Yel 1

Kwĩtwa na Kũtũmwa kwa Yelemia

1Ii nĩ ndeto ila Yelemia mwana wa Ilikia waneenie. Yelemia aĩ ũmwe wa athembi ala mekalaa ndũanĩ ya Anathothi, kĩsionĩ kya nthĩ ya mbaĩ ya Mbengyameni. 2#2Asu 22.3—23.27; 2Mav 34.8—35.19 Mwĩai Ngai aneenie na Yelemia mwakanĩ wa ĩkũmi na itatũ wa kũsumbĩka kwa Yosia mwana wa Amoni mũsumbĩ wa Yuta. 3#2Asu 23.36—24.7; 24.18—25.21; 2Mav 36.5-8,11-21 O ta ũu nĩwaneenie nake ĩvindanĩ yonthe ya kũsumbĩka kwa Yeoiakimu mwana wa Yosia mũsumbĩ wa Yuta, kũvika mweinĩ wa katano wa mwaka wa ĩkũmi na ũmwe wa kũsumbĩka kwa Nzetekia mwana wa Yosia, yĩla andũ ma ndũa ya Yelũsalemu mataviwe matwawa nthĩ ya ũeninĩ.

4Mwĩai Ngai nĩwaneenie nakwa ambĩa atĩĩ,

5“Ndanamba ũkũmbĩa ĩvunĩ ya inyia waku nĩnakwĩsĩ,#1.5 nĩnakwĩsĩ: Maandĩko amwe ma Ndeto ya Ngai maĩtye nĩnakũnyuvie

ũtanamba kũsyawa nĩnakũvathie;

nĩnakũnyuvie ũtw'ĩke mwathani kwa mbaĩ mbingĩ.”

6Nĩvo ĩndĩ namũsũngĩie namwĩa atĩĩ, “Asi, Mwĩai Ngai Mũsumbĩ! Nyie ndyĩsĩ kũneena, nũndũ nĩ o mũnini.”

7Ĩndĩ Mwĩai Ngai nĩwanzũngĩie ambĩa atĩĩ, “Ndũkasye kana wĩ mũnini, nũndũ ũkathi kwa andũ onthe kũla nĩkũtũma, na ũkamatavya ũndũ w'onthe ũla nĩkwĩaĩa. 8Ndũkamakĩe, nũndũ nĩ vamwe naku ngũvonokye. Nĩasya ũu nyie Mwĩai Ngai.”

9Nĩvo ĩndĩ Mwĩai Ngai watambũũkisye kw'oko kwake akiita ilomo syakwa na ambĩa atĩĩ, “Yu nĩnakũnenga ndeto ila waĩlĩte kũneena. 10Ũmũnthĩ nĩnakũnenga ũtonyi ĩũlũ wa mbaĩ sya andũ na mosumbĩ; ũtonyi wa kũkũa na kũomboa, kwananga na kũng'uthũla, kwaka na kũvanda.”

Yelemia Ayona Mawoni Elĩ

11Mwĩai Ngai nĩwaneenie nakwa angũlya atĩĩ, “Yelemia wĩona kyaũ?”

Nĩnamũsũngĩie namwĩa, “Nĩngwona ũvonge wa mũtĩ wa mũlosi.”

12Nĩvo ĩndĩ Mwĩai Ngai wambĩie, “Nĩwoona nesa, nũndũ nĩnĩsyaĩĩsye#1.12 Nĩwoona nesa, nũndũ nĩnĩsyaĩĩsye: Kĩthyomonĩ kya Kĩevelania ndeto ya mũlosi na ya kũsyaĩĩsya nĩ ũndũ ũmwe ndeto yakwa yĩanĩe.” 13Mwĩai Ngai nĩwaneenie nakwa o ĩngĩ angũlya atĩĩ, “Wĩona kyaũ?”

Nakwa namũsũngĩa, “Nĩona mbisũ ĩtheũkĩte yĩ ngalĩko ya ĩũlũ, na nĩyeekete kwelekela ngalĩko ya ĩtheo.”

14Nĩvo ĩndĩ Mwĩai Ngai wambĩie atĩĩ, “Kuma ngalĩko ya ĩũlũ wanangĩko ũkamokĩa onthe ala matũaa nthĩ ĩno. 15Nũndũ nĩngwĩta mbaĩ syonthe sya mosumbĩ ma ngalĩko ya ĩũlũ na makooka vaa. Asumbĩ moo makaia ivĩla syoo sya kĩ-ũsumbĩ mĩvĩanĩ ya Yelũsalemu, na kũthyũlũlũka ngũta syayo, na kũthyũlũlũka ndũa syonthe sya Yuta. Nĩasya ũu nyie Mwĩai Ngai. 16Ngamasilĩla nũndũ wa ũthũku woo wa kũndia na kũvĩvĩsya ngai ingĩ ũvani, ĩĩ, na kũthaitha mĩvw'anano ĩla maseũvĩtye na moko moo. 17Ĩndĩ we Yelemia ĩyũmbany'e, na ũithi ũmatavye maũndũ onthe ala ngũkwĩaĩa. Ndũkamakĩe, ndikese kũtuma ũkĩa wĩ mbee woo. 18Ũmũnthĩ nakwĩkĩa vinya ta ndũa mbiĩĩe, ta kĩtuĩ kya kyũma na ta ũkũta wa kyũma kĩtawa mbulonzi, nĩ kana wũkite na andũ ma nthĩ ĩno: Asumbĩ ma Yuta, atongoi mayo, athembi mayo, na andũ mayo. 19Makokita naku ĩndĩ maikakũsinda, nĩkwĩthĩwa nĩ vamwe naku ngũvonokye. Nĩasya ũu nyie Mwĩai Ngai.”

Currently Selected:

Yel 1: KAMBA

Highlight

Copy

Compare