Yel 17

Naĩ ĩla Andũ ma Yuta Mekĩte na Ũkany'o woo

1“Naĩ ya andũ ma Yuta ĩandĩkĩtwe na kĩandĩki kya kyũma. Ĩtemeleelwe ngoonĩ syoo na mĩthyanĩ ya ithembeo syoo na mũthya wa ĩvia yĩũmu yĩtawa ndaĩamondi. 2Andũ mayo mathaithĩaa ithembeonĩ na ituĩnĩ sya ngai nga ya Asela ila syĩ ũtee wa kĩla mũtĩ wĩ matũ maingĩ, ĩũlũ wa kĩla kalĩma katũlu, 3na iĩma ila syĩ weũnĩ. Nganenga amaitha menyu ũthwii wenyu w'onthe wĩthĩwe mũtavo, mũĩvĩe nũndũ wa naĩ syenyu ila mwĩkĩte kĩla vandũ kĩsionĩ kya nthĩ yenyu. 4Mũkalekya nthĩ ĩno namũnengie yĩthĩwe ũtiĩwa wenyu, ngatuma mũthũkũma amaitha menyu nthĩ mũtamĩsĩ, nũndũ ũthatu wakwa nĩwakanĩtye mwaki ũtakavoa tene na tene.”

Ngai Akasilĩla kĩla Mũndũ

5Mwĩai Ngai easya atĩĩ,

“Nĩmũumanĩe mũndũ ũla ũĩkĩĩaa mũndũ,

na kwĩkwatya vinya wa mũndũ,

ũla ũndiaa nyie Mwĩai Ngai.

6Akeethĩwa ailyĩ ta kakuthu ke weũnĩ,

na ndakakwata ũseo o na ũmwe.

Akekalaa kũndũ kũtameaa kĩndũ weũnĩ,

nthĩ yĩ mũnyũ na ĩtatwĩe andũ.

7“Ĩndĩ nĩ mũathime mũndũ ũla ũndĩkĩĩaa nyie Mwĩai Ngai,

ũla ũmbĩkwatasya.

8 # Sav 1.3 Akeethĩwa ailyĩ ta mũtĩ ũvandĩtwe ũtee wa kĩw'ũ,

ũla ũtwaa mĩi yaw'o kalũsĩnĩ.

Mũtĩ ũsu ndwĩthĩawa na w'ĩa yĩla ũvyũvu wooka,

matũ maw'o mekalaa me o meũ;

ndwĩmakĩaa mwakanĩ ũla kwĩ mũnyao,

o na ndũekaa kwĩthĩwa na ũsyao.”

9Ngoo nĩ ngengani mbee wa syĩndũ ila ingĩ syonthe,

na nĩ nthũku vyũ.

Nũũ ũtonya kũmĩmanya?

10 # Sav 62.12; Ũvu 2.23 “Nyie Mwĩai Ngai nĩnĩmanthaa kĩla kĩ kĩlĩkonĩ kya mũndũ,

na kũatĩĩa nĩmanye kĩla kĩ ngoonĩ yake,

nĩ kana nĩmũĩve kĩla mũndũ kwĩanana na mĩendele yake,

kwĩanana na meko make.”

11Ũla ũkwataa ũthwii kwa nzĩa ĩtaĩlĩte,

ailyĩ ta ngwae ĩla ĩvw'ĩkĩaa matumbĩ ala ĩtaalekya.

Ĩvindanĩ yĩla wĩĩthĩwa e na vinya ũthwii wake ũkathela,

na mũminũkĩlyonĩ wa thayũ wake akeethĩwa e ndia.

12Kuma mwambĩlĩĩlyonĩ,

Ĩkalũ yitũ yĩthĩĩtwe yĩilyĩ ta kĩvĩla kya kĩ-ũsumbĩ kya ndaĩa kiĩtwe kĩĩmanĩ ĩũlũ.

13Ame Mwĩai Ngai wĩkwatyo wa Ĩsilaeli,

onthe ala makũleaa makasonokw'a;

ala methyũũaa makũtie makathela ta masyĩtwa maandĩkĩtwe mũthanganĩ,

nũndũ nĩmakũleete we Mwĩai Ngai,

we ũla nue mbuluti ya kĩw'ũ kĩetae thayũ.

Yelemia Aivoya Ngai Amũtethye

14Ame Mwĩai Ngai mbosye na ngavoa;

ndangĩĩe na ngeethĩwa nĩ mũtangĩĩe,

nũndũ we nue nĩtaĩaa.

15Andũ mangũlasya atĩĩ,

“Maĩva maũndũ ala Mwĩai Ngai wawetie?

