'a Mwĩai Ngai, Ngai wenyu, nake nũkũeka kũmũetee ũthũku ũla waĩtye kana akamũetee. 14Ĩndĩ ngalĩkonĩ ĩla yakwa, nyie nĩ ungu wa ũtonyi wenyu. Mbĩkei ũla mũkwona wĩ ũseo methonĩ menyu. 15Ĩndĩ manyai kana ethĩwa nĩmũũmbũaa, vate ndĩi inyw'ĩ, ndũa ĩno, na andũ ala matwĩe vo mwĩĩthĩwa na ĩvĩtyo ya kũaa mũndũ ũte na ĩvĩtyo. Nĩneena ũw'o kana Mwĩai Ngai nũndũmĩte kũla mũĩ nĩmũtavye maũndũ aa onthe.”
16Nĩvo ĩndĩ atongoi na andũ onthe mamasũngĩie athembi na athani mamea atĩĩ, “Mũndũ ũũ ndaĩlĩte kũtw'ĩĩwa kũawa nũndũ atũtavisye maũndũ ala ũtũmĩtwe nĩ Mwĩai Ngai, Ngai waitũ.” 17Atumĩa amwe atongoi ma andũ nĩmaũngamie maneena na andũ onthe ala moombanĩte vau mamea atĩĩ, 18#Mika 3.12 “Mika kuma ndũanĩ ya Molesethi nĩwathanie ĩvindanĩ yĩla Esekia wasumbĩkĩte Yuta, eea andũ onthe ma Yuta atĩĩ, ‘Ũũ nĩ w'o Mwĩai Ngai Mwene Ũtonyi W'onthe ũkwasya:
Saioni ĩkaĩmwa ta mũũnda,
Yelũsalemu ĩkaomboangwa ĩtw'ĩke kĩvumbu,
na kĩĩma kya Ĩkalũ kĩkatw'ĩka kĩtheka kĩthungu.’
19Twĩkũlya, Esekia mũsumbĩ wa Yuta na andũ onthe ma Yuta nĩmamũaie? Aiee, Esekia nĩwamũkĩie Mwĩai Ngai na amwĩsũva ameke nesa, nake Mwĩai Ngai aekana na ũthũku ũla waĩtye akameka. Ĩndĩ yu ithyĩ tũkilĩlye kwĩyĩetee ũthũku mũnene mũno.”
20Kwaĩ mũndũ ũngĩ weetawa Ulia mwana wa Semaia wa ndũa ya Kiliathi-yealimu, ũla wathanie maũndũ ala watũmĩtwe nĩ Mwĩai Ngai. Nĩwathanie maũndũ mathũku ĩũlũ wa ndũa ya Yelũsalemu na nthĩ ya Yuta o tondũ Yelemia wĩkie. 21Yĩla Mũsumbĩ Yeoiakimu na asikalĩ make na anini make meewie wathani wake, mũsumbĩ nĩwendie kũmũaa, ĩndĩ yĩla Ulia wamanyie ũu, nĩwakwatiwe nĩ w'ĩa na akĩa athi Misili. 22Nĩvo ĩndĩ Mũsumbĩ Yeoiakimu watũmie Elinathani mwana wa Akivoli vamwe na andũ angĩ mathi Misili. 23Nĩmakwatie Ulia na mamumya Misili mamũtwaĩa Mũsumbĩ Yeoiakimu, nake amũaa na ũvyũ na ekya mwĩĩ wake vala vathikawa andũ ala mate ndaĩa.
24Ĩndĩ Aikamu mwana wa Savani nĩ wamũtetheeisye Yelemia, na kwoou ndaanenganwe mokonĩ ma andũ mamũae.
Currently Selected:
Yel 26: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
