Yel 25
25
Andũ ma Yuta Makekala Ũeninĩ me atave Myaka Mĩongo Mũonza
1 #
2Asu 24.1; 2Mav 36.5-7; Nda 1.1-2 Mwakanĩ wa kana wa kũsumbĩka kwa Yeoiakimu mwana wa Yosia, mũsumbĩ wa Yuta (ũsu nĩ w'o waĩ mwaka wa mbee wa kũsumbĩka kwa Nevukatinesa mũsumbĩ wa Mbavilonĩ), Mwĩai Ngai nĩwaneenie na Yelemia ĩũlũ wa andũ ma Yuta, 2nake Yelemia aneena na andũ onthe ma Yuta na ala matwĩe Yelũsalemu amea atĩĩ, 3“Mwĩai Ngai ambĩĩie kũneena nakwa myaka mĩongo ĩlĩ na ĩtatũ mĩthelu, kwambĩĩa mwaka wa ĩkũmi na itatũ wa kũsumbĩka kwa Yosia mwana wa Amoni, mũsumbĩ wa Yuta, nakwa nĩnĩmũtavasya ndeto isu na kĩthing'ĩĩsyo kũvika ũmũnthĩ, ĩndĩ nĩmwaleile kũmbĩthukĩĩsya. 4O na kau Mwĩai Ngai nĩwamũtũmĩie ĩngĩ na ĩngĩ athũkũmi make athani, nĩmwaleile kwĩthukĩĩsya. 5Nĩwamũtavisye amwĩa, ‘Kĩla ũmwe wenyu nĩethyũũe atie mĩendele yake mĩthũku na meko make mathũku, nĩ kana mwĩkale nthĩ ĩno ĩla nyie Mwĩai Ngai namũnengie vamwe na aaũmae menyu, yĩthĩwe yenyu kuma tene na kũvika tene na tene. 6Mũikaatĩĩe ngai ingĩ mwithũkũme na kwithaitha, kana mũnthatye kwa kũthaitha mĩvw'anano ĩla mũseũvĩtye. Ethĩwa mũinthatya, nakwa ndimwĩka ũndũ mũthũku. 7Ĩndĩ nĩmwaleile kũmbĩw'a nyie Mwĩai Ngai, na mwanthatya kwa kũthaitha mĩvw'anano ĩla mwĩseũvĩsye, na kwoou mweeyĩetee thĩna.’
8“Kwondũ wa ũu nyie Mwĩai Ngai Mwene Ũtonyi W'onthe nĩasya atĩĩ: Nĩkwĩthĩwa nĩmũleete kũmbĩw'a, 9ngatũmana mbaĩ syonthe sya ngalĩko ya ĩũlũ syũke, na ngatũmana Nevukatinesa mũsumbĩ wa Mbavilonĩ, mũthũkũmi wakwa; ngamaete mokite nthĩ ĩno na andũ ala matwĩe vo. O ta ũu makokita na mbaĩ syonthe ila ithyũlũlũkĩte nthĩ ĩno kũvika nĩsyanange vyũ, na kwitw'ĩkĩthya kĩndũ kya kũtelemya, kya kũvũthĩĩw'a na nthoni itakathela. 10#Yel 7.34; 16.9; Ũvu 18.22-23 O ta ũu ngaveta kuma nthĩ ĩno kũtheka na ũtanu. Kũikethĩwa mboka sya mũtwaano kana andũ meũthia mũtu na mavia, o na kũikakwatw'a taa. 11Nthĩ ĩno yonthe ĩkaanangwa na kũtiwa yĩ nthei, na mbaĩ isu syonthe ikathũkũma mũsumbĩ wa Mbavilonĩ vandũ va myaka mĩongo mũonza. 12Myaka ĩsu mĩongo mũonza yathela, nyie Mwĩai Ngai ngasilĩla mũsumbĩ wa Mbavilonĩ na ũsumbĩ wake, nthĩ ĩsu ya Akalitei, nũndũ wa ũthũku woo, na ngatuma nthĩ ĩsu yĩkala yĩ mbanange tene na tene. 13Ngaetee nthĩ ĩsu maũndũ onthe ala naisye ngamĩka, na maandĩkĩtwe ĩvukunĩ yĩĩ, maũndũ ala Yelemia wathanie ĩũlũ wa mosumbĩ onthe. 14Mosumbĩ maingĩ na asumbĩ anene makatw'ĩkĩthya andũ ma Mbavilonĩ ngombo syoo. Ngaĩva andũ ma Mbavilonĩ kwĩanana na meko moo.”
Ngai Akasilĩla Andũ ma Mbaĩ Syonthe
15Mwĩai Ngai, Ngai wa Ĩsilaeli nĩwaneenie nakwa ambĩa atĩĩ, “Osa kuma kw'okonĩ kwakwa kĩkombe kĩna ndivai ya ũthatu wakwa, na ũinenga andũ ma mbaĩ syonthe kũla ngũũtũma manyw'e. 16Makanyw'a na kũlũa na kũvũavũana, nũndũ wa kaũ ũla nĩtuma mokitwa.”