Nĩmatũkwate yu!”

16Nyie ndyaakũthing'ĩĩsya ũmaetee ũthũku,

o na ndyaaenda mũthenya wa wanangĩko wũke.

We nĩwĩsĩ ũu,

nũndũ nĩweewie ndeto syonthe ila naneenie.

17Ndũkandelemye,

nũndũ nue wĩvitho wakwa ĩvindanĩ ya ũthũku.

18Ame Mwĩai Ngai masonokye ala manthĩnasya,

ĩndĩ ndũkanzonokye nyie.

Matelemye,

ĩndĩ ndũkandelemye nyie

maetee ũthũku na ũimamina na wanangĩko mũnene.

Kũsũvĩa Mũthenya wa Savato

19Mwĩai Ngai nĩwaneenie nakwa ambĩa atĩĩ, “Enda ũkaũngame Mũvĩanĩ wa Andũ vala asumbĩ ma Yuta malikĩlaa na kumaalĩla, na ũisyoka ũkaũngame mĩvĩanĩ ĩla ĩngĩ yonthe ya Yelũsalemu. 20Wĩ vau neena wasye atĩĩ, ‘Ĩthukĩĩsyei ũndũ Mwĩai Ngai ũkũmwĩa inyw'ĩ asumbĩ ma Yuta, na andũ onthe ma Yuta na onthe ala mũtũaa Yelũsalemu; inyw'onthe ala mũlikĩlaa mĩvĩanĩ ĩno. 21#Nee 13.15-22 Mwĩai Ngai emwĩa atĩĩ: Ethĩwa nĩmũkwenda kũtangĩĩa mathayũ menyu, mũikakue mĩio mũthenyanĩ wa Savato, kana mũmĩlikĩlye mĩvĩanĩ ya Yelũsalemu. 22#Kuma 20.8-10; Kũt 5.12-14 O na mũikakue mĩio kuma nyũmbanĩ syenyu mũthenyanĩ wa Savato, kana kũtethya wĩa o na wĩva, ĩndĩ ĩkalyai mũthenya wa Savato wĩ mũtheu, o tondũ neeaĩie aaũmae menyu. 23Ĩndĩ aaũmae menyu nĩmaleile kũmbĩthukĩĩsya, na moomya ngoo syoo maikew'e na kũatĩĩa ũmanyĩsyo wakwa.

24“ ‘Ĩndĩ mwambĩthukĩĩsya nyie Mwĩai Ngai, na mũieka kũkua mĩio mũmĩlikĩlye mĩvĩanĩ ya ndũa ĩno mũthenyanĩ wa Savato, na mũyĩkalya mũthenya wa Savato wĩ mũtheu na mũilea kũtethya wĩa mũthenyanĩ ũsu, 25asumbĩ me na ũtonyi ta wa mũsumbĩ Ndeviti makalikĩlaa mĩvĩanĩ ĩno, makuĩtwe nĩ makasya ma kaũ na malĩsĩte mbalasinĩ, me vamwe na anini moo na andũ ma Yuta na ala matwĩe Yelũsalemu, na ndũa ĩno ĩkaendeea kũtũa andũ tene na tene. 26Vamwe na ũu, andũ makookaa kuma ndũanĩ sya Yuta na isionĩ ila ithyũlũlũkĩte Yelũsalemu, na angĩ kuma nthĩ ya mbaĩ ya Mbengyameni, kuma nthĩ ĩla yĩ nguumo wa iĩma yĩ ngalĩko ya ũthũĩlonĩ wa syũa, na nthĩ yĩ iĩma, na angĩ kuma ngalĩko ya ĩtheo ĩla yĩtawa Nengevu. Makaete nthembo sya kũvĩvw'a na nthembo ingĩ, nthembo sya lĩu wa mbaa mbeke na ũvani wa thooa mũnene wĩtawa ũvumba, vamwe na kũete nthembo sya kũtũnga mũvea nyũmbanĩ ya Mwĩai Ngai. 27Ĩndĩ mwalea kũmbĩw'a na kwĩkalya mũthenya wa Savato wĩ mũtheu kwa kũlea kũkua mĩio yenyu, na kũmĩlikya ndũanĩ ya Yelũsalemu mũthenyanĩ wa Savato, nĩvo ĩndĩ nĩkwatya mĩvĩa ya ndũa ĩsu mwaki, naw'o ũkavĩvya nyũmba sya kĩ-ũsumbĩ ila syĩ vo na ndũkavoeka’ ”

Currently Selected:

Yel 17: KAMBA

Highlight

Copy

Compare