Yel 19
19
Ũmanyĩsyo kuma Kavisũnĩ Kakw'ũ
1Mwĩai Ngai nĩwaneenie nakwa ambĩa atĩĩ, “Enda ũkathooe kavisũ kaseũvĩtw'e nĩ mũmbi wa mbisũ, na ũyĩta amwe ma atongoi ma andũ na amwe ma atongoi ma athembi. 2#2Asu 23.10; Yel 7.30-32; 32.34-35 Endany'a namo mũkaumaalĩle Mũvĩanĩ wa Ilĩo sya Mbisũ, mũende Mwandanĩ wa Mbeni-inomu, na wĩ vau ũineena ndeto ila ngũũtavya. 3Ũkaneene wasye atĩĩ, ‘Ĩw'ai inyw'ĩ asumbĩ ma Yuta na andũ ala mũtwĩe Yelũsalemu ũndũ Mwĩai Ngai ũkwasya. Mwĩai Ngai Mwene Ũtonyi W'onthe, Ngai wa Ĩsilaeli easya: Ngaetee nthĩ ĩno ũthũku mũnene, wĩthĩe kĩla mũndũ wĩĩw'a ũvoo waw'o akatelema. 4Ngaũete nĩkwĩthĩwa nĩmandiĩte na nĩmavukĩtye nthĩ ĩno kwa kũvĩvĩsya ngai ingĩ ũvani; ngai ila mo, aaũmae moo, o na asumbĩ moo matasyĩsĩ, na nĩkwĩthĩwa nĩmetĩkĩtye nthakame mbingĩ vo ya andũ mate ĩvĩtyo. 5#Ali 18.21 O ta ũu nĩmakĩte ithembeo sya Mbaali iĩmanĩ, nĩ kana mathembee ngai ĩsu syana syoo kwa kwivĩvya na mwaki syĩthĩwe nthembo ya kũvĩvw'a, o na kau ndyaameaĩa kana ngamatavya mekae ũu, o na ndyaasũanĩa ũndũ ta ũsu. 6Kwoou nyie Mwĩai Ngai nĩmatavya kana ĩvinda nĩyũkĩte yĩla vandũ vaa vataketwa ĩngĩ Tovethi kana Mwanda wa Mbeni-inomu, ĩndĩ vakeetawa Mwanda wa Kũaĩa. 7Vaa nĩvo nĩanangĩa mĩvango ya andũ ma Yuta na ma Yelũsalemu, na ngatuma andũ aa moawa nĩ amaitha moo, na ala mendaa kũmamina. Nganengane simba syoo iĩwe nĩ nyũnyi na nyamũ mbai sya kĩthekanĩ. 8Ngaananga ndũa ĩno ĩtw'ĩke kĩndũ kya kũvũthw'a, wĩthĩe kĩla mũndũ wĩsĩlaa vo na kũmyona, akatelemaa na kũsaanĩw'a nũndũ wa ũthũku mũnene ũla ũmĩkwatĩte. 9Ngatuma maya syana syoo, na mayĩĩsana mo ene kwa ene, yĩla ndũa yoo yĩĩlingĩlwa nĩ amaitha moo, na nũndũ wa mathĩna maingĩ ala mekwata kuma kwa amaitha asu mendaa kũmamina.’
10“Nĩvo ĩndĩ wĩũaa kala kavisũ atongoi ala wĩendany'a namo masyaĩĩsye, 11na ũimatavya ũmee nyie Mwĩai Ngai Mwene Ũtonyi W'onthe nĩasya atĩĩ, ‘Ũu nĩ w'o nĩananga andũ aa na ndũa ĩno, o tondũ mũndũ wũaa kĩndũ kũseũvĩtw'e na yũmba ũkethĩa kĩitonya kũkwatanw'a ĩngĩ. Andũ makathikwa Tovethi nũndũ vaikethĩwa vandũ vangĩ matonya kũthikwa. 12Ũu nĩ w'o nyie Mwĩai Ngai nĩĩkana na vandũ vaa na ala matwĩe vo; ngatuma ndũa ĩno yĩkala ta Tovethi. 13Nyũmba syonthe sya Yelũsalemu na sya asumbĩ ma Yuta, ila ialanĩ syasyo ĩũlũ andũ mavĩvĩasya ndata sya matunĩ ũvani, na kumĩsya ngai ingĩ nthembo sya kũnyuwa sya ndivai, ikavukw'a ta vandũ vau vetawa Tovethi.’ ”
14Nĩvo ĩndĩ Yelemia waumie Tovethi, vala Mwĩai Ngai wamũtũmĩte akathanĩe, athi aũngama kĩwanzanĩ kya Ĩkalũ na atavya andũ onthe atĩĩ, 15“Mwĩai Ngai Mwene Ũtonyi W'onthe, Ngai wa Ĩsilaeli easya, ‘Ngaetee ndũa ĩno na motũi mayo onthe ala mamĩthyũlũlũkĩte ũthũku w'onthe ũla nĩwetete kana ngamaetee, nĩkwĩthĩwa nĩmomĩtye ngoo na nĩmaleete kũmbĩw'a.’ ”
Currently Selected:
Yel 19: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
