Yel 18
18
Ũmanyĩsyo kuma kwa Mũmbi wa Mbisũ
1Mwĩai Ngai nĩwaneenie na Yelemia amwĩa atĩĩ, 2“Theea nyũmbanĩ ya mũmbi wa mbisũ, na wĩ vau nĩngũneena naku.” 3Kwoou nĩnatheeie nyũmbanĩ ya mũmbi wa mbisũ, na neethĩa aendee kũmba syĩndũ. 4Ĩndĩ mbisũ ĩla woombaa nĩyaanangĩkĩie mokonĩ make, na kwoou akima yũmba yĩu oomba mbisũ ĩngĩ kwĩanana na ũndũ wendie.
5Nĩvo ĩndĩ Mwĩai Ngai waneenie nakwa ambĩa atĩĩ, 6“Inyw'ĩ andũ ma Ĩsilaeli nĩmũkũlya, nũndũ nyie Mwĩai Ngai ndatonya kũmwĩka o tondũ mũmbi ũũ weeka? Manyai kana o ta yũmba yĩla yĩ mokonĩ ma mũmbi, no w'o nenyu andũ ma Ĩsilaeli mũilyĩ mwĩ mokonĩ makwa. 7Ethĩwa ĩvinda o na yĩva ngatavya mbaĩ kana ũsumbĩ, nĩmĩe kana ngamĩkũa, nĩmĩomboe na kũmyananga, 8mbaĩ ĩsu natavya ũu yeethyũũa ĩtie ũthũku wayo, nakwa ngaekana na ũthũku ũla nĩĩvangĩte kũmĩka. 9O ta ũu ethĩwa ĩvinda o na yĩva ngatavya mbaĩ kana ũsumbĩ, nĩmĩe kana ngamyaka na kũmĩvanda, 10mbaĩ ĩsu natavya ũu yeeka naĩ na ĩilea kũmbĩw'a, nakwa ngaekana na ũseo ũla nĩĩvangĩte kũmĩka. 11Kwoou yu tavya andũ ma Yuta na ala matwĩe Yelũsalemu ũmee nyie Mwĩai Ngai nĩmea atĩĩ, ‘Nyie nĩendee kũmũseũvĩsya ũthũku na kũvanga ũndũ ngũmwĩka naĩ. Kwoou kĩla ũmwe wenyu nĩanzyokee na aitia mĩendele yake mĩthũku. Nĩaseũvye mĩendele yake na meko make.’
12“Ĩndĩ mesũngĩa na kwasya, ‘Kwĩka ũu no wĩa wa mana! Tũkeekaa ũndũ tũvangĩte, na kĩla ũmwe waitũ akeeka kwĩanana na wũmũ wa ngoo yake nthũku.’ ”
Andũ ma Ĩsilaeli Nĩmolĩtwe nĩ Ngai Woo
13Kwoou Mwĩai Ngai easya atĩĩ,
“Kũlyai katĩ wa mbaĩ ila ingĩ,
mũmanye kana ve mũndũ waaĩw'a ũndũ ta ũũ.
Andũ ma Ĩsilaeli nĩmekĩte ũndũ mũthũku mũno.
14Nĩkũlya, ĩa nĩyĩsaa kũthela mavianĩ ala me iĩmanĩ sya Levanoni?
Natw'o tũlũsĩ tũla tumĩtye kĩw'ũ kĩthithu iĩmanĩ nĩtwĩsaa kũng'ala?
15Ĩndĩ andũ makwa nĩmolĩtwe ninyie,
matoeeasya ũvani ngai sya ũvũngũ,
nasyo nimaluluutĩkĩtye mĩendelenĩ yoo.
Nĩmaekie kũatĩĩa nzĩa nzeo ila meesĩ mbeenĩ,
na maatĩĩa nzĩa sya myathũko,
matiĩte nzĩa ĩla nzeũvye.
16Nĩmatw'ĩkĩthisye nthĩ yoo vandũ va kũtelemya,
vandũ va kũvũthw'a mavinda onthe.
Kĩla mũndũ ũvĩtĩlaa vo nũtelemaa,
na kũthingithya mũtwe wake aseng'ete.
17O tondũ kĩseve kĩvyũ kyumĩte wumĩlonĩ wa syũa kĩnyaĩĩkasya mavuti,
no w'o nĩmanyaĩĩkya mbee wa amaitha moo.
Yĩla meĩthĩwa thĩnanĩ mũnene,
ngeethyũũa nĩmony'e mũongo na ndikamatethya.”
Andũ Maiseũvĩsya Yelemia Mũvango Mũthũku
18Andũ nĩmaneenanisye masya atĩĩ, “Ũkai tũseũvĩsye Yelemia mũvango mũthũku. O na tweeka ũu, tũkaendeea kwĩthĩwa na athembi ma kũtũmanyĩsya mĩao, andũ oĩ ma kũtũnenga ũtao, na athani ma kũtũnenga ũtũmani wa Ngai. Ũkai tũmwanange na ndeto na tũikethukĩĩsye ndeto syake o na syĩva.”
19Mbĩthukĩĩsye ame Mwĩai Ngai,
ĩw'a ũndũ amaitha makwa mekwasya.
20Mũndũ eeka ũseo nĩwaĩlĩte kũĩvwa ũthũku?
Ĩndĩ mo nĩmambĩnzĩe ĩima nĩlike vo.
We Mwĩai lilikana ũndũ nakwĩsũvie nũndũ woo,
wĩthyũũe ũeke kũmathatĩa.
21Ĩndĩ yu nengane syana syoo syũawe nĩ yũa,
inengane syũaĩwe kaũnĩ;
Iveti syoo itiwe ite na syana na syĩ ndiwa;
aũme moo nĩmoawe nĩ ũwau mũthũku,
na anake moo mayũawa na ũvyũ me kaũnĩ.
22Eka kĩĩo kĩw'ĩke kuma nyũmbanĩ syoo,
yĩla wĩmaetee kwa kĩthũlũmũko nguthu ya andũ ĩtave syĩndũ syoo!
Nĩkwĩthĩwa nĩmambĩnzĩe ĩima mangwatye,
na makambiĩa itei ikwatye maũũ makwa.
23Ĩndĩ we Mwĩai Ngai nĩwĩsĩ mĩvango yonthe ĩla me nayo ya kũmbũaa.
Ndũkamaekee ũthũku woo, o na ndũkavute naĩ yoo ũeke kũmyona.
Mekye mavalũkange me asinde,
meke ũu ĩvindanĩ yĩla wĩ mũthatu.
Currently Selected:
Yel 18: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