17Kwoou nĩnoosie kĩkombe kĩu kuma kw'okonĩ kwa Mwĩai Ngai, na nanyw'ĩthya mbaĩ syonthe ila Mwĩai Ngai wandũmĩte ngainenge inyw'e. 18Nĩnanyw'ĩthisye Yelũsalemu na ndũa syonthe sya Yuta, asumbĩ na atongoi masyo, nĩ kana itiwe syĩ nthei na sya kũtelemya, sya kũvũthĩĩw'a na kũumanĩwa o tondũ iilyĩ ũmũnthĩ. 19Nĩnanyw'ĩthisye Valao mũsumbĩ wa Misili, anini make, atongoi make, na andũ ma nthĩ ya Misili, 20vamwe na mbaĩ ngeni syonthe ila syaĩ katĩ woo. Nĩnanyw'ĩthisye asumbĩ ma nthĩ ya Usi na asumbĩ onthe ma nthĩ ya Avilisiti (Asikeloni, Ngasa, Ekeloni, na andũ ala matialĩte ma Asitoti). 21Nĩnanyw'ĩthisye Aetomu, Amoavi, na Aamimoni, 22vamwe na asumbĩ onthe ma Tile, ma Sitoni, na asumbĩ onthe ma nthĩ ila syĩ ũtee wa ũkanga wa Menditelenia. 23Nĩnanyw'ĩthisye andũ ma ndũa sya Ndetani, Tema na Mbusi, na ala menzaa nzw'ĩĩ syoo ikatiwa ithũkũ. 24Nĩnanyw'ĩthisye asumbĩ onthe ma Alavia, na asumbĩ ma mbaĩ ivulanĩte ala matwĩe weũnĩ. 25Nĩnanyw'ĩthisye asumbĩ onthe ma Nzimili, asumbĩ onthe ma Elamu, asumbĩ onthe ma nthĩ ya Metia, 26na asumbĩ onthe ma nthĩ sya ngalĩko ya ĩũlũ, ila syĩ vakuvĩ o na ila syĩ kũasa, ũsumbĩ ũmwe ĩtina wa ũla ũngĩ, na ĩndĩ mosumbĩ onthe ĩũlũ wa nthĩ. Ĩtina wa asu o nake mũsumbĩ wa Mbavilonĩ nĩwanywie ndivai ĩsu ya ũthatu wa Ngai.
27“Nĩvo ĩndĩ wĩmatavya ũmee kana nyie Mwĩai Ngai Mwene Ũtonyi W'onthe, Ngai wa Ĩsilaeli nĩasya atĩĩ, ‘Nyw'ai mũmilwe na kũtavĩka, valũkai na mũikaaũkĩle ĩngĩ, nũndũ wa kaũ ũla ngũmũetee.’
28“Ethĩwa makalea kwosa kĩkombe kĩu kuma kw'okonĩ kwaku manyw'e, nĩvo ĩndĩ wĩmatavya kana nyie Mwĩai Ngai Mwene Ũtonyi W'onthe nĩasya kana no nginya mũnyw'e! 29Nũndũ ethĩwa ngaete ũthũku ndũanĩ ĩla yĩtanĩaw'a na ĩsyĩtwa yakwa, kũtonyeka ata inyw'ĩ mũkalea kũkanw'a? Aiee, mũilea kũkanw'a, nũndũ nyie Mwĩai Ngai Mwene Ũtonyi W'onthe nĩasya kana nĩngũete kaũ kwa andũ onthe ĩũlũ wa nthĩ.
30“Kwoou we Yelemia, mathanĩe maũndũ aa onthe ũmatavye atĩĩ;
‘Mwĩai Ngai akaluluma e ĩũlũ ĩtunĩ,
akaneena na wasya mũnene e wĩkalonĩ wake mũtheu,
akalulumĩa andũ make na wasya mũnene mũno,
akaneena na wasya mũnene ta wa andũ mekũanga nzavivũ,
akamokĩlĩlya wasya wake onthe ala matwĩe ĩũlũ wa nthĩ.
31Wasya ũsu wake ũkatũngana kũvika kũla nthĩ ĩthelele,
nũndũ Mwĩai Ngai e na ĩkoani na andũ ma mbaĩ syonthe;
akasilĩla andũ onthe,
na akoaa andũ ala athũku.’ ”
Easya ũu Mwĩai Ngai.
32Mwĩai Ngai Mwene Ũtonyi W'onthe easya atĩĩ,
“Ũthũku ũkakwata mbaĩ ĩtina wa ĩngĩ;
kĩuutani kĩnene nĩkyũkĩte kuma kũla nthĩ ĩthelele!”
33Ĩvindanĩ yĩu, ala meũawa nĩ Mwĩai Ngai makanyaĩĩka kuma ngalĩko ĩmwe ya nthĩ kũvika ĩla ĩngĩ. Andũ maikaĩa nũndũ woo, maikombanw'a kana kũthikwa; makeethĩwa ta vũũ ĩũlũ wa nthĩ.
34Kayai inyw'ĩ atongoi na kũĩa;
ĩyiliityei mũunĩ inyw'ĩ anene ma andũ,
nũndũ ĩvinda yenyu ya kũthĩnzwa na kũnyaĩĩkw'a nĩ ĩviku,
mũkavalũka na kũnyaĩĩka ta mũio wa thooa mũnene.
35Vai vandũ vetiwa va kwĩvitha atongoi,
kana vandũ anene ma andũ matonya kũvonokela.
36Ĩthukĩĩsyei kĩĩo kya atongoi,
na mũyĩw'a kĩĩo kya anene ma andũ!
Nũndũ Mwĩai Ngai nũkwananga nthĩ yoo,
37na nthĩ yenyu ĩla yĩkalĩte yĩna mũuo nĩ mbanange,
nũndũ wa ũthatu mwingĩ wa Mwĩai Ngai.
38O tondũ mũnyambũ ũthamaa ũkatia wĩvitho waw'o,
nake Mwĩai Ngai nũthamĩte akatia andũ make.
Nthĩ yoo nĩ mbanange,
nũndũ wa kũkitwa nĩ amaitha,
na nũndũ wa ũthatu mwingĩ wa Mwĩai Ngai.
Currently Selected:
Yel 25: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
